Moskva, 24 fevral, AZƏRTAC

Moskva vilayətinin Domodedovo şəhərindəki A.Axmatova adına mərkəzi kitabxanada Vətənin Müdafiəçisi Gününə həsr edilmiş təntənəli tədbir keçirilib.

Tədbir Ümumrusiya Azərbaycanlılar Konqresinin (ÜAK) Moskva vilayəti üzrə icraçı direktoru Araz Mürsəliyevin, “Rusiya Federasiyası Xüsusi Risk Bölmələrinin Veteranları Komitəsi” ictimai-dövlət təşkilatının və A.Axmatova adına mərkəzi kitabxananın rəhbərliyinin təşəbbüsü ilə keçirilib.

“Rusiya Federasiyası Xüsusi Risk Bölmələrinin Veteranları Komitəsi” ictimai-dövlət təşkilatının Moskva vilayət bölməsi şurasının sədri Anatoli Çerzarov tədbiri açaraq Böyük Vətən müharibəsi veteranlarını təbrik edib. O, ÜAK-ın Moskva vilayəti üzrə icraçı direktoru Araz Mürsəliyevə “Fəal hərbi-vətənpərvərlik işinə görə” medalı, “Veteranların hüquq və mənafelərinin müdafiəsinə yönəlmiş təmənnasız ictimai fəaliyyətinə, fəal vətəndaşlıq və həyat mövqeyinə, böyüməkdə olan nəslin vətənpərvərlik tərbiyəsinə böyük şəxsi töhfəsinə görə” təşəkkürnamə və “Domodedovo diyarının tarixi şəxslərdə” adlı xatirə kitabını təqdim edib.

Araz Mürsəliyev öz çıxışında vurğulayıb ki, Rusiya ilə Azərbaycanın dostluq və qardaşlıq əlaqələrinin 200 ildən çox tarixi var. Çar ordusunun ordenləri ilə təltif edilmiş azərbaycanlı zabitlər –Rusiyanın Port-Artur qalasının müdafiəçiləri, 1904-1905-ci illərdə rus-yapon müharibəsinin və Birinci Dünya müharibəsinin iştirakçıları olmuş Səməd bəy Mehmandarov, Əlağa Şıxlinski, Hüseyn xan Naxçıvanski, Əbülfət Şahtaxtinski, İlyas bəy Ağalarov, generallar Teymur bəy Novruzov, Əmir Kazım Qacar, Əminulla xan Qacar Rusiyada heç vaxt unudulmayacaq və həmişə minnətdarlıqla yad ediləcəklər. Bakıxanovlar, Vəkilovlar, Cavanşirovlar, Kəngərlinskilər, Yadigarovlar, Novruzovlar, Qacarlar və digər Azərbaycan sülalələrinin bir neçə nəslinin nümayəndələrini, Böyük Vətən müharibəsi dövründə həlak olmuş 300 min azərbaycanlını, Sovet İttifaqı Qəhrəmanı, Novqorod yaxınlığındakı Pustınka kəndi ətrafında öz dəstəsi ilə birlikdə döyüşə qoşularaq qeyri-bərabər savaşda düşmənin dörd hücumunu dəf etmiş, sonra əlbəyaxa döyüşdə öz mövqeyini əldə saxlamış İsrafil Məmmədovun, Leninqrad ətrafındakı döyüşlərdə ölümcül yaralanmış vəziyyətdə düşmənin iki təyyarəsini vurmuş Hüseynbala Əliyevin, iki dəfə Sovet İttifaqı Qəhrəmanı, 35-ci tank briqadasının komandiri, qvardiya general-mayoru, Stalinqrad uğrunda döyüşlərdə birinci qəhrəman ulduzu almış Həzi Aslanovun, milliyyətcə azərbaycanlı olan daha 44 Sovet İttifaqı Qəhrəmanının, Azərbaycanda doğulmuş, müxtəlif millətlərə mənsub olan 128 Sovet İttifaqı Qəhrəmanının, Berlinə birincilər sırasında daxil olmuş, Azərbaycanda formalaşdırılmış və şəxsi heyətinin 90 faizi azərbaycanlılardan ibarət olan 416-cı və 402-ci atıcı diviziyaların əsgər və zabitlərinin adları unudulmayacaq. A.Mürsəliyev Vətənin Müdafiəçisi Günü münasibətilə bütün veteranları ürəkdən təbrik edib, onlara möhkəm cansağlığı və uzun ömür arzulayıb.

Canlı əfsanələr olan veteranlar Böyük Vətən müharibəsi illərində əsgər və zabitlərin göstərdiyi şücaətlər haqqında xatirələrini bölüşüblər.

Domodedovo şəhərinin gənc istedadları müharibə illərinə aid melodiya və mahnıları səsləndirib, Vətənin müdafiəçilərinin cəsarəti və mərdliyi haqqında şeirlər söyləyiblər.

Fəridə Abdullayeva

AZƏRTAC-ın xüsusi müxbiri

Moskva