Şəmkir, 11 oktyabr, Rauf Hacıyev, AZƏRTAC

Aqrar sahə Azərbaycanda iqtisadiyyatın əsas istiqamətlərindən birini təşkil edir. Ancaq bu sahə üzrə mütəxəssislərin yetərli sayda olmaması təəssüf doğurur. Bunun da müxtəlif səbəbləri var. Əsas səbəblərdən biri 1990-cı illərdə və ondan sonrakı dövrlərdə kənd təsərrüfatı üzrə ixtisaslı kadr hazırlayan yeganə ali təhsil ocağı olan Azərbaycan Dövlət Aqrar Universitetinə münasibətin birmənalı olmaması və tələbə qəbulu nəticələri sürətlə azalmağa başlamasıdır.

AZƏRTAC-ın bölgə müxbiri xəbər verir ki, bu fikirlər Azərbaycan Dövlət Aqrar Universitetinin (ADAU) kollektivinin Şəmkir şəhər Heydər Əliyev Mərkəzində rayon üzrə DAİM-in sədri, təhsil şöbəsinin müdiri, məktəb direktorları və yuxarı sinif şagirdləri, eləcə də ictimaiyyət nümayəndələrinin iştirakı ilə “ADAU-nu tanıdaq” layihəsi çərçivəsində keçirilən görüşündə səsləndirilib.

Bildirilib ki, son 10 ildə aqrar təhsilin inkişafına dövlət tərəfindən xüsusi diqqət göstərilir və Prezident İlham Əliyevin birbaşa nəzarətində olan aqrar təhsil sürətli inkişaf illərini yaşayır. Bu illər ərzində ən müasir tələbə evləri tikilib, texniki baza tamamilə yenilənib, universitetin beynəlxalq əlaqələri genişlənib. Kənd təsərrüfatı yönümlü ixtisaslar dövlət sifarişli olub, tələbələr təqaüdlə təmin edilib. Universitet kollektivi icra etdiyi “ADAU-nu tanıdaq” layihəsi ilə bu boşluğu aradan qaldırmağı və bazar rəqabətli kadr hazırlamağı hədəf götürüb və demək olar ki, buna da nail olub.

Tədbir iştirakçıları üçün əvvəlcə ADAU haqqında qısametrajlı filmlər, videoçarxlar nümayiş etdirilib.

Bildirilib ki, görüşün və layihənin məqsədi yuxarı sinif şagirdlərinə universitet barədə geniş məlumat vermək, şagirdlərin marağını bu sahəyə artırmaqdır.

Qeyd edilib ki, kənd təsərrüfatı üzrə mütəxəssislərə olan tələbatı ödəmək üçün görülən işlər nəticəsində ADAU-nu seçənlərin sayı bu tədris ilində bakalavr, magistr və əcnəbi tələbələrlə birlikdə 1540 nəfər olub. Hazırda universitetdə 14 ixtisas dövlət sifarişlidir. Tələbələr burada ödəniş haqqından azaddır və təqaüd alırlar.

Görüşdə Aqrar Universitetin rektoru, AMEA-nın müxbir üzvü, professor İbrahim Cəfərov ADAU-nun inkişafının ölkə Prezidentinin diqqətində olduğunu deyib, universitetin son illərdə qazandığı nailiyyətlərdən danışıb. Hazırda ADAU-nun böyük şöhrətə malik olduğunu deyən rektor onu da əlavə edib ki, bu təhsil müəssisəsi Azərbaycana çox böyük şəxsiyyətlər verib.

“İndi biz həmin şöhrətli illəri dövlət başçısının diqqəti sayəsində yenidən yaşayırıq və əminəm ki, tarix təkrar olacaq və yeni şəxsiyyətlər nəsli yetişəcəkdir. Belə mükəmməl kadrlar hazırlamaq üçün indi Aqrar Universitetdə hər cür şərait yaradılıb”, – deyə İ.Cəfərov qeyd edib.

Rayon icra hakimiyyətinin başçısı Alimpaşa Məmmədov Şəmkirin Azərbaycan kənd təsərrüfatında yerindən danışıb, bu günün uğurlarını dilə gətirib. Bildirib ki, bu günün dinamik inkişafının özü də ulu öndər Heydər Əliyev siyasi kursunun, ideologiyasının nəticəsidir.

Alimpaşa Məmmədov vurğulayıb ki, bu il Şəmkir rayonundan 46 tələbə məhz ADAU-nu seçib. Ümumilikdə isə bu rayondan 251 tələbə ADAU-da oxuyur. Bu isə o deməkdir ki, yaxın bir neçə ilə rayonun kənd təsərrüfatı kadrlarına olan ehtiyacını tam ödəmək mümkün olacaq.

Görüşdə Şəmkir ictimaiyyətini və yuxarı sinif şagirdlərini maraqlandıran suallar cavablandırılıb.