MƏDƏNİYYƏT


AZƏRBAYCAN İLK DƏFƏ OLARAQ “AVROVİZİYA MAHNI MÜSABİQƏSİ-2008”DƏ İŞTİRAK EDƏCƏKDİR
ÖLKƏMİZİ BU MÖHTƏŞƏM MAHNI YARIŞMASINDA TƏMSİL EDƏCƏK ŞƏXSİN ADI FEVRALIN 2-DƏ MƏLUM OLACAQDIR

AZƏRTAC xəbər verir ki, yanvarın 24-də İctimai Televiziya və Radio Yayımları Şirkətində (İTV) Azərbaycanda “Avroviziya mahnı müsabiqəsi- 2008”ə hazırlıqla bağlı mətbuat konfransı keçirilmişdir.

İTV-nin baş direktoru İsmayil Ömərov bildirmişdir ki, “Avroviziya” mahnı müsabiqəsi dünya miqyasında tanınmış müasir televiziya məhsuludur. Müsabiqənin şərtinə uyğun olaraq burada Avropa Yayımlar Birliyinın (AYB) fəal üzv olan televiziyaların təmsil olunduğu ölkənin iştirakçıları musiqi nömrələri ilə yarışırlar.

Azərbaycanın bu möhtəşəm musiqi yarışmasında iştirakı ilə bağlı görülmüş işlərdən söz açan İ.Ömərov demişdir ki, 2007-ci ildə İTV AYB-in tam hüquqlu üzvü seçilmişdir. Bundan sonra Azərbaycanın “Avroviziya mahnı müsabiqəsi-2008”də iştirakı ilə bağlı AYB ilə danışıqlar öz müsbət nəticəsini vermişdır. Carı ilin oktyabrında ölkəmiz bu hüququ qazandıqdan sonra vaxt məhdudluğuna baxmayaraq müsabiqəyə ciddi hazırlıq işləri görülmüşdür.

İ.Ömərov bildirmişdir ki, müsabiqədə iştirak edəcək milli təmsilçini seçmək məqsədi ilə televiziya, vokal sənəti, şou-biznes idarəçiliyi sahəsində peşəkarlığı ilə fərqlənən tanınmış musiqiçilərdən, eləcə də Azərbaycanın ictimai və mədəniyyət xadimlərindən ibarət münsiflər heyəti yaradılmışdır. Münsiflər heyəti 13 nəfər üzvdən və 1 katibdən ibarətdir. Münsiflər heyətinin katibi səsvermə hüququna malik deyildir.

Baş direktor vurğulamışdır ki, üç mərhələdən ibarət seçim turunda müsabiqənin qaydalarına uyğun olaraq münsiflər heyəti 40 ifaçını dinləmiş və onlardan 3 nəfəri final mərhələsinə adlamışdır. Bu ifaçılar - Aynur İsgəndərli, Elnur Hüseynov və “Unformal” qrupudur. Hazırda finalçılarımız Ukraynada müsabiqəyə hazırlaşırlar. Müsabiqədə səslənəcək mahnılar, ifaçıların yaş həddi, musiqinin səslənmə vaxtı və digər məsələlər qoyulmuş şərtlərə uyğun seçilməlidir.

İTV-nin baş direktoru demişdir ki, bu tədbirlərin həyata keçirilməsində bizə ən böyük köməyi Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva göstərmişdir.

Milli seçim fevralın 2-də Heydər Əliyev adına İdman–Konsert Kompleksində qalibin adının elan olunması ilə bitmiş hesab ediləcəkdir. Finalçıların konsert proqramı dünyanın bir çox ölkələrində canlı olaraq yayımlanacaq və gecədə tanınmış sənət adamları ilə yanaşı, müxtəlif illərdə “Avroviziya” mahnı müsabiqəsinin qalibi olmuş ifaçılar da iştirak edəcəklər. Konsertdən sonra “Avroviziya mahnı müsabiqəsi-2008”də ölkəmizi təmsil edəcək ifaçının adı məlum olacaq və o, mətbuat konfransı keçirəcəkdir.

Qeyd olunmuşdur ki, AYB-ə 56 ölkə və 70 televiziya şirkəti üzvdür və onlardan yalnız 43-ü bu müsabiqəyə qatılacaqdır.

Müsabiqədə Azərbaycan nümayəndə heyətinə İTV-nin xarici əlaqələr şöbəsinin müdiri Adil Kərimli rəhbərlik edəcəkdir.

İstənilən şəxs “Avroviziya mahnı müsabiqəsi-2008” yarışması ilə bağlı məlumatları Azərbaycan, rus, ingilis və fransız dillərində www.eurovision.az saytından əldə edə bilər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.