REGİONLAR
“Azexport” şimal bölgəsinin sahibkarlarına təqdim olunub VİDEO
Xaçmaz, 11 mart, Elxan Yusifli, AZƏRTAC
Martın 11-də “Azexport” Xaçmaz şəhərində şimal bölgəsindən olan sahibkarlara təqdim olunub.
AZƏRTAC xəbər verir ki, Xaçmaz Rayon Tarix-Diyarşünaslıq Muzeyində keçirilən tədbirə Quba, Qusar, Siyəzən və Şabrandan olan 100-dən çox iş adamı qatılıb.
“Azexport.az” portalının rəhbəri Zaur Qardaşov portalın funksionallığı, Azərbaycan istehsalçıları barədə vahid məlumat bazasının işləmə prinsipi barədə danışıb. Bununla yanaşı, sahibkarlara portalın ixracatçılara təklif etdiyi əlavə imkanlardan bəhs edilib, həmçinin “Azexport.az”a inteqrasiya olunmuş milli və beynəlxalq ödəniş sistemləri, nəqliyyat və logistika xidmətləri, real rejimdə tərcümə xidməti və Azərbaycan məhsullarının beynəlxalq ticarət platformalarında yerləşdirmə imkanları barədə geniş məlumat verilib.
Bildirilib ki, “Azexport” təchizat zənciri üzrə bütün xidmətlərə - sertifikatlaşdırma, nəqliyyat, logistika, bazarlara çıxış, ödəmə imkanları yaradır. Prezident İlham Əliyevin Fərmanı ilə yaradılan Rəqəmsal Ticarət Qovşağı vahid ixrac pəncərəsini təqdim edəcək. Bununla da sahibkarlarımız daha az resurs sərf etməklə ixrac prosedurlarını daha sürətlə həyata keçirəcəklər. Rəqəmsal Ticarət Qovşağı həm də elektron pul kisəsi və elektron imzaların qarşılıqlı tanınmasını təmin etməklə sahibkarlarımızın xarici partnyorlarla əlaqələrini daha da asanlaşdıracaq. Rəqəmsal Ticarət Qovşağı həm online, həm də offline qaydada xidmət göstərəcək.
Görüşdə “Azexport” portalı üzərindən sifariş alan sahibkarlar da çıxış ediblər.
Xaçmazda keçirilən tədbir iqtisadi rayonlarda iş adamları ilə keçirilən altıncı görüşdür. İndiyədək portalın Şəki, Şamaxı, Gəncə, Yevlax, Lənkəranda sahibkarlarla görüşü olub.
“Azexport.az” portalına Yaponiya, Niderland, Çin, Rusiya, Gürcüstan, Misir, Belarus, Pakistan və digər ölkələrdən olmaqla, əsasən şərab, toyuq əti, yumurta, müxtəlif şirələr, quru süd, mineral sular, alma, viski və digər məhsullara dair sifarişlər gəlir. Sahibkarların tam məlumatlılığını təmin etmək, onların problemlərini dinləyib müzakirə etmək üçün "Azexport" komandası indiyə qədər Bakının rayonlarında və bölgələrdə minlərlə sahibkarla görüş keçirib.
Növbəti belə görüş martın 18-də İmişli şəhərində Aran iqtisadi zonasının sahibkarları ilə olacaq.