Şəki, 11 fevral (AZƏRTAC). Şəki Şəhər İcra Hakimiyyətində 2011-ci ilin yekunlarına həsr olunmuş geniş hesabat yığıncağı keçirilmişdir.

AZƏRTAC xəbər verir ki, yığıncaq iştirakçıları əvvəlcə ümummilli lider Heydər Əliyevin abidəsi önünə gül-çiçək düzmüş, xatirəsini ehtiramla yad etmiş, icra hakimiyyəti binasının foyesində rayonda istehsal olunan məhsulların və el sənətkarların əl işlərindən ibarət sərgiyə baxmışlar.

Yığıncağın əvvəlində 2011-ci ildə Şəkinin sosial-iqtisadi həyatında baş verən yeniliklərdən bəhs edən film nümayiş etdirilmişdir.

Yığıncaqda şəhər icra hakimiyyətinin başçısı Elxan Usubovun 2011-ci ilin yekunları və qarşıda duran vəzifələrə dair hesabat məruzəsi dinlənilmişdir.

Qeyd olunmuşdur ki, 2011-ci il Şəkinin tarixində ən uğurlu illərdən biri kimi yadda qalmışdır. Ötən il Prezident İlham Əliyevin Şəki şəhərinin sosial-iqtisadi inkişafı ilə bağlı üç mühüm Sərəncam imzaladığını xatırladan natiq, bu sənədlərdə Şəki şəhərinin milli-memarlıq üslubunun qorunub saxlanması, şəhərin turizm potensialının genişləndirilməsi, tarixi abidələrin bərpa olunması, xalq tətbiqi sənətinin daha da inkişaf etdirilməsi və digər tədbirlərin nəzərdə tutulduğunu diqqətə çatdırmışdır.

Məruzəçi bildirmişdir ki, 2011-ci il şəkililər üçün həm də Prezident İlham Əliyevin bu şəhərə növbəti səfəri ilə yaddaqalan olmuşdur. Dövlətimizin başçısı şimal-qərb bölgəsinə səfəri çərçivəsində noyabrın 17-də Şəkidə olmuş, bir sıra emal və sosial təyinatlı öbyektlərin, o cümlədən 100 çarpayılıq xəstəxana binasının, şərab zavodunun və “Green Hill İnn” mehmanxanasının açılışında iştirak etmişdir. Səfər zamanı Prezident İlham Əliyev Şəki Olimpiya İdman Kompleksinin yenidənqurmadan sonrakı vəziyyəti və “Aşağı Karvansara” kompleksində aparılan təmir-bərpa işləri ilə də tanış olmuş, Sabit Rəhman adına Dövlət Dram Teatrına baş çəkmişdir.

Qeyd edilmişdir ki, 2011-ci ildə Şəkidə iqtisadiyyatın əsas sahələri üzrə istehsal olunan məhsul və xidmətlərin ümumi həcmi 333 milyon 851 min manat olmuşdur. Bu, əvvəlki illə müqayisədə 37,4 faiz çoxdur. Adambaşına düşən məhsul istehsalının həcmi 2010-cu ilə nisbətən 36,2 faiz artaraq 1 min 898 manat təşkil etmişdir. Bu müddətdə pərakəndə əmtəə dövriyyəsi 9,2 faiz artaraq 237 milyon 165 min manat, əhaliyə göstərilən pullu xidmətlərin həcmi isə 21,8 faiz artaraq 54 milyon 740 min manat olmuşdur. Hesabat ilində rayonda 1184 yeni iş yeri açılmışdır.

Bildirilmişdir ki, 2011-ci ildə rayonda sosial-iqtisadi sahələrin inkişafına ümumilikdə 88 milyon 16 min manat investisiya yönəldilmişdir. Bu, əvvəlki illə müqayisədə 2 dəfə çoxdur. Əsas kapitala yönəldilmiş investisiyanın 77 milyon 875 min manatı və ya 88,5 faizi tikinti-quraşdırma işlərinə sərf edilmişdir.

