REGİONLAR
Saatlı rayonunda qəsdən yanğın törədən şəxs saxlanılıb
Saatlı, 15 iyul, Aydın Yavərzadə, AZƏRTAC
Saatlı rayonunda vətəndaşa məxsus fərdi təsərrüfatda baş verən yanğını törədən şəxs polis əməkdaşları tərəfindən aşkar edilərək saxlanılıb.
Daxili İşlər Nazirliyi mətbuat xidmətinin Şirvan regional qrupundan AZƏRTAC-ın bölgə müxbirinə verilən məlumata görə, Saatlı rayonu Sımada kənd sakini B.Aslanov rayon Polis Şöbəsinə müraciət edərək iyulun 11-də ona məxsus fərdi təsərrüfatda yanğın baş verməsi barədə məlumat verib.
Məlumatla əlaqədar polis şöbəsinin əməkdaşları hadisə yerində olublar və ilkin araşdırmalar aparılıb. Keçirilən tədbirlərlə hadisənin qəsdən törədildiyi məlum olub.
Saatlı RPŞ-nin əməkdaşları tərəfindən keçirilən təxirəsalınmaz əməliyyat-axtarış tədbirləri nəticəsində yanğını törətməkdə şübhəli bilinən Sabirabad rayonu Moranlı kənd sakini Valid Hüseynli saxlanılıb.
Dindirilmə zamanı V.Hüseynli törətdiyi cinayət əməlini etiraf edib.
Faktla bağlı Saatlı RPŞ-də araşdırmalar aparılır.