REJİSSOR VƏ OPERATOR RASİM İSMAYILOVUN XATİRƏ GECƏSİ KEÇİRİLƏCƏKDİR
Bakı, 15 aprel (AZƏRTAC). Aprelin 17-də Uşaq Kino Evində Azərbaycanın görkəmli kinorejissoru və kinooperatoru Əməkdar incəsənət xadimi, Dövlət mükafatı laureatı Rasim İsmayılova həsr olunmuş xatirə gecəsi, rejissorun uşaqlar üçün çəkdiyi "Asif, Vasif, Ağasif" filminin nümayişi və filmin yaradıcı heyəti ilə görüş keçiriləcəkdir.
1962-ci ildə Ümumittifaq Kinematoqrafiya İnstitutunun operatorluq fakültəsini bitirən R.İsmayilov yaradıcılığa "Azərbaycanfilm" kinostudiyasında başlamışdır. Televiziya animasiya filmlərinin yaradıcılarından sayılan R.İsmayılov "Danışan işıqlar", "Qırmızılar, qaralar və başqaları", "Prometey-69" kimi cizgi filmlərinə ssenari yazmış və rejissorluq etmişdir.
Rasim İsmayılovun kino debütü 1964-cü ildə "Kimi daha çox sevirik" kino almanaxda və "Dağ meşəsindən keçərkən" novellası olmuşdur. Daha sonra o, "Yaşamaq gözəldir, qardaşım", "Yenilməz batalyon", "Torpaq, dəniz, od, səma", "Sevil", "Yeddi oğul istərəm", "Axırıncı aşırım", "Gün keçdi", "Nəsimi", "Dədə Qorqud", "Dörd bazar günü", "Xoşbəxtlik qayğıları", "Sevinc buxtası", "Babək" və sair filmlərin quruluşçu operatoru olmuşdur.
Sənətkarın rejissorluq qalereyasına isə onun "Şir evdən getdi", "Anın quruluşu", "İşgüzar səfər", "Asif, Vasif, Ağasif", "Sizi dünyalar qədər sevirdim", "Alman klinikasına şəxsi səfər", "Tələ" və sair bədii filmlər daxildir.
Bölmənin digər xəbərləri