Diqqətə çatdırılmışdır ki, Prezident İlham Əliyevin “Şəki şəhərinin sosial-iqtisadi inkişafının sürətləndirilməsinə dair əlavə tədbirlər haqqında” 2011-ci il 12 sentyabr tarixli Sərəncamına uyğun olaraq, hazırda şəhərin milli-memarlıq üslubunun qorunub saxlanması şərti ilə müasirləşdirilməsi istiqamətində zəruri tədbirlər həyata keçirilir. Bütün küçə və prospektlər, park və meydanlar əsaslı şəkildə yenidən qurulur, tarixi binalar bərpa olunur, şəhərdə yeni, müasir işıqlandırma sistemi quraşdırılır. Bir sözlə, şəhər büsbütün simasını dəyişir. Natiq vurğulamışdır ki, Şəki əhalisi görülən işləri çox yüksək qiymətləndirir, bu diqqət və qayğıya görə dövlətimizin başçısına minnətdarlıqlarını bildirirlər.

Dahi mütəfəkkir M.F.Axundzadənin anadan olmasının 200 illik yubileyinin yüksək səviyyədə keçirilməsi üçün geniş hazırlıq işlərinin aparıldığını diqqətə çatdıran E.Usubov, hazırda böyük ədibin adını daşıyan prospektdə, mədəniyyət və istirahət parkında, ev-muzeyində, habelə şəhərin mərkəzində qoyulmuş büstünün ətrafında geniş abadlıq və yenidənqurma işlərinin aparıldığını bildirmişdir.

Aqrar sahədə görülən işlər barədə məlumat verən natiq 2011-ci ildə taxılçılığın, heyvandarlığın, meyvəçiliyin, üzümçülüyün inkişafının diqqət mərkəzində saxlanıldığını, rayonda rekord miqdarda- 238 min 585 ton taxıl istehsal olunduğunu bildirmişdir. Diqqətə çatdırılmışdır ki, bu, 2010-cu illə müqayisədə 100 min ton çoxdur. Hazırda rayonun Çələbixan qəsəbəsi ərazisində 16 min ton tutumu olan taxıl anbarı kompleksinin tikintisi davam etdirilir.

Qeyd olunmuşdur ki, 2011-ci ildə təhsil müəssisələrinin maddi-texniki bazasının möhkəmləndirilməsi istiqamətində tədbirlər davam etdirilmiş, Baş Kəldək kəndində 180 şagird yerlik yeni məktəb binası, Kiş kəndində uşaq bağçası tikilib istifadəyə verilmişdir. Hazırda şəhərdəki 5 nömrəli tam orta məktəb üçün 320 yerlik yeni tədris korpusunun, Şorsu və Aşağı Layısqı kəndlərinin hər birində 360, Çələbi xan qəsəbəsində isə 180 şagird yerlik yeni məktəb binalarının tikintisi, şəhərdəki 22 nömrəli uşaq bağçasının əsaslı təmiri davam etdirilir.

Əhalinin fasiləsiz elektrik enerjisi, təbii qaz və içməli su ilə təminatının yaxşılaşdırılması sahəsində görülən işlərə toxunan məruzəçi hesabat ilində Aşağı Küngüt, Oxud və Fazıl kəndlərinə təbii qazın verildiyini bildirmiş, kəndlərin qazlaşdırılması istiqamətində işlərin sürətləndirilməsinin vacibliyini önə çəkmişdir. Diqqətə çatdırılmışdır ki, təməli 2010-cu ilin dekabrında qoyulmuş “Şəki şəhərinin su təchizatı və kanalizasiya sistemlərinin yenidən qurulması” layihəsinin birinci mərhələsi üzrə işlər də artıq yekunlaşmışdır və cari ilin martında ikinci mərhələ üzrə tikinti-quraşdırma işlərinə başlanılacaqdır.

Yığıncaqda Prezident Administrasiyasının məsul işçisi Rafil Hüseynov və Milli Məclisin deputatı Cavanşir Feyziyev çıxış edərək 2011-ci ildə respublikamızda ictimai-siyasi və sosial-iqtisadi sahələrdə əldə olunmuş uğurlardan danışmış, qarşıda duran vəzifələrə toxunmuş, tövsiyələrini bildirmişlər.

Yığıncaq iştirakçıları adından Azərbaycan Prezidenti İlham Əliyevə müraciət qəbul olunmuşdur.