Tərtər, 12 dekabr, Tahir Ağaməmmədov, AZƏRTAC

Xalqımızın ümummilli lideri, böyük siyasi xadim Heydər Əliyevin əziz xatirəsi Qarabağ bölgəsində dərin ehtiramla yad edilib.

AZƏRTAC-ın bölgə müxbiri xəbər verir ki, dekabrın 12-də Ümummilli Liderin Tərtər şəhərinin mərkəzi meydanındakı abidəsini minlərlə insan ziyarət edib. Tərtərlilər dahi rəhbər Heydər Əliyevin abidəsi önünə gül-çiçək dəstələri düzərək, xatirəsini ehtiramla anıblar.

Mərasim iştirakçıları sonra Heydər Əliyev Mərkəzinə gələrək, Ulu Öndərin zəngin həyatını və siyasi fəaliyyətini əks etdirən eksponatlarla tanış olublar.

Burada keçirilən tədbirdə rayon icra hakimiyyətinin başçısı Müstəqim Məmmədov çıxış edərək, xalqımızın böyük oğlu Heydər Əliyevin zəngin həyat və fəaliyyətindən, ölkəyə rəhbərlik etdiyi hər iki dövrdə gördüyü işlərdən danışıb. Bildirib ki, Azərbaycanın ən yeni tarixinin bütöv bir qərinəsi Heydər Əliyevin adı ilə bağlıdır. “Azərbaycan tarixinin Heydər Əliyev mərhələsi” kimi qiymətləndirilən bu dövrdə Ulu Öndərimiz tərəfindən görülən böyük işlərin nəticəsidir ki, bu gün xalqımız demokratik və hüquqi bir dövlətdə yaşamaq imkanı əldə edib. Ulu Öndərin müdrik və məqsədyönlü siyasəti nəticəsində ölkəmizdə ictimai-siyasi sabitlik bərqərar olub, hüquqi, demokratik dövlət quruculuğu, Milli Ordunun formalaşması, Azərbaycanın beynəlxalq aləmdə demokratik imicinin yüksəlməsi istiqamətində önəmli addımlar atılıb.

Tədbirin sonunda Ümummilli Liderin həyat və fəaliyyətindən bəhs edən film nümayiş etdirilib.

X   X   X

Xalqımızın böyük oğlu, ümummilli lider Heydər Əliyevin əziz xatirəsi Ağdam rayonunda da dərin hörmət və ehtiramla anılıb. Ümummilli Liderin Quzanlı qəsəbəsindəki abidəsi minlərlə insanın ziyarətgahına çevrilib.  

Ağdamlılar dahi şəxsiyyətin abidəsini ziyarət edərək, önünə əklil və gül dəstələri düzüblər. Mərasimə gələnlər - YAP rayon təşkilatının fəalları, hüquq mühafizə orqanlarının əməkdaşları, əmək kollektivləri, ziyalılar, ağsaqqallar, veteranlar, gənclər, rayon ictimaiyyətinin nümayəndələri dahi şəxsiyyətə sonsuz sevgi və ehtiramlarını bildiriblər.

X   X   X

Ulu öndər Heydər Əliyevin əziz xatirəsi ağcabədililər tərəfindən də daim uca tutulur.

Dekabrın 12-də səhər saatlarından başlayaraq minlərlə ağcabədili dahi şəxsiyyətin Ağcabədi şəhərinin mərkəzi meydanındakı abidəsini ziyarət edib, önünə gül dəstələri düzüblər. Ümummilli Liderin əziz xatirəsi bir dəqiqəlik sükutla yad edilib, ruhuna dualar oxunub.

Rayon rəhbərliyi, ictimaiyyət nümayəndələri, ziyalılar, ağsaqqallar, gənclər Heydər Əliyev Mərkəzində Ulu Öndərin zəngin həyatını və siyasi fəaliyyətini əks etdirən eksponatlarla tanış olublar. Məktəblilərin Ulu Öndərə həsr etdikləri kompozisiya göstərilib.

X    X   X

Ümummilli lider Heydər Əliyevin vəfatının 14-cü ildönümü ilə əlaqədar Füzuli rayonunun idarə, müəssisə və təşkilatlarında silsilə anım tədbirləri keçirilib.

Dekabrın 12-də rayon rəhbərliyi, hüquq mühafizə orqanlarının əməkdaşları, əmək kollektivləri, ağsaqqallar, gənclər, N saylı hərbi hissənin zabit və əsgərləri əllərində gül-çiçək dəstələri Horadiz şəhərində Ulu Öndərin abidəsini ziyarət edərək, xatirəsinə hörmət və ehtiramlarını bildiriblər.

Füzuli Rayon İcra Hakimiyyətinin başçısı Alı Alıyev anım mərasimində çıxış edərək ümummilli lider Heydər Əliyevin Vətən və xalq qarşısındakı xidmətlərindən danışıb. Bildirib ki, ulu öndər Heydər Əliyevin müstəqilliyimizin və dövlətçiliyimizin möhkəmlənməsində xidmətləri əvəzsizdir. On dörd il öncə əbədiyyətə qovuşan Heydər Əliyevin əziz xatirəsi xalqımızın qəlbində daim yaşayacaq, heç vaxt yaddaşlardan silinməyəcək. Diqqətə çatdırılıb ki, Heydər Əliyevin ideya və arzuları bu gün Prezident İlham Əliyev tərəfindən uğurla həyata keçirilir.

