UNİBANK “UNİTRAİNİNG” TƏDRİS LAYİHƏSİNİ TƏQDİM ETMİŞDİR
Unibank kommersiya bankı “Unitraining” layihəsi çərçivəsində korporativ treninq mərkəzinin açıldığını elan etmişdir.
Bankın meneceri Məlahət Abdullayeva demişdir: “Unitraining” layihəsi - daxili təlim sistemidir. O, həm bankın sıravi əməkdaşlarının, həm də bütün rəhbər işçilərin peşəkarlıq səviyyəsinin artırılması üçün nəzərdə tutulmuşdur”.
Mərkəzin əsas məqsədi şöbə rəhbərlərinə biznes məqsədlərinə nail olmaqda kömək edəcək rahat və çevik təlim resursu yaratmaqdır. “Unitraining” layihəsi çərçivəsində tətbiq ediləcək təlim sistemləri və metodları Bankın korporativ inkişaf strategiyasını tam əks etdirəcəkdir. Mərkəzin yaradılması üçün Bank özünün R.Behbudov küçəsi, 65 ünvanında yerləşən 17 saylı filialında zəruri avadanlıqlarla təchiz edilmiş yer ayırmışdır. Mərkəzdə naqilsiz Wi-Fi şəbəkəsi fəaliyyət göstərir, bütün iş yerləri fərdi kompyuterlə təchiz olunmuşdur.
Bu layihənin həyata keçirilməsi hesabına ali və orta səviyyəli rəhbər işçilərin kompleks şəkildə təlim keçməsi yolu ilə Bankın fəaliyyətinin səmərəsini artırmaq, bankı müvafiq dəyişikliklərə hazırlamaq, əməkdaşları yeniliklərin tərəfdarlarına və fəal iştirakçılarına çevirmək, fasiləsiz inkişafı stimullaşdırmaq nəzərdə tutulur.
Layihənin əlaqələndiricisi Sevinc Əliyeva demişdir ki, “Unitraining” layihəsi çərçivəsində təlim əsasən iki istiqamətdə keçiriləcəkdir: yeni əməkdaşlar üçün nəzərdə tutulmuş adaptiv təlim və artıq fəaliyyətdə olan işçilər üçün ixtisaslaşdırılmış təlim.
Adaptiv təlim proqramı yeni əməkdaşlarda “Unibank”ın strukturu, onun norma və dəyərlər sistemi, texnoloji və korporativ xüsusiyyətləri haqqında biliklərin formalaşdırılmasına yönəldiləcəkdir. İxtisaslaşdırılmış təlim isə Bank işinin spesifikasını, əməkdaşların peşəkar inkişafını, menecmenti, biznes texnologiyasını və başqa məsələləri əhatə edəcəkdir.
Təlimin əsasən daxili ehtiyatlar hesabına həyata keçirilməsi nəzərdə tutulur. Buna görə də korporativ təlim çərçivəsində Bankın öz məşqçilərinin hazırlanması proqramının da həyata keçirilməsi nəzərdə tutulur.
