Bakı, 1 avqust, AZƏRTAC

Azərbaycan Respublikası Dövlət Neft Şirkətinin (SOCAR) “Neftqaztikinti” tresti yanvar-iyun aylarında “Baku Steel Company” MMC-yə 193,33 ton qara metal tullantısı təhvil verib.

SOCAR-ın mətbuat xidmətindən AZƏRTAC-a verilən məlumata görə, şirkətin “Neftqaztikinti” trestində bu ilin birinci yarısında əldə olunan uğurlar və qarşıda duran vəzifələrə həsr edilən iclas keçirilib. Trestin müdiri Mirkazım Abasov təsdiq olunan Tədbirlər Proqramı çərçivəsində görülən işlərdən danışıb. Qeyd edilib ki, hesabat dövründə “Çilov” yatağındakı 112 saylı stasionar dəniz özülü və “Neft Daşları” yatağındakı 1954A saylı estakadayanı meydança tikilib istismara verilib, “Günəşli” yatağındakı 6 və 14 saylı dərin dəniz özülləri əsaslı təmir olunub, eləcə də “Neft Daşları” yatağındakı 252 saylı meydança ilə 34 saylı paylayıcı qurğu arasındakı estakadanın inşası başa çatdırılıb.

Həmçinin, N.Nərimanov adına neft və qazçıxarma idarəsinin qazkopmpressor stansiyasında soyuducu qurğu və nasosxana yenidən qurulub, idarənin istismar etdiyi 441 saylı estakadayanı meydança ilə 438 saylı estakadayanı meydança arasında sualtı neft-qaz və yüksək təzyiqli qazlift xətləri çəkilib, eləcə də “Ümid” yatağında neftin və qazın nəql sistemi layihələndirilib.

Bildirilib ki, cari ilin birinci yarısında idarə tərəfindən 14 min 271 ton metal-konstruksiya quraşdırılıb, ümumilikdə təxminən 120 kilometr uzunluğunda quru, sualtı, eləcə də estakada və meydançaüstü boru kəmərləri çəkilib, 145,6 kilometr uzunluğunda sualtı və yeraltı yüksək gərginlikli kabel xətləri, 3,4 kilometr uzunluğunda hava elektrik ötürücü xətləri çəkilib, 137 min 755 kvadratmetr sahəyə asfalt vurulub, 7 min 858 kubmetr beton, dəmir-beton və əmtəə betonu istehsal olunub.

Qeyd edilib ki, idarə Lökbatan Tullantı Mərkəzinə 10 ton boya qabları və boya tullantıları, 126 ton abraziv qum dənəciyi, 0,072 ton süzgəc, 0,11 ton katric, 0,04 ton polimer əsaslı tullantılar, 2,54 ton qaynaq çubuğu tullantısı verib. Müqavilə əsasında 193,33 ton qara metal tullantısı isə “Baku Steel Company” MMC-yə təhvil verilib.