XƏTAİ RAYONUNDA NÖVBƏTİ İMƏCİLİK KEÇİRİLMİŞDİR
AZƏRTAC xəbər verir ki, Xətai rayonunda ümummilli lider Heydər Əliyevin 85 illik yubileyi ilə əlaqədar hər şənbə və bazar günləri iməciliklər keçirilir. Mayın 10-dək davam edəcək iməciliklərdə 15 minə qədər ağac və gül kolu əkiləcək, park və xiyabanlarda yaşıllıqlara qulluq ediləcək, təmizlik və səliqə-səhman işləri görüləcəkdir.
Aprelin 19-da Ukrayna dairəsində, Heydər Əliyev parkında, Nobel qardaşları prospektində, General Şıxlinski küçəsində və digər ərazilərdə üç minə yaxın sakinin iştirakı ilə keçirilən növbəti iməcilik öz mütəşəkkilliyi ilə fərqlənmiş, 5 min ağac və gül kolu əkilmişdir. Bu dəfə də ən çox həmişəyaşıl ağacların əkilməsinə üstünlük verilmişdir.
“Azərneftyağ” neft emalı zavodunun, Neft Kəmərləri İdarəsinin, metalkonstruksiya zavodunun, radioquraşdırma idarəsinin, mərkəzi telefon qovşağının, Azərbaycan Respublikası Dövlət Neft Şirkətinin marketinq və iqtisadi əməliyyatlar idarəsinin, təhsil və səhiyyə ocaqlarının kollektivlərinin iştirak etdiyi iməcilikdə ağacların dibləri yumuşaldılmış, gövdələri rənglənmiş, ətraf ərazilər abadlaşdırılmışdır.
Ekologiyanın sağlamlaşdırılması, təbiətin qorunması istiqamətində respublikada misilsiz işlər görmüş böyük öndərin yubileyi ilə bağlı Xətai rayonunda iməciliklər davam etdiriləcəkdir. Növbəti iməciliklərdə ağac əkmək üçün indidən yerlər müəyyənləşdirilmiş, hazırlıq işləri görülmüşdür.
######
Bölmənin digər xəbərləri
