Bakı, 5 iyun, AZƏRTAC

İyunun 5-də AMEA-nın akademik Ziya Bünyadov adına Şərqşünaslıq İnstitutunda Ulu Öndərin 100 illik yubileyinə həsr olunmuş “Heydər Əliyev və Azərbaycan elmi” mövzusunda elmi seminar keçirilib.

Bu barədə AZƏRTAC-a institutdan məlumat verilib. Bildirilib ki, seminarda AMEA-nın vitse-prezidenti vəzifəsini icra edən, Şərqşünaslıq İnstitutunun baş direktoru akademik Gövhər Baxşəliyeva “Heydər Əliyev İli” çərçivəsində AMEA-da bir çox tədbirlər keçirildiyini bildirib. Bu baxımdan Şərqşünaslıq İnstitutunda keçirilən tədbirlərdən söz açan G.Baxşəliyeva diqqətə çatdırıb ki, bu il mayın 3-4-də Azərbaycan, İraq, Qırğızıstan, Qazaxıstan və Belarusdan 81 alimin iştirakı ilə “Heydər Əliyev və müasir Şərq” mövzusunda beynəlxalq elmi konfrans, Gənclər Gününə həsr olunmuş “Heydər Əliyev və Azərbaycan gəncliyi” adlı tədbir keçirilib, bir sıra kitablar, o cümlədən Ulu Öndərə həsr olunmuş məqalələr toplusu çapa hazırlanıb, bir neçə seminarın keçirilməsi planlaşdırılıb. Bu seminarlardan birincisi “Heydər Əliyev və Azərbaycan elmi” mövzusuna həsr olunub.

Seminarda institutun Təhsil şöbəsinin müdiri dosent Lalə Bayramova “Heydər Əliyev və Azərbaycan elmi” mövzusunda məruzə edib. Azərbaycan elminin inkişafında Ulu Öndərin böyük xidmətləri olduğunu deyən məruzəçi, Ümummilli Liderin 70-ci illərdən başlayaraq akademiyaya xüsusi diqqət göstərdiyini bildirib. L.Bayramova Ulu Öndərin uzaqgörənliyi və milli elmi strategiyası sayəsində alimlərimizin hələ sovet dövründə böyük bir coğrafi məkanda respublika elmini layiqincə təmsil etdiklərini vurğulayıb: “Belə strategiya üzərində qurulmuş inkişaf sayəsində, Azərbaycanda milli təfəkkürə malik ziyalı ordusu yetişdi və bu ziyalı ordusu, sonda Azərbaycanın müstəqilliyə qovuşmasına öz töhfəsini verdi”.

XX əsrin 70-80-ci illərində Azərbaycan Elmlər Akademiyasının respublikanın inkişafına xidmət edən elmi ideyaların, ixtiraların və kəşflərin əsas mərkəzinə çevrildiyini deyən məruzəçi müstəqillik illərində Heydər Əliyevin rəhbərliyi dövründə də ölkədə elmin inkişafı, elmi-texniki potensialın güclənməsi, yüksəkixtisaslı elmi kadrların hazırlanması, cəmiyyətdə elmi işçilərin nüfuzunun artırılması sahəsində həyata keçirilən önəmli tədbirlərdən bəhs edib. O, Heydər Əliyevin müvafiq Fərmanı ilə Azərbaycan Elmlər Akademiyasına “Milli Elmlər Akademiyası” statusu verilməsini xatırladıb.

İnstitutun Qadınlar Şurasının sədri, dosent Xanımzər Kərimova seminarda “Heydər Əliyevin Azərbaycan və Misirin elm-təhsil əlaqələrində rolu” mövzusunda məruzə edib. Heydər Əliyevin Azərbaycan və Misir əməkdaşlığının banisi olduğunu deyən məruzəçi Ulu Öndərin iki ölkə arasında bu sahədə əlaqələrinin yaranmasında müstəsna rolundan bəhs edərək, sonrakı illərdə də Ümummilli Liderin layiqli davamçısı Prezident İlham Əliyev tərəfindən Misirlə, eləcə də digər ərəb ölkələri ilə elm, təhsil, iqtisadi-siyasi, ədəbi-mədəni əlaqələrin inkişaf etdirildiyini bildirib. Misirlə əlaqələr sahəsində iki ölkədə mədəniyyət günlərinin keçirildiyini, universitetlər arasında təcrübə mübadiləsi aparıldığını, elm və tədqiqat mübadiləsi proqramları çərçivəsində şərqşünas alimlərimizin bu ərəb ölkəsində, misirli alimlərin isə Şərqşünaslıq İnstitutunda olduqlarını qeyd edib.

Sonda məruzələr ətrafında çıxışlar olub. Çıxışlarda Ulu Öndərin Azərbaycan elminin inkişafında misilsiz xidmətləri qeyd edilib.