Zelenski və Ərdoğan İstanbul görüşünün detallarını müzakirə ediblər
Kiyev, 12 may, AZƏRTAC
Ukrayna Prezidenti Volodimir Zelenski türkiyəli həmkarı Rəcəb Tayyib Ərdoğanla danışıb. Onlar Ukrayna və Rusiya arasında gələcək danışıqları müzakirə ediblər.
AZƏRTAC xəbər verir ki, bu barədə Zelenski teleqram səhifəsində məlumat verib.
Zelenskinin sözlərinə görə, onlar Ukrayna və Rusiya arasında Türkiyədə keçiriləcək görüşün əsas detallarını müzakirə ediblər. O, diplomatiyanın inkişafı üçün ən yüksək səviyyədə dəstəyə və istəyinə görə Ərdoğana minnətdarlığını bildirib.
Ukrayna Prezidenti qeyd edib ki, hazırda atəşkəs zərurəti vacibdir. Tərəfdaşların atəşkəs rejiminə nəzarəti təmin etməsi də lazımdır.
"Biz Putinlə birbaşa danışıqlara hazırıq. Uzunmüddətli təhlükəsizliyin təmin edilməsi üçün hamımızın Avropada birgə çalışmağımız çox vacibdir. Amerika ilə daimi təmasda olacağıq. Prezident Ərdoğanla sülh naminə gələcək birgə iş haqqında razılığa gəldik", - deyə Zelenski bildirib.
Qeyd edək ki, mayın 15-də İstanbulda Ukrayna və Rusiya prezidentlərinin rəhbərliyi ilə iki ölkənin nümayəndə heyətinin görüşünün keçiriləcəyi gözlənilir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
