SİYASƏT
2020-ci il Azərbaycan üçün istər siyasi, istər diplomatiya, istərsə də digər sahələr üzrə uğurlarla yadda qaldı
Bakı, 2 yanvar, AZƏRTAC
Artıq arxada qoyduğumuz 2020-ci il dünya ölkələri üçün bir sıra çətinliklərlə, o cümlədən yeni növ koronavirus (COVID-19) infeksiyası ilə mübarizə ilə yadda qaldı. Qlobal bəlaya çevrilən COVID-19 ötən il demək olar ki, əksər ölkələrin həyatını iflic etdi. Lakin bir sıra ölkələrdən fərqli olaraq Azərbaycan COVID-19-a qarşı mübarizədə müsbət mənada fərqləndi. Ölkəmizin bundan əvvəlki məsələlərdə olduğu kimi, bu məsələyə yanaşmada da həyata keçirdiyi uğurlu, düşünülmüş siyasət, həmçinin ötən illər ərzində iqtisadi sahədə əldə edilən uğurlar öz müsbət nəticəsini verdi. Beləliklə, COVID-19-un ölkəmizdə qeydə alındığı ilk günlərdən Azərbaycan hökuməti yaranmış vəziyyətdən minimum itkilərlə çıxmaq, o cümlədən insanların sağlamlığını qorumaq, onların sosial müdafiəsini təmin etmək üçün zəruri tədbirlər gördü. Eyni zamanda, Azərbaycan pandemiyaya qarşı beynəlxalq həmrəyliyin güclənməsinə sanballı töhfələr verdi ki, bu da ötən il ərzində ölkəmizin əldə etdiyi uğur kimi dəyərləndirilməlidir.
Bunu AZƏRTAC-a açıqlamasında Milli Məclisin deputatı Vüqar İskəndərov deyib.
Ümumiyyətlə, 2020-ci ilin Azərbaycan üçün istər siyasi, istər diplomatiya, istərsə də digər sahələr üzrə uğurlarla yadda qaldığını qeyd edən deputat bildirib: “Ötən ilin ən mühüm uğuru isə sentyabrın 27-dən noyabrın 10-dək davam edən 44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə qazanılan şanlı Qələbədir. Bu şanlı Qələbə nəticəsində torpaqlarımız Ermənistanın işğalından azad olundu və 30 ilə yaxın davam edən Qarabağ münaqişəsinə son qoyuldu. Məhz buna görə 2020-ci il Azərbaycanın tarixində Zəfər ili kimi qalacaq”.
V.İskəndərov vurğulayıb ki, Azərbaycan uzun illər bu münaqişənin sülh yolu ilə həllinə nail olmaq üçün səylər göstərib. Lakin Ermənistanın ötən müddət ərzində işğalçılıq siyasətindən əl çəkməməsi, son illərdə isə bu ölkənin rəsmilərinin yeni ərazilər tutmaq iddialarını açıq şəkildə dilə gətirmələri, tez-tez təhrikedici açıqlamalar vermələri, 2019-cu ildə baş nazir Nikol Paşinyanın “Qarabağ Ermənistandır və nöqtə” ifadəsi kimi təxribat xarakterli bəyanatları və addımları danışıqlar prosesinə ciddi zərbə vurdu. Eyni zamanda, 2020-ci ildə qondarma rejimdə “seçkilər” keçirildi və qondarma rejimin “başçısı”nın inauqurasiya mərasimi də Şuşada təşkil olundu. Bundan əlavə, elan edildi ki, qondarma “parlament” Şuşaya köçürüləcək. Lakin bu da son deyildi. Ermənistan tərəfindən işğal olunmuş ərazilərdə aparılan qanunsuz məskunlaşdırma siyasəti, təcavüzkar ölkənin təcavüzkar və hücum xarakterli hərbi doktrina və milli təhlükəsizlik strategiyası qəbul etməsi, həmçinin iyul və avqust aylarında ardıcıl olaraq Azərbaycan qarşı hərbi təxribatlara əl atması onun yeni müharibəyə başlayacağını bütün çılpaqlığı ilə ortaya qoydu.
“Azərbaycan Prezidenti beynəlxalq birliyi Ermənistanın əməlləri barədə vaxtaşırı məlumatlandırırdı. Fevralın 15-də keçirilmiş Münhen Təhlükəsizlik Konfransı çərçivəsində Paşinyanla debatda Prezident İlham Əliyev tarixi və hüquqi arqumentlərə əsaslanaraq Ermənistanın mövqeyini darmadağın etdi və Paşinyanı dünya ictimaiyyətinin gözü qarşısında məğlubiyyətə uğratdı. Eyni zamanda, iyunun 18-də Prezident İlham Əliyev Şərq Tərəfdaşlığı ölkələrinin videokonfrans formatında sammitində çıxışı zamanı Ermənistanın danışıqların mahiyyətini və formatını məhv etməsi məsələsini qabartdı.
Azərbaycan Prezidenti İlham Əliyev sentyabrın 24-də BMT Baş Assambleyasının 75-ci sessiyasında beynəlxalq ictimaiyyəti Ermənistanın yeni müharibəyə hazırlaşması barədə xəbərdar etdi və bunun qarşısını almağa çağırdı. Beynəlxalq birliyin susqunluğundan daha da ürəklənən işğalçı Ermənistan isə yenə dayanmadı və sentyabrın 27-də qoşunların təmas xəttində daha genişmiqyaslı təxribata əl atdı. Lakin bu işğalçı ölkə üçün darmadağın və kapitulyasiya ilə nəticələndi. Belə ki, işğalçı dövlətin ölkəmizə qarşı törətdiyi hərbi təcavüzə cavab olaraq Azərbaycanın Silahlı Qüvvələri Prezident, Ali Baş Komandan İlham Əliyevin göstərişi ilə əks-hücum əməliyyatlarına başladı. Dövlətimizin başçısının bildirdiyi kimi, müzəffər Azərbaycan Ordusu hər anı qəhrəmanlıqlarla dolu 44 gün ərzində düşməni ağır məğlubiyyətə uğratmış və ölkəmizin ərazi bütövlüyünü bərpa etmişdir”, - deyə deputat qeyd edib.