X   X   X

Xalqımızın dahi oğlu Heydər Əliyevin xatirəsi bərdəlilər tərəfindən də daim uca tutulur. Dahi rəhbər hakimiyyətdə olduğu illərdə 14 dəfə Bərdəyə səfər edib, bu torpağın qədirbilən insanları ilə görüşüb. Bu tarixi səfərlərin hər biri rayonun sosial-iqtisadi və ictimai-siyasi həyatında dərin izlər qoyub.

Bərdəlilər ümummilli lider Heydər Əliyevin fədakar xidmətlərini heç zaman unutmur, bu dahi insanın ruhuna sonsuz ehtiram nümayiş etdirirlər. Ulu öndər Heydər Əliyevin vəfatının 14-cü ildönümü ilə bağlı rayon rəhbərliyi, YAP rayon təşkilatının fəalları, hüquq mühafizə orqanlarının əməkdaşları, ziyalılar, ağsaqqallar, veteranlar, gənclər, rayon ictimaiyyətinin nümayəndələri Ulu Öndərin abidəsi önünə əklil və tər çiçəklər qoyaraq, əziz xatirəsini hörmətlə yad ediblər.

Mərasim iştirakçıları sonra Heydər Əliyev Mərkəzində Ümummilli Liderin zəngin həyatını və siyasi fəaliyyətini əks etdirən eksponatlarla tanış olublar.

Rayon icra hakimiyyətinin akt zalında keçirilən tədbirdə çıxış edənlər ulu öndər Heydər Əliyevin həyat və fəaliyyətinin müəyyən məqamlarından bəhs edib, xilaskarlıq missiyasından, xalqımız qarşısında böyük xidmətlərindən danışıblar.

Sonda məktəblilərin ifasında kompozisiya nümayiş olunub.

X    X   X

Ümummilli lider Heydər Əliyevin vəfatının 14-cü ildönümü xocavəndli məcburi köçkünlər tərəfindən də ehtiramla yad edilib, silsilə tədbirlər keçirilib.

Ulu Öndərin anım günü ilə əlaqədar Xocavənd Rayon İcra Hakimiyyəti tərəfindən rayon məktəblilərinin Beyləqan Rayon Heydər Əliyev Mərkəzinə ekskursiyası təşkil olunub. Şagirdlər Azərbaycan xalqının ümummilli lideri Heydər Əliyevin həyat və fəaliyyəti, zəngin irsi barədə məlumat alıb, Mərkəzdə nümayiş etdirilən sərgilərlə tanış olublar. Ümummilli Liderin dövlət müstəqilliyimizin qorunub saxlanmasında, dövlətçiliyimizin möhkəmləndirilməsində, daxili və xarici siyasətin xalqın mənafeyinə uyğun qurulmasında, iqtisadi, sosial və mədəni sahələrdə inkişafın təmin edilməsində, azərbaycançılıq məfkurəsinin milli ideologiyaya çevrilməsində göstərdiyi böyük xidmətlər barədə şagirdlərə ətraflı məlumat verilib. Sonra “Heydər Əliyev – Azərbaycan: dünən, bu gün və sabah” mövzusunda “dəyirmi masa” keçirilib.

Dekabrın 12-də Beyləqan rayonu ərazisində xocavəndli məcburi köçkünlər üçün salınmış Xocavənd qəsəbəsində ulu öndər Heydər Əliyevin vəfatının 14-cu ildönümü ilə bağlı ümumrayon anım mərasimi olub. Xocavəndli məcburi köçkünlər Ulu Öndərin rayon icra hakimiyyətinin binası qarşısındakı büstü önünə əklil və gül dəstələri düzərək xatirəsinə hörmət və ehtiramlarını bildiriblər.

X   X   X

Beyləqan rayon ictimaiyyətinin nümayəndələri, əmək kollektivləri, N saylı hərbi hissənin əsgər və zabitləri Ümummilli Liderin vəfatının 14-cü ildönümü ilə əlaqədar Heydər Əliyev Mərkəzinə gələrək, dahi rəhbərin burada ucaldılmış abidəsi önünə tər çiçəklər düzüblər.

Rayon rəhbərliyi və ictimaiyyət nümayəndələri Heydər Əliyev Mərkəzində Ulu Öndərin zəngin həyatını və siyasi fəaliyyətini əks etdirən eksponatlarla tanış olublar. Mərkəzin akt zalında keçirilən tədbirdə rayon icra hakimiyyətinin başçısı Vaqif Abdullayev çıxış edərək Ulu Öndərin həyat və fəaliyyətinin müxtəlif dövrlərindən, görkəmli dövlət xadimi, dünya şöhrətli siyasətçi Heydər Əliyevin xalqımız və dövlətçiliyimiz qarşısındakı əvəzsiz tarixi xidmətlərindən, xilaskarlıq missiyasından danışıb.