Prezident İlham Əliyev qayğıkeş dövlət başçısı olduğunu hər zaman sübut edir
Bakı, 11 aprel, AZƏRTAC
Biz bu gün ölkəmizi dünyaya, dünyanı da ölkəmizə yaxınlaşdıran və tanıdan elə bir vüsətə, elə bir yüksəlişə nail olmuşuq ki, bu uğurları dostlarımız da etiraf edir, düşmənlərimiz də. Prezident İlham Əliyev əvvəlki illərdə olduğu kimi, son bir ildə də hər bir problemə müasir yanaşma tərzi, hadisələrə anında müdaxilə etmə qabiliyyəti, çevik və fərqli yanaşma bacarığı ilə qayğıkeş dövlət başçısı olduğunu sübut etmiş oldu. Dövlətimizin başçısı sübut etdi ki, insan ömrünün mənası illərin sayı ilə deyil, bu ömrü necə yaşamasında, ölkəsi, milləti, xalqı üçün nələr etməsi ilə dəyərlidir.
AZƏRTAC xəbər verir ki, bu sözləri Azərbaycan Dövlət Akademik Musiqili Teatrının direktoru, Əməkdar incəsənət xadimi Əliqismət Lalayev son bir ildə ölkəmizin mədəni həyatında baş verən yeniliklərlə bağlı fikirlərini bölüşərkən deyib.
O söyləyib: “Vətəni sevmək imandandır. Vətəni sevmək bəşəri idealları öz ölkəsində həyata keçirməyə çalışmaq, insanların hər birinin firavan həyatının təminatçısı olmaq deməkdir ki, Prezidentimiz son bir ildə bu missiyanı dönə-dönə gözlər önündə sərgiləyib. Şəhid anasının əlindən, Şəhid övladının üzündən öpüb, təbii fəlakətlərdən ziyan dəyənlərin yanında olub, dara düşənə əl uzadıb”.
Dövlətimizin başçısının sənətə və sənətkarlara göstərdiyi qayğı və diqqətdən danışan Ə.Lalayev qeyd edib ki, Prezidentimiz hər zaman ənənəyə sadiq qalaraq sənət adamlarının problemlərinin həllinə diqqət yetirir.
“Rəhbəri olduğum Azərbaycan Dövlət Akademik Musiqili Teatrın kollektivi də digər həmkarlarımız kimi, ölkə başçısının qayğısını hər addımda hiss edir. Şəhərimizin memarlıq baxımından unikal mədəniyyət ocaqlarından sayılan teatrımız son illər yenidən əsaslı təmir edilib, daxili interyeri zənginləşdirilib, səhnəsi, tamaşa salonu, məşq otaqları yeni, daha müasir avadanlıqlarla təchiz olunub. Yaradıcı insanlara göstərilən diqqətin ən bariz nümunəsi isə ötən ay Prezident İlham Əliyev və Birinci vitse-prezident Mehriban xanım Əliyeva ilə görüşdə qaldırılan problemlərə anında reaksiya vermələri oldu. Həm bizim teatra, həm Dövlət Rus Dram Teatrına “akademik” statusu verildi, teatr işçilərinin əməkhaqqı 50 faiz artırıldı, ümumiyyətlə, mədəniyyət sahəsində çalışan hər bir şəxs dövlətin qayğısını hiss etdi, digər yaradıcılıq təşkilatlarına ayrılmış vəsaitin miqdarı artırıldı. Biz bu böyük etimad və yüksək qayğı üçün ölkə başçısına və mədəniyyətimizin daimi himayədarı olan birinci xanıma dərin minnətdarlıq və təşəkkürümüzü bildiririk. Bundan sonra biz “akademik teatr” adına layiq işləmək üçün bütün qüvvə və bacarığımızı səfərbər etməliyik. Yeni əsərlərin tamaşaya qoyulması üçün axtarışlar aparmalıyıq, teatrın yüzillik ənənələrini qorumaqla yanaşı, daha müasir, daha aktual tamaşalarla, layihələrlə tamaşaçıların zövqünü və marağını təmin etməyə çalışmalıyıq. Əminəm ki, yazıçılar, bəstəkarlar da bu işdə yaxından iştirak edəcək, repertuarımızı zənginləşdirəcək yeni əsərlər yaradacaqlar, biz də onları sevə-sevə tamaşaçılara təqdim edəcəyik”, - deyə sənət ocağının direktoru söyləyib.
Ölkəmizə üz tutan turistlərin hər zaman Musiqili Teatrla tanış olduqlarını qeyd edən Ə.Lalayev deyib ki, son vaxtlar sənət ocağında hazırlanan bir çox tamaşalarda xaricdən dəvət olunan rejissorlar, baletmeysterlər, rəssamlar və digər yaradıcı insanlar iştirak edir.
“Gürcü rejissoru Qoça Kapanadze teatrda A.Saqarelinin “Xanuma” əsərinə uğurlu bir quruluş verdi. Rauf Hacıyevin “Qafqazlı qardaşqızı” operettasının yeni quruluşunda rəssam Moskvalı professor Dmitri Çerbadji dəvət olundu. İran İslam Respublikasının tanınmış dirijoru Bərdia Kiyarəs Üzeyir Hacıbəylinin “O olmasın, bu olsun” və “Arşın mal alan” tamaşalarına dirijorluq etdi. Təbrizin tanınmış kino və teatr aktyoru Camal Saqinejad “999-cu gecə” tamaşasında Şah obrazını canlandırdı. Bu günlərdə premyerası olan Antuan de Sent-Ekzüperinin “Balaca şahzadə” əsərinin motivləri əsasında hazırlanan ikihissəli şou-tamaşa ana dilimizdə səslənən ilk müzikldır və onu beynəlxalq bir heyət hazırlayıb. Quruluşçu rejissoru Xalq artisti, Cənnət Səlimova, bəstəkarı ABŞ-da yaşayan həmyerlimiz, beynəlxalq müsabiqələr laureatı Ruslan Ağababayev, rəssamı Məryəm Ələkbərli, xoreoqrafı Rusiya Federasiyasının Əməkdar incəsənət xadimi, dünya şöhrətli baletmeyster Sergey Gritsaydır. Bu eksperimentləri biz gələcəkdə də davam etdirəcəyik”, - deyə Ə.Lalayev vurğulayıb.
Bölmənin digər xəbərləri
