Moskva, 7 oktyabr, AZƏRTAC

Rusiya Federasiyasının Baytarlıq və Fitosanitar Nəzarəti üzrə Federal Xidmətinin (“Rosselxoznadzor”) rəhbəri Sergey Dankvert AZƏRTAC -a müsahibəsində onun nəzarət etdiyi qurumun Azərbaycan Respublikasının Qida Təhlükəsizliyi Agentliyi ilə əməkdaşlığından danışıb.

-“Rosselxoznadzor” ilə Azərbaycan Respublikasının Qida Təhlükəsizliyi Agentliyi arasında əməkdaşlığın səviyyəsini necə qiymətləndirirsiniz?

-Azərbaycan Respublikasının Qida Təhlükəsizliyi Agentliyi bu il özünün 5 yaşını qeyd edir. Biz uzun yol qət etmişik, hazırda çox fəal və yaxşı əməkdaşlıq edirik. Beş il ərzində biz məhsulların qarşılıqlı tədarükünü artıra və hətta bərabərləşdirə bilmişik. Son 10 ildə Rusiyadan Azərbaycana tədarükün həcmi daha çox olub. Amma bu gün deyə bilərik ki, sentyabrın 9-na olan vəziyyətə görə, biz praktiki olaraq bu rəqəmləri bərabərləşdirmişik və eyni tədarük həcmimiz var: Rusiyadan nə qədər ərzaq məhsulları ixrac edilirsə, Azərbaycandan da təxminən o qədər idxal olunur. Azərbaycan Respublikasının Qida Təhlükəsizliyi Agentliyi bununla bağlı səmərəli və əzmli fəaliyyət göstərir.

- Bildiyiniz kimi, Azərbaycan və Rusiya ərzaq məhsullarının ixrac və idxalının keyfiyyətinə birgə nəzarət edir. Bu iş necə təşkil olunub?

- Biz indicə Azərbaycan Respublikasının Qida Təhlükəsizliyi Agentliyinin sədri ilə hökumətinizin müəssisələrin yenidən qeydiyyata alınması və siyahıların aparılmasına dair qərar verməsi ilə bağlı məsələləri müzakirə etdik. Çox şadıq ki, Azərbaycandan müfəttiş qrupu gəlir və ixracatçılarımızın nizam-intizamını tənzimləyir. Həmkarlarımıza çox səmərəli və yaxşı işinə görə təşəkkür etdik. Son nəticədə, biz nəzarət sistemlərimizi ekvivalent kimi tanıyacaq və proseduru sadələşdirəcəyik. Artıq bir sıra mövqelər üzrə razılığa gəlmişik və mübadilə proseslərinin intensiv olmasında maraqlıyıq.

- Azərbaycan Respublikasının Qida Təhlükəsizliyi Agentliyi ilə əməkdaşlığın perspektivlərini necə qiymətləndirirsiniz?

- Əməkdaşlığımızın yaxşı perspektivləri var. Hər il qarşılıqlı tədarükü artırırıq. Bu il biz Azərbaycandan tədarükün həcminin 600 min tona qədər artacağını gözləyirik. Bu artım artıq bir çox məhsul növlərində hər il baş verir. Bunlar bizim Azərbaycandan ənənəvi olaraq idxal etdiyimiz məhsul növləri - nar, xurma, alma, pomidor, digər müxtəlif meyvələrdir. Bu, bir-birini tamamlayan yaxşı əməkdaşlıqdır. Öz növbəmizdə, biz də kifayət qədər yaxşı məhsullar tədarük edirik. Dediyim kimi, kənd təsərrüfatı məhsullarında balansımız təxminən ekvivalentdir: bu günə olan məlumata görə, Rusiya və Azərbaycan bir-birinə təxminən 500 milyon dollarlıq məhsul tədarük ediblər.