Möhtərəm cənab Prezident! 

Müstəqilliyimizin son on ilində respublikamızın Prezidenti kimi yorulmaz fəaliyyətiniz, ölkəmizin siyasi və iqtisadi tərəqqisinə yönəlmiş islahatlar proqramının həyata keçirilməsi sahəsindəki səyləriniz, əhalinin maddi və mənəvi ehtiyaclarının ödənilməsinə göstərdiyiniz diqqət və qayğı Azərbaycan xalqı, o cümlədən Qızıl Aypara Cəmiyyətinin üzvləri tərəfindən rəğbətlə qarşılanır və bizdə ölkəmizin firavan gələcəyinə dərin inam hissi aşılayır.

Sizin apardığınız məqsədyönlü daxili və xarici siyasət dövlətimizin beynəlxalq proseslərə daha fəal qoşulmasına və dünya ölkələri sırasında layiqlı yer tutmasına şərait yaratmışdır. Respublikamızda və ümumən Qafqaz regionunda sülh və sabitliyin bərqərar olunması üçün həyata keçirdiyiniz tədbirlər xalqımızın mənafeyinə tam cavab verir.

Xalqımızı çox ciddi narahat edən Ermənistan-Azərbaycan, Dağlıq Qarabağ münaqişəsinin sülh yolu ilə həlli, ərazi bütövlüyümüzün bərpası, qaçqın və məcburi köçkünlərin öz ata-baba yurdlarına qaytarılması istiqamətində atdığınız ardıcıl addımlar həm ölkə əhaisi, həm də beynəlxalq ictimaiyyət tərəfindən birmənalı şəkildə dəstəklənir. Biz əminik ki, bu problem Sizin müdrik, uzaqgörən siyasətiniz nəticəsində yaxın vaxtlarda həll ediləcək, ölkəmizdə, eləcə də bütün Qafqazda sülhə nail olunacaqdır.

Siz respublikamıza rəhbərlik etdiyiniz bütün dövrlərdə Azərbaycan Qızıl Aypara Cəmiyyətinin fəaliyyətinə yüksək qiymət vermisiniz. Bu gün Azərbaycan Qızıl Aypara Cəmiyyətinin fəaliyyəti məhz Sizin hakimiyyətə qayıdışınızın ilk illərində diqqət və qayğınız sayəsində Milli Məclis tərəfindən qəbul edilən “Azərbaycan Qızıl Aypara Cəmiyyətinin işinin yaxşılaşdırılması haqqında” qərarla tənzimlənir. Hazırda Azərbaycan Qızıl Aypara Cəmiyyəti humanitar sahədə öz üzərinə düşən missiyanı ardıcıl şəkildə həyata keçirir, respublikamızda Sizin rəhbərliyinizlə gerçəkləşdirilən vətəndaş cəmiyyəti quruculuğuna öz töhfəsini verir. Cəmiyyətimizin üzvləri ölkəmizdə humanizmin təntənəsi və hüquqi dövlət qurulması istiqamətində Sizin qətiyyətli addımlarınızı tam dəstəkləyir və öz əməli fəaliyyətləri ilə bu sahədəki vəzifələrin yerinə yetirilməsinə yardımçı olmağa səy göstərirlər.

Sizin qayğınızın nəticəsi olaraq, Azərbaycan Qızıl Aypara Cəmiyyəti 1995-ci ildə Beynəlxalq Qızıl Xaç və Qızıl Aypara Cəmiyyətləri Federasiyasına bərabər hüquqlu üzv qəbul edilmişdir. Bu gün cəmiyyətimiz 177 ölkənin milli cəmiyyətləri ilə əməkdaşlıq edərək, dünya birliyində bu sahədə Azərbaycanı layiqincə təmsil edir.

2001-ci ildə Azərbaycan QAC Beynəlxalq Qızıl Xaç və Qızıl Aypara Cəmiyyətləri Federasiyasının İdarəetmə Şurasında Fövqəladə hallara hazırlıq və yardım komissiyasının üzvü seçilmiş, cəmiyyətin prezidenti isə həmin komissiyanın eksperti təyin olunmuşdur. Bütün bunlar ayparaçılarımızı daha səylə işləməyə ruhlandırır.

