CƏMİYYƏT
Pakistanın nümayəndə heyəti Azərbaycanın tolerantlıq mühitini yüksək qiymətləndirmişdir
Bakı, 28 noyabr (AZƏRTAC). Ölkəmizdə səfərdə olan Pakistan İslam Respublikası Parlamentinin komitə sədri, İslam Cəmiyyət Ulema-e-İslam Partiyasının sədri Maulana Fazl-ur-Rahmanın başçılıq etdiyi nümayəndə heyəti noyabrın 28-də Təzəpir məscid kompleksində olmuşdur.
AZƏRTAC xəbər verir ki, Təzəpir məscidi ilə tanışlıq zamanı Maulana Fazl-ur-Rahmana Prezident İlham Əliyevin göstərişi əsasında 2005-ci ildə məscidin bərpası və ətraf ərazilərin yenidən qurulması layihəsinin hazırlanması barədə məlumat verilmişdir. Vurğulanmışdır ki, həmin layihə əsasında burada onun ilkin görkəminə qaytarılması məqsədilə əzəli memarlığına xələl gətirməyən elementlərin əlavə edilməsi əksini tapmışdır. Məscidin bərpasında Azərbaycan nəqqaşlıq məktəbinin və Şərq oriyentalistikasının nadir nümunələrindən istifadə olunmuşdur. Təzəpir məscidinin tamamlayıcı dekorativ elementlərinin üstü, minarələrin başı və kəmərbənd yazıları ən yüksək əyarlı qızıl lövhələrdəndir.
Bildirilmişdir ki, kompleksdə Bakı İslam Universitetinin tədris korpusu yerləşir. Korpusun hər mərtəbəsində 10 sinif otağı olmaqla, 250 tələbənin təhsil alması üçün hər cür şərait yaradılmışdır.
Pakistanın nümayəndə heyəti Qafqaz Müsəlmanları İdarəsinin kitabxanası, konfrans zalı ilə də tanış olmuşdur. Kitabxanada 6 min nüsxə nadir əlyazmanın mövcudluğu haqqında məlumat verilmişdir. Qeyd edilmişdir ki, kitabxananın bir hissəsində dini verilişlərin hazırlanması üçün mini studiya yerləşir.
Komplekslə tanışlıqdan sonra Maulana Fazl-ur-Rahmanın başçılıq etdiyi nümayəndə heyəti Qafqaz Müsəlmanları İdarəsinin sədri şeyxülislam Allahşükür Paşazadə ilə görüşmüşdür.
Milli Məclisin deputatlarının, Pakistanın ölkəmizdəki səfiri İnayatullah Kakarın iştirak etdikləri görüşdə ikitərəfli münasibətlər, dostluq əlaqələri, dini məsələlər barədə fikir mübadiləsi aparılmışdır.
A.Paşazadə Azərbaycan ilə Pakistan arasında əlaqələrin yüksək səviyyədə olduğunu məmnunluqla qeyd etmişdir.
Şeyxülislam ölkəmizdə din və dövlət münasibətləri barədə məlumat vermiş, Azərbaycanda dilindən, dinindən asılı olmayaraq bütün xalqların nümayəndələrinin dostluq şəraitində yaşadığını vurğulamışdır. Diqqətə çatdırılmışdır ki, ölkəmizdə dini dözümlülük və tolerantlıq ümummilli lider Heydər Əliyevin dövlət-din konsepsiyasına uyğun olaraq təcəssüm tapmışdır. Hazırda Prezident İlham Əliyev bu kursu uğurla davam etdirir.
Xalqımızın ən ağrılı problemi olan Ermənistan-Azərbaycan, Dağlıq Qarabağ münaqişəsindən danışan şeyxülislam Pakistanın bu münaqişədə tutduğu ədalətli mövqeyə görə minnətdarlığını bildirmişdir.
Bakıda olmasından məmnunluğunu bildirən Maulana Fazl-ur-Rahman Pakistan ilə Azərbaycan arasındakı dostluq əlaqələrindən danışmış, mövcud münasibətlərin daha da inkişaf etməsində maraqlı olduğunu diqqətə çatdırmışdır.
Bildirmişdir ki, Azərbaycan sürətlə inkişaf edir. İki ölkə arasında həmişə dostluq münasibətləri olmuşdur. Pakistan daim Azərbaycanın haqq işinə dəstək verərək Ermənistanın təcavüzkar siyasətini qətiyyətlə pisləmiş və Dağlıq Qarabağ münaqişəsinin həllində hər zaman Azərbaycanın yanında olacağını bəyan etmişdir.
Azərbaycanın tolerantlıq mühitini yüksək qiymətləndirən Maulana Fazl-ur-Rahman diqqətə çatdırmışdır ki, ölkədə müxtəlif dini konfessiyaların nümayəndələri dostluq, mehribançılıq şəraitində birgə yaşayırlar.
Qonaq A. Paşazadənin dinin inkişafına verdiyi töhfəni də yüksək qiymətləndirmişdir.
Daha sonra çıxış edən Milli Məclisin deputatı Fəttah Heydərov iki ölkə arasındakı dostluq münasibətlərindən danışmış, bu əlaqələrin yüksək səviyyədə olduğunu qeyd etmişdir. Dövlət başçıları arasındakı səmimi münasibətlərin ölkələrarası əlaqələrə də müsbət təsir göstərdiyi vurğulanmışdır. Diqqətə çatdırılmışdır ki, Pakistan Dağlıq Qarabağ məsələsində hər zaman Azərbaycana dəstəyini nümayiş etdirmişdir.
Sonda Maulana Fazl-ur-Rahmana xatirə hədiyyələri təqdim edilmişdir.