Bakı, 18 yanvar, AZƏRTAC

Bu gün müstəqil Azərbaycanda xeyriyyəçilik ənənələri, Zeynalabdin Tağıyevin qoyduğu xeyriyyəçilik ənənələri davam edir, geniş vüsət alır. Bu sahədə ən böyük xeyriyyəçi nəinki Azərbaycanda, Cənubi Qafqazda Heydər Əliyev Fondudur.

AZƏRTAC xəbər verir ki, bu barədə Prezident İlham Əliyev xeyriyyəçi Hacı Zeynalabdin Tağıyevin Bakıda ucaldılan abidəsinin açılış mərasimindəki çıxışında bildirib.

Dövlətimizin başçısı qeyd edib ki, Heydər Əliyev Fondunun əsas məqsədi, vəzifəsi insanlara kömək göstərmək, Azərbaycan mədəniyyətini dünyada təbliğ etmək, təhsil, səhiyyə, mədəniyyət, incəsənət, elm sahələrinə töhfə verməkdir. Azərbaycanın multikultural dövlət kimi, müasir dövlət kimi dünyada tanıdılmasında Heydər Əliyev Fondunun müstəsna xidmətlərindən danışan Prezident deyib: “Məhz Fondun fəaliyyəti nəticəsində Azərbaycan daha çox tanınır və məhz bu amil bizə İkinci Qarabağ müharibəsi dövründə kömək göstərdi. Çünki Azərbaycan xalqı yaxşı bilir ki, o vaxt erməni lobbisi və onun havadarları Azərbaycan haqqında olmazın yalanlar uydurub media məkanına atmışlar. Ancaq uzun illər ərzində Heydər Əliyev Fondunun müxtəlif ölkələrdə fəaliyyəti və Azərbaycanın müasir, mütərəqqi dövlət kimi tanıdılması bu təbliğatı alt-üst etmişdir”.

Bu gün Heydər Əliyev Fondunun qarşısında yeni vəzifələr dayandığını vurğulayan Azərbaycan Prezidenti azad edilmiş torpaqlarda Fondun təşəbbüsü ilə həyata keçirilən təmir-bərpa və quruculuq işlərini diqqətə çatdırıb, bu sırada Şuşa şəhərindəki Yuxarı Gövhərağa, Aşağı Gövhərağa, Saatlı məscidlərində, Ağdam və Zəngilan şəhər məscidlərində aparılan əsaslı bərpa işlərini, eyni zamanda, Daşaltıda, Hadrutda və Şuşa şəhərində yeni məscidlərin tikilməsini və digər layihələri xüsusi qeyd edib.