SİYASƏT
Astanada keçirilən anım tədbirində ulu öndər Heydər Əliyevin Azərbaycan xalqı qarşısındakı böyük xidmətlərindən danışılıb VİDEO
Astana, 12 dekabr, АZƏRTAC
Azərbaycanın Qazaxıstandakı səfirliyinin təşkilatçılığı və Beynəlxalq Türk Akademiyasının dəstəyi ilə Astanada ümummilli lider Heydər Əliyevin xatirəsinə həsr olunan anım tədbiri keçirilib.
AZƏRTAC xəbər verir ki, tədbirdə Türkiyə, Ukrayna, Rusiya, Özbəkistan və Tacikistanın bu ölkədəki səfirləri, diplomatik nümayəndəliklərin təmsilçiləri, Qazaxıstanın və Qırğızıstanın tanınmış ictimai-siyasi xadimləri, ziyalılar, beynəlxalq təşkilatların nümayəndələri, KİV rəhbərləri və başqaları iştirak ediblər.
Tədbirdə Heydər Əliyevin zəngin həyat və fəaliyyətinə həsr edilmiş sənədli film nümayiş olunub.
Azərbaycanın Qazaxıstandakı səfiri Rəşad Məmmədov çıxış edərək deyib ki, ulu öndər Heydər Əliyevin Azərbaycan xalqı qarşısında xidmətləri əvəzolunmazdır. Heydər Əliyev bütün həyatını xalqına, Vətəninə həsr edən böyük şəxsiyyət olub. O, Azərbaycan tarixində qeyri-adi qabiliyyətə malik dahi idi. Ulu Öndər gördüyü böyük işlərlə heç vaxt unudulmayacaq. O, ən çətin sınaqlardan müvəffəqiyyətlə çıxaraq müqəddəs milli məqsədlər naminə çalışıb. Azərbaycan xalqının ümummilli lideri adını qazanmış görkəmli dövlət xadimi, dünya miqyaslı siyasətçi Heydər Əliyevin böyük xidmətləri var.
Səfir Ulu Öndərin həyatından ətraflı bəhs edərək bildirib ki, Heydər Əliyev 1987-ci ilin oktyabrında Sovet İttifaqı Kommunist Partiyası Mərkəzi Komitəsi Siyasi Bürosunun və baş katib Mixail Qorbaçovun yeritdiyi siyasi xəttə etiraz əlaməti olaraq tutduğu vəzifələrdən istefa verib. O, Dağlıq Qarabağda yaranmış kəskin münaqişəli vəziyyətlə bağlı SSRİ rəhbərliyinin ikiüzlü siyasətinə etiraz əlaməti olaraq 1991-ci ilin iyulunda Sovet İttifaqı Kommunist Partiyasının sıralarını tərk edib. Heydər Əliyev böyük siyasət üçün yaranan, təkcə bir ölkə miqyasında yox, dünya əhəmiyyətli məsələlərin həllində qətiyyətli sözünü deyə bilən nadir siyasətçi idi. Ən çətin anlarda belə Heydər Əliyev yenilməz siyasi iradə nümayiş etdirdi, milli dövlətçiliyin, milli mənafelərin ifadəçisi kimi anti-Azərbaycan, antimilli qüvvələrin qarşısında sipərə çevrildi. Bakı-Tbilisi-Ceyhan neft, Bakı-Tbilisi-Ərzurum qaz kəmərinin çəkilişi məhz bu böyük insanın qətiyyətli mövqeyinin, uzaqgörənliyinin nəticəsi kimi reallığa çevrildi.
Diplomat qeyd edib ki, məhz ulu öndər Heydər Əliyevlə Prezident Nursultan Nazarbayevin sağlam təməllər üzərində qurduqları münasibətlərin nəticəsində bu gün Azərbaycanla Qazaxıstan qırılmaz qardaşlıq telləri ilə bir-birinə sıx bağlanıb. Bu cür strateji yanaşma nəticəsində ölkələrimiz arasında illər ərzində hansısa problem yaşanmayıb və bu gün də həllini tapmamış heç bir məsələ yoxdur.
Tədbirdə çıxış edən Rusiyanın Qazaxıstandakı səfiri Aleksey Borodavkin Ulu Öndəri şəxsən tanıdığını deyib, Heydər Əliyevin Azərbaycan-Rusiya dostluq münasibətlərinin möhkəmləndirilməsində misilsiz xidmətlərindən bəhs edib. Səfir bildirib ki, iki xalq və dövlət arasındakı münasibətlər dostluq və əməkdaşlığa əsaslanır. Mühüm məsələlərin əksəriyyətində iki ölkənin mövqeləri üst-üstə düşür və əlaqələrimiz qarşılıqlı hörmətə və əməkdaşlığa əsaslanır. O, ötən əsrin sonlarında Azərbaycanı mürəkkəb geosiyasi vəziyyətdən, sosial-siyasi böhrandan uğurla çıxararaq ölkənin sabitliyini təmin edib.
Beynəlxalq Türk Akademiyasının prezidenti Darxan Kıdıralı Qazaxıstan Prezidenti Nursultan Nazarbayevin ümummilli lider Heydər Əliyevlə dostluq münasibətlərini xüsusi vurğulayıb. O, 2009-cu ildə Naxçıvan şəhərində
Beynəlxalq Türk Akademiyasının yaradılmasında hər iki liderin təşəbbüsü haqqında ətraflı bəhs edib. Ulu Öndər elə böyük dövlət və siyasi xadimlərdən idi ki, dövlətçiliyin siyasi-ideoloji əsaslarını yaratmaqla bərabər, eyni zamanda, onun varisliyini təmin etdi. Heydər Əliyevin müdrik siyasəti bu gün də öz bəhrələrini verir.
Tədbir çərçivəsində iştirakçılar Azərbaycanın Qazaxıstandakı səfirliyində təşkil olunan muzeyi ziyarət edib, fotosərgiyə baxıblar.
İlahə Əhmədova
AZƏRTAC-ın xüsusi müxbiri
Astana