MƏDƏNİYYƏT


Portuqaliyalı rejissorun filmi 2020-ci ilin “Oskar” mükafatına namizəddir

Lissabon, 11 sentyabr, AZƏRTAC

Portuqaliyalı rejissor Tyaqu Gedeşin “Malikanə” filmi 2020-ci ildə “Ən yaxşı əcnəbi film” nominasiyasında “Oskar” mükafatına namizəd irəli sürülüb.

AZƏRTAC Portuqaliya Kino Akademiyasına (APC) istinadla xəbər verir ki, filmin dünya premyerası 76-cı Venesiya kinofestivalının rəsmi müsabiqəsində olub. Tyaqu Gedeş ən yaxşı rejissor işinə görə müstəqil tənqidçi “Bisato d`Oro” mükafatına layiq görülüb.

Filmin Portuqaliyada premyerası sentyabrın 19-da nəzərdə tutulub.

“Malikanə” filmi Teju çayının cənub sahilində Avropada ən iri malikanələrdən birinin sahibi olan ailə barədə saqadır. Filmdə ötən əsrin 1940-cı illərində Portuqaliyanın tarixi, siyasi, sosial və maliyyə həyatından söhbət açılır.

APC-nin prezidenti Paulo Trankozonun sözlərinə görə, bu il milli kino istehsalı kinozallara təqribən 490 min tamaşaçı gətirib ki, bu da 2018-ci ilin eyni dövrü ərzində 145 min tamaşaçı ilə müqayisədə nəzərəçarpan artımdır.

Qeyd edək ki, 92-ci “Oskar” mükafatının təqdimat mərasimi 2020-ci il fevralın 9-da Los-Ancelesdəki “Dolby” teatrında olacaq. Amerika Kino Akademiyası 24 nominasiyada mükafatlar təqdim edəcək.

APC Tyaqu Gedeşin filmini, həmçinin “Ən yaxşı İberiya-Amerika filmləri” kateqoriyasında İspaniyanın “Qoya” mükafatına namizəd irəli sürüb. “Qoya” mükafatının təqdimat mərasimi 2020-ci il yanvarın 25-də Malaqada keçiriləcək.

Nigar Cəfərli

AZƏRTAC-ın xüsusi müxbiri

Lissabon

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.