CƏMİYYƏT
Salyanlı ağsaqqallar Azərbaycan Prezidentinin yazıçı Əkrəm Əylisli ilə bağlı Sərəncamlarını razılıqla qarşılamışlar
Salyan, 9 fevral (AZƏRTAC). Salyan Rayon İcra Hakimiyyətində Respublika Ağsaqqallar Şurası Salyan rayon təşkilatının konfransı keçirilmişdir.
AZƏRTAC xəbər verir ki, Respublika Ağsaqqallar Şurası Salyan rayon təşkilatının sədri Beydulla İmanov hesabat məruzəsi ilə çıxış etmişdir.
Qeyd olunmuşdur ki, Azərbaycan xalqının milli mentalitetində ağsaqqal sözünə, ağbirçək öyüdünə xüsusi hörmət və ehtiram vardır. Ümummilli liderimiz Heydər Əliyev ağsaqqalların ölkənin ictimai-siyasi həyatında fəal iştirakına həmişə önəm vermişdir. Bu siyasi xətt Prezident İlham Əliyev tərəfindən uğurla davam etdirilir.
Bildirilmişdir ki, rayonda fəaliyyət göstərən 30-dan çox qeyri-hökumət təşkilatlarından biri olan rayon ağsaqqallar şurası öz fəaliyyətini QHT-lər haqqında qanunlara və Respublika Ağsaqqallar Şurasının direktiv sənədlərinə müvafiq olaraq qurur.
Ötən illər ərzində görülən işlərdən söz açan B.İmanov vurğulamışdır ki, şura ahıl, imkansız adamlara qayğını həmişə diqqət mərkəzində saxlamış, yaşlı adamların problemləri ilə əlqədar onlara lazım olan kömək və yardım göstərmişdir.
Ağsaqqallar şurası gənc nəslin yüksək vətənpərvərlik ruhunda və dərin bilikli, savadlı kadrlar kimi yetişməsi üçün hər il 600 baldan yuxarı nəticə göstərən tələbələrlə görüşlər keçirir, onları mükafatlandırır.
Ağsaqqallar şurası keçirilən prezident, parlament, bələdiyyə seçkilərində ağsaqqallar şurası özünün fəallığı ilə həmişə seçilmişdir. Yaşlı nəslin nümayəndələri bu il keçiriləcək Prezident seçkilərində də yüksək fəallıqla iştirak edəcəklər.
Hesabat konfransında rayon ağsaqqallar şurası sədrinin müavini Qulam Sadıqov, rayon təhsil şöbəsinin müdiri Əbülfət Bədəlov, «Qələbə» qəzeti baş redaktorunun müavini Fəxrəddin Fərzəliyev, Yuxarı Xalac kənd ağsaqqallar şurasının sədri Oqtay Məmmədov və başqaları çıxış edərək şuranın hesabat müddətindəki fəaliyyətini qənaətbəxş qiymətləndirmiş, şuranın fəaliyyətini daha da gücləndirmək üçün konkret təkliflərlə çıxış etmişlər.
Son zamanlar Azərbaycan ictimaiyyəti arasında kəskin qəzəb və nifrət doğuran Əkrəm Əylislinin Moskvanın «Drujba narodov» jurnalında çap olunan «Daş yuxular» yazısı haqqında fikirlərini bildirən ağsaqqallar qeyd etmişlər ki, Vətən xaini və nankor Əkrəm Əylislidən “Xalq yazıçısı” adının geri alınması, Prezidentin fərdi təqaüdündən məhrum edilməsi ilə bağlı Azərbaycan Respublikası Prezidentinin sərəncamları salyanlı ağsaqqallar tərəfindən razılıqla qarşılanmışdır.
Konfransda təşkilatın idarə heyətinin yeni üzvləri seçilmişdir.
Beydulla İmanov yenidən rayon təşkilatının sədri və fevralın 16-da Bakıda keçiriləcək Respublika Ağsaqqallar Şurasının qurultayına nümayəndə seçilmişdir.