Bakı, 3 fevral, AZƏRTAC

Azərbaycan Respublikasının Prezidenti İlham Əliyevin “Azərbaycan 2030: sosial-iqtisadi inkişafa dair Milli Prioritetlər”in təsdiq edilməsi haqqında Sərəncamı ilə dövlətimizin əsas hədəfləri müəyyənləşdirdi. Növbəti 10 il üzrə müəyyənləşdirilən və inkişafımızın bundan sonrakı mərhələsi üçün yol xəritəsi hesab edilən bu sənədə görə, təsbit olunmuş 5 prioritetdən biri azad edilmiş ərazilərə əhalinin qayıdışının daha intensiv formada təmin edilməsi, məskunlaşmanın dayanıqlı olması və nəhayət, məskunlaşmış ərazilərin iqtisadi fəaliyyətə reinteqrasiyasını nəzərdə tutur.

AZƏRTAC xəbər verir ki, bu fikirləri Milli Məclisin deputatı Bəhruz Məhərrəmov bildirib.

Deputat diqqətə çatdırıb ki, 1992-ci ildə Azərbaycan ərazilərinin işğalı Şuşa ilə başlanıb və 28 il sonra işğala Prezident İlham Əliyevin qətiyyəti ilə məhz Şuşada da son qoyuldu. Tarixən bizə bəlli olsa da, 28 illik dövr bir daha göstərdi ki, Şuşa Qarabağın açarı, Azərbaycanın döyünən ürəyidir. Dövlətimizin başçısı tərəfindən Şuşanın mədəniyyət paytaxtı elan edilməsi heç də təsadüfi deyil. Bu mənada, Şuşaya əhalinin qayıdışının, dayanıqlı məskunlaşma və iqtisadi fəaliyyətə reinteqrasiyanın təmin olunması digər bölgələrimiz üçün də əmsal təşkil edəcəyi üçün xüsusi diqqət tələb edir. Məhz buna görə Prezident İlham Əliyev işğaldan azad olunmuş ərazilərdə, xüsusilə də mədəniyyət paytaxtımızda bütün məsələlərin düşünülmüş, planlı şəkildə, ardıcıllıqla, ən yüksək standartlar səviyyəsində həyata keçirilməsinə böyük həssaslıqla yanaşır.

“Prezident İlham Əliyev hakimiyyətə gəldiyi gündən insan amili ölkəmizdə dövlət siyasətinin ana xəttinin təşkil edir. Bu baxımdan insanların təhlükəsizliyinin təmin olunması məqsədilə ərazilərin minalardan təmizləməsi ümdə vəzifə kimi müəyyən edilib. Hətta bu vəzifələrin icrasının intensivliyinin təmin olunması məqsədilə struktur islahatları da aparıldı. İşğaldan azad edilmiş ərazilərin dirçəlişi istiqamətində quruculuq, bərpa və yenidənqurma işlərinin sürətləndirilməsi, bu hədəfə nail olunmasında dövlət orqanlarının və digər təşkilatların əlaqələndirilmiş fəaliyyətinin gücləndirilməsi, habelə idarəetmədə çevikliyin və səmərəliliyin artırılması məqsədilə dövlətimizin başçısının müvafiq Fərmanına əsasən həmin ərazilərdə Azərbaycan Respublikası Prezidentinin xüsusi nümayəndəlikləri təsis olundu. Prezidentin digər Fərmanı ilə Azərbaycan Respublikasının Minatəmizləmə Agentliyi yaradıldı. Beynəlxalq əməkdaşlıq çərçivəsində Türkiyə və Rusiyanın aidiyyəti strukturlarının minatəmizləyənləri də prosesdə iştirak etməyə başlasa da, əsas yük azərbaycanlı istehkamçıların üzərindədir və onlar da öz vəzifələrini şərəflə yerinə yetirməkdədirlər”, - deyən deputat qeyd edib ki, Prezident İlham Əliyev hələ 44 günlük müharibə zamanı işğal faktına, habelə işğal zamanı törədilən barbarlığa, həmçinin müharibə və insanlıq əleyhinə cinayətlərə görə cinayətkarların lazımi formada cəzasını alacaqlarını, Ermənistan dövlətinin vurulan ziyanın əvəzinin ödənilməsinə məcbur ediləcəyini bildirmişdi. Dövlətimizin başçısı böyük uzaqgörənliklə məhz bu niyyətdən çıxış edərək, böyük qayıdışa aparan yolun ikinci mərhələsi kimi işğal nəticəsində vurulmuş ziyanın qiymətləndirilməsini müəyyənləşdirib. Hüquq ictimaiyyəti, heç şübhəsiz, təsdiq edə bilər ki, həqiqətən də dağıdılmış hər bir bina, hər bir ev özlüyündə cinayət işi, yaxud beynəlxalq məhkəmə iddiası üzrə maddi sübutdur. Bu mənada, vəhşicəsinə dağıdılmış evlərin bərpasından əvvəl sənədləşdirilməsi, maddi sübut kimi tanınmasının həyata keçirilməsi çox zəruri addımdır.

B.Məhərrəmovun sözlərinə görə, Prezident İlham Əliyev bütün hallarda dövlətimizin ali məqsədi olan insan amilinə, insanların layiqli həyat səviyyəsinin təminatı prinsipinə sadiqliyini hər zaman nümayiş etdirib. Yaşayış üçün şəraitin yaradılması, evlərin tikilməsi isə sonuncu mərhələ kimi müəyyən olunsa da, vətəndaş prosesin gecikə biləcəyi ilə bağlı narahatlıq keçirməməlidir. Unutmayaq ki, bizim Cocuq Mərcanlı kimi gözəl təcrübəmiz var.