Masallı, 8 dekabr (AZƏRTAC). Azərbaycanda fəaliyyət göstərən turizm şirkətlərinin və kütləvi informasiya vasitələrinin nümayəndələrinin iştirakı ilə Salyan-Lənkəran-Masallı bölgələri istiqamətində “Cənub mirvarisi” adlı iki günlük infotur həyata keçirilir.

AZƏRTAC xəbər verir ki, Mədəniyyət və Turizm Nazirliyinin dəstəyi, “Vektor” turizm şirkətinin və Masallı rayonundakı “Viləş” mehmanxanasının təşkilatçılığı ilə keçirilən infoturda 24 turizm şirkətinin və 15-dək KİV-in nümayəndələri iştirak edirlər.

İnfoturun məqsədi ölkə rəhbərliyinin regionların sosial-iqtisadi inkişafı istiqamətində reallaşdırdığı tədbirlərin nəticəsi olaraq bölgələrdə yaradılan və müasir standartlara cavab verən, yerli və xarici turistlərə xidmət göstərən mehmanxana və ona bərabər tutulan yerləşdirmə obyektlərini, eləcə də turistlərin asudə vaxtlarının səmərəli təşkili üçün mövcud olan digər xidmət sahələrini turizm şirkətlərinə təqdim etməkdir.

Layihə çərçivəsində turizm potensialı ilə zəngin olan cənub bölgəsinin təbii, mədəni və tarixi irsini, həmçinin milli folklor nümunələrini turizm şirkətləri və media vasitəsilə bir daha tanıtmaq və təşviq etmək imkanı yaradılır.

“Azərbaycan Respublikasında 2010-2014-cü illərdə turizmin inkişafına dair Dövlət Proqramı”nın müvafiq bəndlərinin icrasını təmin edən bu layihə çərçivəsində infoturun iştirakçıları dekabrın 7-də Lənkərana gəlmişlər. Onlar Lənkəran şəhərinin mərkəzindəki Heydər Əliyev Mərkəzi, iki dəfə Sovet İttifaqı Qəhrəmanı Həzi Aslanovun adını daşıyan park, soyqırımı abidəsi, Gənclər Mərkəzi və yerli əhəmiyyətli memarlıq abidəsi olan XVIII əsrə aid Dairəvi qala ilə tanış olmuşlar.

Lənkəran şəhər mədəniyyət və turizm şöbəsinin əməkdaşı İlqar Əzimov bildirmişdir ki, Dairəvi qala abidəsinin inşasına 1748-ci ildə başlanmışdır. Sonralar bu qala Lənkəranın istehkam qalası, Azərbaycan çar Rusiyası tərəfindən işğal olunduqdan sonra isə həbsxana kimi istifadə edilmişdir. 2006-cı ildə abidə restavrasiya olunmuş, turizm nümayiş obyekti və Lənkəran dövlət rəsm qalereyası kimi yenidən fəaliyyətə başlamışdır.

Bildirilmişdir ki, bir tərəfdən dağ, digər tərəfdən isə dənizlə əhatə olunan Lənkəranın turizm baxımından olduqca əlverişli şəraiti vardır. Bu da rayonda həm dağ, həm də əyləncə turizminin inkişafı üçün münbit şərait yaradır. Eyni zamanda, Lənkəranda müalicəvi sular və bulaqlar mövcuddur ki, bu da müalicəvi turizmin imkanlarını artırır.

Lənkəranı ziyarət edən turistlərin sayı ildən-ilə artır. Cari ilin doqquz ayında rayona 14 mindən çox turist gəlmişdir.

Qeyd olunmuşdur ki, Lənkəran rayonunun ərazisində 87 tarixi mədəniyyət abidəsi vardır və onların təxminən yarısından çoxundan turizm obyekti kimi istifadə olunur.

Sonra infotur iştirakçıları “Hirkan” Milli Parkında olmuşlar.

Parkın elmi işlər üzrə direktor müavini Hacıağa Səfərov bildirmişdir ki, ümumi sahəsi 40358 hektar olan “Hirkan”da 40 heyvan, 60 balıq və 117 quş növü vardır.

Daha sonra iştirakçılar Masallı rayonuna gəlmişlər. Burada onlar rayon icra hakimiyyəti nümayəndələri və digər şəxslərlə görüşmüşlər.

Masallı Rayon İcra Hakimiyyəti başçısının müavini Nəsir Muxtarlı və Mədəniyyət və Turizm Nazirliyinin daxili turizmin inkişafı sektorunun müdiri Mahir Qəhrəmanov söyləmişlər ki, rayonda turizm obyektlərinin imkanlarının genişləndirilməsi, xarici və yerli turistlərin cəlb olunması istiqamətində bir sıra işlər görülür. Hazırda rayonda 30-a yaxın turizm obyekti fəaliyyət göstərir. 2012-ci ildə rayona təxminən 17 minədək turist səfər etmişdisə, bu il artıq onların sayı 21 minə çatmışdır.

Bildirilmişdir ki, nəzərdə tutulan tədbirlərin ardıcıl şəkildə yerinə yetirilməsi turistlərin sayının artmasına şərait yaratmışdır. Turistlərin Masallıya diqqətini artırmaq üçün folklor festivalı, turizm sərgiləri keçirilir.

Sonda infoturda iştirak edən media və turizm şirkətlərinin nümayəndələrinə sertifikatlar verilmiş, bölgənin milli mətbəx və folklor rəqs nümunələri təqdim edilmişdir.