V.İskəndərovun sözlərinə görə, bu savaşda ölkəmizin şanlı Qələbəsini şərtləndirən bır sıra amillər var. Əvvəla, son 17 il ərzində Prezident İlham Əliyevin rəhbərliyi ilə ardıcıl şəkildə həyata keçirilən məqsədyönlü siyasət sayəsində Dağlıq Qarabağ münaqişəsinin ədalətli həlli üçün əlverişli hüquqi baza formalaşmışdı. Təbii ki, bu məsələdə dövlətimizin başçısının qatıldığı bütün beynəlxalq platformalarda Ermənistanın işğalçılıq siyasətini, Dağlıq Qarabağ münaqişəsi ilə bağlı ölkəmizin tarixi faktlara və beynəlxalq hüquqa əsaslanan prinsipial mövqeyini dünya ictimaiyyətinin diqqətinə çatdırması mühüm rol oynayıb. Eyni zamanda, 44 günlük müharibə günlərində dünyanın nüfuzlu KİV-lərinə müsahibələr verən Prezident İlham Əliyev həm işğalçı Ermənistanın, həm də bu ölkənin xarici havadarlarının əməllərini bütün dünyaya bir daha çatdırdı.
Digər bir məqam isə ölkəmizin iqtisadi sahədə əldə etdiyi uğurlar hesabına Silahlı Qüvvələrimizin hərbi qüdrətinin artırılması üçün ötən 17 ildə atılan davamlı addımlarla bağlıdır. Yəni, bəlli olduğu kimi, son 17 ildə Azərbaycan münaqişənin həlli istiqamətində siyasi müstəvidə fəallıq göstərməklə yanaşı, həm də ölkəmizin iqtisadi, hərbi gücünün artırılması istiqamətində məqsədyönlü iş aparıb. Həyata keçirilən islahatlar, maliyyə resurslarının səmərəli idarə edilməsi respublikamızı güclü iqtisadi dayaqlara malik ölkəyə çevirib. Azərbaycan məhz özünün güclü iqtisadi imkanlarına əsaslanmaqla ordu quruculuğunu davamlı şəkildə diqqət mərkəzində saxlayıb. Hər il dövlət büdcəsindən Silahlı Qüvvələrimizin gücləndirilməsi, döyüş hazırlığının artırılması məqsədilə bütövlükdə Ermənistanın ümumi büdcəsindən çox həcmdə maliyyə vəsaitləri ayrılıb. Belə davamlı diqqət isə öz bəhrəsini verib. Beynəlxalq reytinq agentliklərinin dəyərləndirmələrinə görə, hazırda Azərbaycanın Silahlı Qüvvələri dünyanın ən güclü 50 ordusu sırasında yer alır və 44 günlük Vətən müharibəsi zamanı Silahlı Qüvvələrimizin gücünü həm düşmən ölkə, həm də bütün dünya gördü. Bundan başqa, Ordumuzun xilaskarlıq missiyası yerinə yetirməsi, həmçinin Azərbaycanda mövcud olan milli birlik, həmrəylik Vətən müharibəsində Qələbəmizi şərtləndirən amillər sırasında xüsusi yer tutur. Dövlətimizin başçısı da bəyan etdiyi kimi : “Milli dövlətçilik tariximizdə və xalqımızın yaddaşında əbədi yaşayacaq şanlı Zəfər xalq-iqtidar birliyi, ordumuzun yüksək peşəkarlığı və gərgin siyasi-diplomatik fəaliyyət sayəsində əldə edilmişdir”.
Beləliklə, bütün bu sadalananları ümumiləşdirərək qeyd edə bilərik ki, 44 günlük Vətən müharibəsi Azərbaycanın siyasi, iqtisadi, diplomatik və hərbi qüdrətini, həmçinin xalqımızın milli birliyini və sarsılmaz iradəsini bütün dünyaya nümayiş etdirdi.
“Heç şübhəsiz bu müharibənin əsas qəhrəmanı Prezident İlham Əliyev oldu. Dövlətimizin başçısı Vətən müharibəsi dövründə bir sıra təzyiqlərə mətanətlə sinə gərərək Azərbaycanın haqlı mövqeyini qətiyyətlə müdafiə etdi. Bəzi xarici ölkələr, təşkilatlar, siyasi dairələr iddia edirdilər ki, münaqişənin hərbi həlli yoxdur. Lakin Prezident İlham Əliyev “Dəmir yumruq” əməliyyatı ilə sübut etdi ki, münaqişənin hərbi həlli var. Nəticədə ölkəmiz BMT Təhlükəsizlik Şurasının münaqişə ilə bağlı dörd qətnaməsini özü icra etdi. Prezident İlham Əliyevin apardığı siyasət nəticəsində Azərbaycanın beynəlxalq səviyyədə mövqeləri gücləndiyi üçün beynəlxalq ictimaiyyət ölkəmizin Vətən müharibəsinin beynəlxalq hüquqa uyğun olduğunu anlayışla qəbul etdi. Bir sözlə, Vətən müharibəsi bir daha Azərbaycan Prezidentinin müdrik və qətiyyətli dövlət başçısı, cəsur sərkərdə və mahir diplomat olduğunu sübuta yetirdi”, - deyə deputat əlavə edib.