İDMAN
AZƏRBAYCAN GİMNASTLARI MOSKVA TURNİRLƏRİNDƏ BÜRÜNC MÜKAFATLAR QAZANMIŞLAR
AZƏRTAC respublika Gimnastika Federasiyasının mətbuat xidmətinə istinadla xəbər verir ki, Azərbaycan gimnastı Aliyə Qarayeva Moskvada keçirilən “Qran-pri-2007” yarışlarının birinci mərhələsində 3 dəfə fəxri kürsünün üçüncü pilləsinə qalxmışdır.
A.Qarayeva Qran-pri yarışlarının seçmə “Çempionlar Kuboku-Qazprom” turnirində çoxnövçülükdə 68,4 bal toplayaraq, yalnız meydan sahiblərinə - Olimpiya çempionu Alina Kabayevaya və Avropanın mütləq çempionu Vera Sesinaya uduzmuşdur.
Aliyə iplə (17,55 bal) və lentlə (17,5 bal) hərəkətlərdə də bürünc mükafatçı olmuşdur. İplə yarışlarda A.Kabayeva və Vera Sesinadan, lentlə isə A.Kabayeva və və Olqa Kapranovadan geri qamışdır.
A.Qarayeva yerli jurnalistlərə müsahibəsində demişdir: “Moskvada Qran-pri yarışları iştirakçıların tərkibi baxımından mühüm yarışdır. Bakıda keçiriləcək Avropa çempionatı ərəfəsində burada yeni proqramımı sınaqdan keçirməyim də xoşdur. Ümidvaram ki, bu yay keçiriləcək Avropa çempionatında azarkeşlərimi maraqlı və uğurlu çıxışlarımla sevindirəcəyəm”.
Moskvada Qran-pri yarışları ilə yanaşı, 8 Mart - Beynəlxalq Qadınlar gününə həsr olunmuş beynəlxalq turnir də keçirilmişdir. Turnirin iştirakçısı Dinara Gimatova bayram ərəfəsində özünə “bürünc” hədiyyə etmişdir. “Neftçi”nin yetirməsi çoxnövçülükdə 61,625 bal toplayaraq, komanda yoldaşı Anna Qurbanovanı (58,45 bal) qabaqlamışdır. Zeynəb Cavadlı turnirin 23 iştirakçısı arasında 50,15 balla 10-cu yeri tutmuşdur. Qələbəni isə Rusiya gimnastı Marina Şpext bayram etmişdir.
Gimnastlarımızın məşqçiləri demişlər ki, bütövlükdə qızların çıxışları uğurlu olmuşdur. Bu, həm Dinaranın bürünc mükafatı, həm Anna ilə rəqabət aparması, həm də gənc Zeynəbin peşəkarlığının artmasıdır. Onların yeni proqramları nəzərdən keçirilmişdir. Yarışlarla zəngin il yenicə başlandığından, hər şey irəlidədir.
Gimnastlarımızı yarışlarda Moskva Dövlət Beynəlxalq Münasibətlər İnstitutunun Azərbaycanlı Gənclər Klubunun və Rusiyada Azərbaycanlı Gənclərin Əlaqələndirmə Şurasının üzvləri dəstəkləmişlər.