İQTİSADİYYAT
Taksi fəaliyyəti ilə məşğul olmaq istəyən fiziki şəxs vergi uçotuna dayanmalıdır
Bakı, 1 may, Ramiz Quliyev, AZƏRTAC
Taksi fəaliyyəti ilə məşğul olmaq istəyən fiziki şəxslər hara müraciət etməlidir və bununla bağlı prosedur qaydaları necədir?
Vergilər Nazirliyinin Media və Kommunikasiya Mərkəzindən AZƏRTAC-ın müxbirinin bu sualına cavab olaraq bildirilib ki, qeyd olunan fəaliyyət sahibkarlıq fəaliyyəti hesab edilir və fiziki şəxs yaşayış yeri üzrə vergi orqanına müraciət edərək vergi uçotuna alınmalıdır.
Vergi uçotuna alınma “Fiziki şəxsin vergi uçotu haqqında ərizəsi” və şəxsiyyəti təsdiq edən sənəd (Azərbaycan Respublikası vətəndaşları üçün şəxsiyyət vəsiqəsi) əsasında həyata keçirilir. Müraciət şəxsən və ya səlahiyyətli nümayəndə (notarial qaydada təsdiq edilmiş etibarnamə ilə) vasitəsilə vergi orqanına gəlməklə və ya poçt vasitəsilə edilir.
Həmçinin vergi orqanına gəlmədən elektron qaydada da vergi uçotuna dayanmaq mümkündür. Elektron qeydiyyat gücləndirilmiş elektron imza (o cümlədən “Asan imza”) əsasında İnternet Vergi İdarəsi portalı (www.e-taxes.gov.az) vasitəsilə aparılır.
Respublika daxilində sərnişin və yük daşımalarını həyata keçirən fiziki şəxs vergi uçotuna dayandıqdan sonra hər bir avtomobil nəqliyyatı vasitəsi üçün Nəqliyyat, Rabitə və Yüksək Texnologiyalar Nazirliyindən, Bakı şəhərinin inzibati ərazisində avtomobil nəqliyyatı ilə müntəzəm şəhərdaxili sərnişindaşıma və taksi minik avtomobilləri ilə sərnişindaşıma həyata keçirildikdə isə Bakı Nəqliyyat Agentliyindən təqvim ayının sonunadək öz istəklərinə uyğun olaraq növbəti ay, rüb, yarım il və ya il üçün ciddi hesabat blankı olan “Fərqlənmə nişanı” almalıdır.
“Fərqlənmə nişanı” olmadan avtomobil nəqliyyatı vasitələri ilə sərnişin və ya yükdaşınma xidmətinə görə 40 manat məbləğində maliyyə sanksiyası tətbiq edilir.