REGİONLAR
Aprel şəhidi Rusif Ağayevin xatirəsi anılıb VİDEO
Lənkəran, 6 aprel, İsmayıl Cəfərli, AZƏRTAC
Rəşadətli Ordumuzun parlaq tarixi qələbələrindən olan şanlı Aprel döyüşlərindən beş il ötür. 2016-cı ildə Ermənistan silahlı qüvvələrinin təxribatlarına cavab olaraq yenilməz Ordumuz sürətli əks-hücum əməliyyatı ilə düşməni ağır məğlubiyyətə uğratdı. Füzuli, Cəbrayıl və Ağdərə rayonlarının işğal altındakı ərazilərinin 2 min hektardan çox hissəsini azad etdi. Aprel döyüşlərində qəhrəman oğullarımızın şücaətləri sayəsində 23 ildən sonra xalqımız qələbə sevinci yaşadı. Həmin günlərdə bizə bu hissi yaşadan oğullardan biri də Silahlı Qüvvələrimizin giziri şəhid Rusif Ağayev oldu.
AZƏRTAC şəhidin anım günündə onun haqqında hazırladığı reportajı təqdim edir.
Azərbaycan Silahlı Qüvvələrinin giziri Rusif İbrahim oğlu Ağayev 1987-ci il aprelin 16-da Lənkəran rayonunun Hirkan qəsəbəsində anadan olub. Orta məktəbi bitirdikdən sonra hərbi xidmətə yollanan Rusif Vətən qarşısında borcunu şərəflə yerinə yetirir və könüllü olaraq ordu sıralarında qalmağa qərar verir. Komandanlığa müraciət edərək xüsusi təyinatlı qüvvələrdə xidmət etməsini xahiş edir. Sınaqlardan uğurla çıxan Rusif bu istəyinə çatır. Sonra o, bir çox beynəlxalq hərbi təlimlərdə iştirak edir. 2016-cı il aprelin 2-də Ermənistan silahlı qüvvələrinin təxribatlarına cavab olaraq Azərbaycan Ordusunun həyata keçirdiyi əks-hücum əməliyyatına Rusif Ağayev də qatılaraq düşmənə qarşı mətinliklə vuruşur. O, Talış yüksəklikləri uğrunda gedən döyüşlərdə silahdaşlarını xilas edən zaman başından aldığı snayper gülləsi nəticəsində şəhid olur. 2016-cı il aprelin 6-da doğulduğu Hirkan qəsəbəsində dəfn edilir. Prezident İlham Əliyevin Sərəncamı ilə şəhid Rusif Ağayev ölümündən sonra "Hərbi xidmətdə fərqlənməyə görə" III dərəcəli medalla təltif olunur.
Şəhidin atası İbrahim Ağayev: “Aprel döyüşlərindən 5 il keçsə də, mən bu günü acı hisslərlə deyil, fərəh hissi və qürurla qeyd edirəm. Sevinirəm ki, Rusif kimi oğlanlarımızın sayəsində torpaqlarımız azad edildi. Bu günü biz 25 ildir gözləyirdik. Bütün şəhid valideynləri kimi mən də səbirsizliklə bu qisas gününü gözləmişəm. Həmin gecə səhərə kimi yatmamışıq və qəbir üstə getmişik. Rusifə demişik ki, rahat yat, qisasın alındı”.
Şəhidin anım günündə hərbçi yoldaşları Rusif Ağayevin ailəsinə baş çəkib, hörmət və ehtiramlarını göstəriblər. Rusifin silahdaşları bildiriblər ki, rəşadətli Ordumuz Aprel döyüşlərində illərlə yaradılan “məğlubedilməz erməni ordusu” mifini darmadağın etdi. Aprel qələbəsi əsgərlərimizin döyüş ruhunun, ordu ilə xalqın birliyinin təcəssümü oldu. Elə bu həmrəyliyin sayəsində 44 günlük Vətən müharibəsində Qələbə qazandıq, Rusif kimi şəhidlərin qisası alındı. Daha sonra şəhid gizirimizin silahdaşları Rusifin məzarını ziyarət edərək önünə əklil qoydular. Vətənimizin ərazi bütövlüyü uğrunda canından keçən şəhidlərimizin ruhuna dualar oxundu.
Şəhidin qohumu Nemət Cəfərov: “Bu il tam fərqli ildir. Onun şəhadətindən 5 il ötür. Rusifin qanı yerdə qalmadı, torpaqlarımız azad olundu. Allah şəhidlərimizə rəhmət etsin. Qazilərimizə cansağlığı versin. Yaşasın Azərbaycan Ordusu”.
Anım mərasimində bildirilib ki, şəhidlərimizin qisası yerdə qalmadı. 44 günlük Vətən müharibəsi zamanı Müzəffər Ali Baş Komandanımızın rəhbərliyi ilə rəşadətli Azərbaycan Ordusunun həyata keçirdiyi uğurlu döyüş əməliyyatları nəticəsində düşmənə ağır zərbələr endirildi, müharibə ordumuzun böyük Qələbəsi ilə başa çatdı.