REGİONLAR


Astaranın dağlıq ərazisində yerləşən kəndlərdə infrastruktur layihələri uğurla icra olunur

Astara, 14 dekabr, Bağır Əliyev, AZƏRTAC

Astara rayonunun dağlıq ərazisində minlərlə insanın yaşadığı kəndləri əhatə edən Deqədi-Pəlikəş, Taxtanakəran-Toradi avtomobil yolundan sonra, mürəkkəb relyefə malik Miki kəndinə asfalt yolun çəkilməsi Azərbaycan Prezidentinin təkcə şəhər və qəsəbələrin deyil, ucqar kəndlərin də sosial problemlərinin həllini daim diqqətdə saxlamasının bariz nümunəsidir.

AZƏRTAC-ın bölgə müxbiri xəbər verir ki, bu fikir dekabrın 14-də Astara Rayon İcra Hakimiyyətinin başçısı Qəzənfər Ağayevin Siyaku inzibati ərazi dairəsi üzrə nümayəndəliyinin Miki kəndində əhali ilə görüşündə səsləndirilib.

Prezident İlham Əliyevin müvafiq Sərəncamı ilə ayrılan vəsait hesabına Taxtanakəran-Miki avtomobil yolunun asfaltlaşdırılmasının başa çatdırılmasını kəndin tarixində mühüm hadisə olduğunu qeyd edən Qəzənfər Ağayev sakinləri əlamətdar hadisə münasibətilə təbrik edib.

Qeyd olunub ki, uzunluğu 4,5 kilometr olan Taxtanakəran-Miki avtomobil yolundan Taxtanakəran, Vaqadi, Lobır, Qanqalaş, Qalaparqo və Miki kəndlərinin 1500-dən çox sakini istifadə edəcək. Kəndə rahat asfalt yolun çəkilməsi burada yaşayan əhalinin böyük sevincinə və ruh yüksəkliyinə səbəb olub.

Kənd sakinləri Şahyar Hüseynov, Arif Nəzərov, Şahmirzə Nəsirov, Əlikram Salayev, Gülxanım Hüseynova və başqaları bu mühüm sosial layihənin həyata keçirilməsinə görə dövlətimizin başçısına minnətdarlıqlarını bildiriblər.

Rayon icra hakimiyyətinin başçısı Qəzənfər Ağayev Prezident İlham Əliyevin rəhbərliyi ilə ölkəmizdə aparılan geniş abadlıq və quruculuq işləri, həyata keçirilən beynəlxalq və respublika əhəmiyyətli layihələr barədə ətraflı məlumat verib. Bildirilib ki, ölkəmiz iqtisadi cəhətdən gücləndikcə təkcə yol infrastrukturu deyil, yeni məktəblərin, xəstəxana və idman obyektlərinin tikintisi, içməli su, qazlaşdırma, elektrik enerjisi ilə təminatla bağlı layihələr də uğurla icra olunur.

Son illər Astara rayonunda 40-dan çox, təkcə Siyaku inzibati ərazi dairəsi üzrə nümayəndəlikdə isə 6 yeni məktəb binasının tikildiyini vurğulayan Qəzənfər Ağayev hazırda Astara şəhərinə içməli su xəttinin çəkilməsi, park-bulvar ərazisinin genişləndirilməsi istiqamətində işlərin sürətlə davam etdirildiyini bildirib.

Rayonda aqrar sektorun inkişaf etdirilməsi istiqamətində də mühüm işlər görülür. Prezidentin diqqət və qayğısı nəticəsində sitrusçuluq, çayçılıq, çəltikçilik və tərəvəzçiliyin inkişafında böyük irəliləyişlərin olduğunu qeyd edən icra hakimiyyətinin başçısı gələcəkdə də bu istiqamətdə fəaliyyətin genişləndiriləcəyini, ölkədə ərzaq bolluğunun yaradılmasına, əhalinin məşğulluğunun təmin edilməsinə, sosial rifahın yaxşılaşdırılmasına səy göstəriləcəyini diqqətə çatdırıb.

Vurğulanıb ki, yeni avtomobil yolunun istifadəyə verilməsi ilə bu ərazidə yerləşən bütün kəndlərin inkişafına əlverişli şərait yaranacaq. Gözəl təbiətə malik olan bu kəndlərdə istirahət yerlərinin, turizm obyektlərinin tikintisi ilə əraziyə turistlərin, xarici qonaqların marağı artacaq.

Görüşdən sonra Qəzənfər Ağayev Miki kənd tam orta məktəbində dərs prosesi və təhsil ocağında yaradılan şəraitlə maraqlanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.