İqtisadi islahatların dönmədən davam etdirilməsinin, Bakı-Tbilisi-Ceyhan neft kəmərinin tikintisinə start verilməsinin, Bakı-Ərzurum qaz kəmərinin inşasının başlanması üçün aparılan təşkilati işlərin, ölkəyə xarici sərmayələrin axınının sürətləndirilməsinin dövlətimizin müstəqilliyinin möhkəmlənməsinə və xalqımızın rifahının yüksəlməsinə xidmət edəcəyinə əminik.

2003-cü il xalqımız üçün böyük ümidlər ilidir. Sizin “İlin adamı” adına layiq görülməyiniz 2003-cü ilin uğurlu başlanğıcından xəbər verir. 2003-cü ilin dövlət büdcəsinin sosial yönümlü olması da buna bariz nümunədir.

Cəmiyyətimiz öz Nizamnaməsinə uyğun olaraq, heç bir siyasətə qoşulmur və humanitar sahədə xalqımıza, hökumətimizə yardımçıdır.

Milyondan çox qaçqın və məcburi köçkünə, minlərlə tənha və kimsəsizə, əlilə və yetim uşağa ayrıseçkilik qoymadan humanitar köməyini, yardımını əsirgəməyən Qızıl Aypara Cəmiyyəti onların dayağına və ümid yerinə çevrilmişdir. Fəlakətə düçar olmuş insanlar Qızıl Aypara Cəmiyyətinin köməyini həmişə hiss edib, edir və edəcəkdir.

Bütün Azərbaycan xalqı əmindir ki, məhrumiyyətlərə düçar olmuş soydaşlarımız Sizin müdrik və uzaqgörən, uğurlu siyasətiniz nəticəsində öz dədə-baba torpaqlarına, isti ocaqlarına qayıdacaq, Azərbaycan bu çətin sınaqdan da uğurla, mətinliklə çıxacaqdır.

Respublikamızda həyata keçirilən islahatlar artıq öz bəhrəsini verməkdədir və biz ümid edirik ki, Sizin rəhbərliyinizlə xalqımız xoşbəxt gələcəyə qovuşacaqdır.

Çox hörmətli Prezident, Zati-aliləri!

Qurultay nümayəndələri parlamentdə “Azərbaycan Qızıl Aypara Cəmiyyəti haqqında” Qanunun qəbul ediləcəyinə ümidvar olduqlarını bildirirlər.

Cənab Prezident!

Bu gün Azərbaycan Qızıl Aypara Cəmiyyətinin XX qurultayı respublikamızın ayrı-ayrı yerli komitə və ilk təşkilatlarının 130 min üzvü, o cümlədən 14 min könüllüsü adından 2003-cü il prezident seçkilərində Sizin namizədliyinizi irəli sürmək və dəstəkləmək haqqında məsuliyyətli bir qərar qəbul etdi. Biz bu addımı xalqımızın, ictimaiyyətin və əmək adamlarının Sizin Azərbaycan naminə göstərdiyiniz böyük xidmətlərə verdikləri yüksək qiymətə əsaslanaraq atdıq. Düşünürük ki, Sizin tükənməz enerjiniz, böyük təcrübəniz və bəşəri ideallarınız xalqımıza hələ çox lazımdır. Bizim həllini gözləyən çox problemlərimiz vardır və bunları yalnız Sizin kimi müdrik bir rəhbər həll edə bilər. Xahiş edirik Azərbaycan Qızıl Aypara Cəmiyyəti qurultayının 2003-cü il prezident seçkilərində Sizin namizədliyinizi irəli sürmək və dəstəkləmək qərarını qəbul edəsiniz.

Sizə möhkəm cansağlığı və Azərbaycan naminə uğurlu fəaliyyət arzulayırıq!