Bakı, 18 mart, AZƏRTAC

Şəhid ailələri və müharibə ilə əlaqədar əlilliyi olan şəxslərə 2023-cü ildə 1500, möhtəşəm Zəfər əldə etdiyimiz 44 günlük Vətən müharibəsindən sonra 6 min, ümumən ötən dövrdə 14 800 mənzil və fərdi ev təqdim edilib.

Bu barədə Əmək və Əhalinin Sosial Müdafiəsi Nazirliyində keçirilən kollegiya iclasında bildirilib.

Əmək və əhalinin sosial müdafiəsi naziri Sahil Babayev Prezident İlham Əliyevin tapşırığına əsasən şəhid ailələri və müharibə ilə əlaqədar əlilliyi olan şəxslərin sosial müdafiəsinin gücləndirilməsi istiqamətində atılan mühüm addımları qeyd edib.

Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən AZƏRTAC-a verilən məlumata görə, həmin kateqoriyalardan olan vətəndaşların mənzillə təminatı proqramının uğurla davam etdirildiyi və postmüharibə dövründə 5 dəfə genişləndirildiyi diqqətə çatdırılıb. Qeyd olunub ki, bu il də şəhid ailələri və müharibə ilə əlaqədar əlilliyi olan şəxslərə daha 1500 mənzil və fərdi evin verilməsi nəzərdə tutulur.

Həmçinin müharibə ilə əlaqədar əlilliyi olan şəxslərə postmüharibə dövründə 494, ümumən ötən dövrdə 7600 avtomobil təqdim edilib və bu sahədə tədbirlər davam edəcək.

İclasda nazirliyin tabeliyindəki Sosial Xidmətlər Agentliyinin fəaliyyət istiqamətləri üzrə görülən işlər diqqətə çatdırılıb. Bu ilin iki ayında sosial xidmət müəssisələrində 1800-ə yaxın şəxsə xidmət göstərildiyi, 3900-dək şəxsin evlərində sosial-məişət xidməti, 67 şəxsin sanator-kurort yollayışı ilə təmin edildiyi, 48 şəxsin reinteqrasiyası işlərinin aparıldığı qeyd olunub.

Ötən il Bakı və Sumqayıtda açılan ixtisaslaşmış sosial xidmət mərkəzlərində əlilliyi olan 500-dək, bu ilin iki ayında isə 149 uşağa reabilitasiyayönümlü sosial xidmətlər göstərildiyi bildirilib. Bu il Ağdam, Göyçay, Hacıqabul rayonlarında və Bakının Yasamal rayonunda da belə mərkəzlərin açılacağı qeyd olunub.

Uşaqların dövlət uşaq müəssisələrinə düşməsinin qarşısının alınması və çətin həyat şəraitində olan uşaqların və ailələrin sosial xidmətlərə çıxışının təmin edilməsi üçün aparılan işlər, günərzi mərkəzlərin fəaliyyəti barədə məlumat verilib.

Əlilliyi olan şəxslərin Peşə-əmək Reabilitasiyası Mərkəzində bu il əmək bazarı tələblərinə uyğun olaraq bir sıra yeni peşələr üzrə hazırlıq kursları və dərnəklərin də təşkil ediləcəyi qeyd olunub. Bu il 22 uşağın övladlığa verildiyi, habelə “Himayədar ailə” modelinin tətbiqi işləri, artıq 9 uşağın himayədar ailələrə verildiyi diqqətə çatdırılıb.

Həssas qruplarla bağlı dəstək tədbirlərindən, nazirliyin tabeliyindəki Sosial Dəstək Mərkəzi tərəfindən bu məqsədlə icra olunan layihələrdən bəhs olunub. Şəhid övladlarının anaları ilə birgə səyahət və həmin valideynlər üçün təlimlərin təşkili, müharibə iştirakçılarına, müharibədən əziyyət çəkmiş qadınlara psixoloji dəstəyin göstərilməsi, onlar üçün şəxsi inkişaf təlimləri və s. üzrə aparılan işlər qeyd edilib.

Nazirliyin tabeliyindəki Əmək Bazarı və Sosial Müdafiə Məsələləri üzrə Milli Observatoriya tərəfindən sorğu və monitorinq istiqaməti üzrə statistik xülasə, nazirlik və qurumlarının əməkdaşları üçün təşkil edilmiş təlimlər, aparılan qiymətləndirmə prosesi, Observatoriyanın təcrübə proqramları barədə məlumat verilib.

İclasda hər üç qurum üzrə görülən işlər və qarşıda duran vəzifələr müzakirə olunub.