Bakı, 19 sentyabr, AZƏRTAC

Əmək və Əhalinin Sosial Müdafiəsi naziri Sahil Babayev və Quba Rayon İcra Hakimiyyətinin başçısı Ziyəddin Əliyev Quba şəhərindəki Uşaq Günərzi Qayğı Mərkəzinin fəaliyyəti ilə tanış olublar.

Əmək və Əhalinin Sosial Müdafiəsi Nazirliyinin “Uşaqların dövlət uşaq müəssisələrinə düşməsinin qarşısının alınması və çətin həyat şəraitində olan uşaqların və ailələrin sosial xidmətlərə çıxışının təmin edilməsi məqsədilə günərzi mərkəzlərin xidmətinin göstərilməsi” istiqaməti üzrə sosial xidməti sifarişini Quba şəhərində “Ailə” Sosial Araşdırmalar İctimai Birliyi həyata keçirir. Mərkəzə tək valideynli, hər iki valideynini itirmiş və inteqrativ təhsilə cəlb oluna bilən sağlamlıq imkanları məhdud 30 uşaq cəlb edilib.

Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, mərkəzdə həssas qruplardan olan uşaqların asudə vaxtlarının səmərəli keçirməsi üçün mütəmadi olaraq müxtəlif ekskursiya və gəzintilər təşkil edilir, cizgi filmləri nümayiş olunur. Mərkəzin əməkdaşları və uşaqların valideynləri üçün təlimlər, bilik və bacarıqlarının artırılması məqsədilə tədbirlər həyata keçirilir.

Mərkəzin kollektivi ilə görüşündə nazir S.Babayev Prezident İlham Əliyevin “Xüsusi qayğıya ehtiyacı olan uşaqlara və digər şəxslərə göstərilən sosial xidmətlərin genişləndirilməsi üçün əlavə tədbirlər haqqında” 2019-cu il iyunun 1-də imzaladığı Sərəncamın ölkəmizdə reabilitasiyayönümlü sosial xidmətlərin əhatə dairəsinin dəfələrlə artmasına şərait yaratdığını vurğulayıb. Nazir Sərəncamın icrası işləri çərçivəsində respublikamızda günərzi qayğı mərkəzlərinin sayının iki dəfədən çox artırılaraq 28-dən 58-ə çatdırılacağını, günərzi mərkəzləri şəbəkəsinin bölgələr üzrə genişləndiriləcəyini, həmçinin yeni sosial xidmət istiqamətləri üzrə mərkəzlərin yaradılacağını deyib.

Mərkəzdə yaradılmış şəraiti, buradakı günərzi qayğı xidmətlərini, uşaqlarla aparılan işləri nəzərdən keçirən S.Babayev göstərilən reabilitasiyayönümlü sosial xidmətlərlə bağlı müvafiq tapşırıqlar verib.