Kiyev, 10 dekabr, AZƏRTAC

Odessa şəhərinin girəcəyində yerləşən sənaye rayonunda “SOCAR” brendli yeni yanacaqdoldurma kompleksi (YDK) fəaliyyətə başlayıb. Bu barədə AZƏRTAC-a Azərbaycan Respublikası Dövlət Neft Şirkətinin (ARDNŞ) Ukraynadakı nümayəndəliyində məlumat verilib.

Yeni YDK SOCAR-ın Odessa vilayətində sayca 11-ci, Ukraynada 43-cü yanacaqdoldurma kompleksidir.

Ümumi sahəsi 123,5 kvadratmetr olan yeni YDK-da üç ədəd ikitərəfli yanacaqpaylaşdırma kolonkası quraşdırılıb. Beləliklə, eyni vaxtda 6 avtomobilə yanacaq doldurmaq mümkündür. YDK-da Polşa, Litva və Belarusun aparıcı neftayırma zavodlarında istehsal edilmiş, “Avro-5” ekoloji standartına müvafiq neft məhsulları satılır. Bu məhsulların çeşidinə A-92, A-95 benzinləri, keyfiyyəti yaxşılaşdırılmış A-95 “Nano” benzini və “Nano” dizel yanacağı daxildir.

YDK müştərilərin müxtəlif ehtiyaclarını təmin etmək üçün pulsuz servis xidmətləri ilə fərqlənir. Buraya şinlərə hava vurulması, şüşəyuyan baka su əlavə edilməsi, parkovka, Wi-Fi, mobil telefonların batareyalarının doldurulması, WC, körpələri bələmək üçün stol kimi servislər daxildir.

Artıq ənənə üzrə yanacaqdoldurma kompleksində işləyən “BUTA Cafe”də ətirli qəhvə, təzə bişirilmiş paxlava və digər Azərbaycan şirniyyatları, müxtəlif sendviçlər təklif olunur.

Ödəniş nağd pul, bank və yanacaq kartları, habelə bonus kartları ilə həyata keçirilə bilər.

Xatırladaq ki, SOCAR (State oil company of Azerbaijan Republic) ARDNŞ-in brendidir. Ukraynada bu şirkəti ARDNŞ-in törəmə strukturu olan “Sokar Enerji Ukraina” MMC təmsil edir. Bu qurum premium sinfinə aid YDK şəbəkəsini inkişaf etdirir.

Hazırda Ukraynanın səkkiz vilayətində - Kiyev, Odessa, Lvov, Nikolayev, Rovno, Çerkassı, Xmelnits və Poltava vilayətlərində SOCAR brendi ilə 43 YDK işləyir.

Şirkət Polşa, Litva və Belarusun aparıcı neftayırma zavodlarında istehsal edilən, “Avro-4” və “Avro-5” ekoloji standartlarına uyğun neft məhsullarını idxal edir.

Zeynal Ağazadə

AZƏRTAC-ın xüsusi müxbiri

Kiyev