Bakı, 3 dekabr, AZƏRTAC 

Azərbaycan İlahiyyat İnstitutunun (Aİİ) tələbələri Avropa və Gürcüstan yəhudilərinin sinaqoqunda həftəlik “Şabat” mərasimində iştirak ediblər.

Universitetdən AZƏRTAC-a bildiriblər ki, rektor Ceyhun Məmmədov tələbələrə Azərbaycanda yaşayan yəhudilər haqqında ümumi məlumat verib. Qeyd edib ki, Azərbaycan həmişə müxtəlif konfessiyaların, xalqların birgə yaşadığı, tolerantlığın yüksək səviyyədə qorunduğu ölkə olub. Əsası ümummilli lider Heydər Əliyev tərəfindən qoyulan bu siyasət hazırda Prezident İlham Əliyev tərəfindən uğurla davam etdirilir. Belə ki, ölkəmizdə bir çox dini ibadət ocaqları təmir və ya bərpa olunur, yeni dini təhsil müəssisələri yaradılır, dövlət tərəfindən dini qurumlara mütəmadi maliyyə vəsaiti ayrılır. Azərbaycan Respublikasının Birinci vitse-prezidenti Mehriban xanım Əliyeva bu sahəyə xüsusi diqqət göstərir.

Aİİ-nin tələbələri həftəlik “Şabat” mərasimini izlədikdən sonra Gürcü Yəhudilərinin Dini İcmasının ravvini yəhudiliyin inanc və ibadətləri, tolerantlıq və multikulturalizm kontekstində Azərbaycanda fərqli dinlərə etiqad göstərənlərin birlikdə yaşama təcrübəsi mövzularında gənclərin suallarını cavablandırıb.

Prezident İlham Əliyevin 2018-ci il 9 fevral tarixli müvafiq Sərəncamı ilə yaradılan Aİİ-də İslamla yanaşı, Azərbaycanda yaşayan digər dinlərin nümayəndələrinin mədəniyyəti ilə bağlı araşdırmaların aparılması, gələcəkdə yəhudilik və xristianlıqla bağlı ixtisasların açılması planlaşdırılır.