MƏDƏNİYYƏT
Azərbaycan dizaynerləri Dubayda keçirilən moda həftəsində iştirak ediblər
Dubay, 8 mart, AZƏRTAC
Dubayda keçirilən “Modest Fashion Week moda” (təsəttür moda) moda həftəsində 26 ölkə iştirak edir. “Gucci”, “Prada” kimi məşhur brendlərin də yer aldığı moda həftəsində ölkəmiz də təmsil olunur.
Dubayın “Emirald palas” otelində keçirilən moda nümayişində ölkəmizin “Anara Zakirli”, “Abayas by Lyaman Hajiyeva”, "Zahra", “Hicab Queen" və "Nargiz Shakhbazi” brendləri təqdim olunub.
Azərbaycanlı modelyerlərin moda geyimləri həm bu sahə üzrə tanınmış ekspertlərin, həm də nüfuzlu qonaqların və izləyicilərin böyük marağına səbəb olub, alqışlarla qarşılanıb. Milli naxışlardan, xalça ornamentlərindən, kəlağayıdan istifadə olunan və böyük zövqlə hazırlanan geyimlər xüsusi diqqət cəlb edib və izləyicilər tərəfindən olduqca yüksək qiymətləndirilib.
Moda nümayişdən sonra bir çox iştirakçılar AZƏRTAC-a müsahibələrində Azərbaycan dizaynerlərinin yüksək peşəkarlığı barədə fikirlər söyləyiblər və bu sahədə aparıcı brendlərlə rəqabət qabiliyyəti olduqlarını diqqətə çatdırıblar.
Tanınmış ərəb modeli Mələk Əl Oteybi bildirib ki, Azərbaycanın iştirak etdiyi defiledən böyük zövq alıb və yerli dizaynerlərin geyimlərini çox bəyənib. “Azərbaycandan gələn modelyerlərin defilesini çox bəyəndim, çünki yeniliklərlə seçilir və böyük zövqlə hazırlandığına görə digər kolleksiyalardan fərqlənir. Azərbaycan Şərqlə Qərbin qovuşduğu ölkə olmasına baxmayaraq, geyimlərdə milli adət-ənənələrə böyük önəm verilməsi diqqətimi cəlb etdi. Azərbaycan kolleksiyaları yaddaqalan oldu və onların gələcəkdə böyük uğurlar qazanacağını düşünürəm”, - deyə ərəb modeli qeyd edib.
Azərbaycanlı dizaynerlərimiz də defiledən məmnun qaldıqlarını söyləyiblər. Dizayner və Azərbaycan Təsəttür Moda Şurasının nümayəndəsi Fəridə Əfəndiyeva bildirib ki, Azərbaycanın belə bir möhtəşəm tədbirdə təmsil olunması çox təqdirəlayiqdir və bizim brendlərin dünyada tanınması üçün çox vacibdir. O deyib: “Bu möhtəşəm tədbirdə ölkəmizi təmsil etdiyimizə görə çox şadıq və həyəcanlıyıq. Şadıq ki, nümayişimiz hamının xoşuna gəldi. Orada Azərbaycanın milli kəlağayıları nümayiş olundu, Anara Zakirlinin modellərinin əynində Azərbaycan xalçalarının rəsmləri əks olunan geyimlər təqdim edildi, musiqi və muğamımızın sədaları altında digər kolleksiyalarımız nümayiş olundu”.
Nümayişdə iştirak edən dizayner Nərgiz Şahbazi bildirib ki, təsəttür moda digər modadan fərqləndiyi üçün müəyyən formata uyğun olmağı tələb edirdi. “Bizim kolleksiya kəlağayı istehsal edən “Hicab Queen” brendi ilə birgə təqdim olunub. Mənim fikrimcə, biz ölkəmizi layiqincə təmsil etdik və uğurla çıxış etdik. Hətta bizə dedilər ki, Azərbaycan kolleksiyası ən yaxşı kolleksiyalardan biridir və bu, bizi çox sevindirir”, – o qeyd edib.
“Zahra” brendinin sahibi və dizayneri Vüsalə İldırımzadə də nümayişin çox uğurlu keçdiyini və ölkəmizi təmsil etməkdən qürur hissi keçirdiyini söyləyib: “Mənim üçün Azərbaycanın milli musiqisi altında çıxış etmək çox vacib idi. Məmnunuq ki, ölkəmiz adından təqdim olunan kolleksiyalar rəğbətlə qarşılandı. Bütün iştirak edən bizim dizaynerlərin işləri çox yüksək səviyyədə idi, fəxr olunası kolleksiyalar idi və nümayiş ən yüksək səviyyədə keçdi. Bizim dizaynerlərin işləri rəqabətə davamlıdır, hətta bizə xaricilər, tanımadığımız insanlar yaxınlaşdılar və bildirdilər ki, Azərbaycan dizaynerlərinin işlərini daha çox bəyəniblər”.
Dizayner Anara Zakirli müsahibəsində bildirib ki, onun kolleksiyasının adı “Zərəfşan”dır və paltarlardakı naxışlar Əfşar xanlığının xalçalarından götürülüb və müasir geyimlə sintez edilib. “Mən bu istiqamətdə işləyirəm və çalışıram ki, milli ənənələri müasir geyimdə stilizə edim. Kolleksiyamız çox bəyənildi və bu, bizi sevindirir və ruhlandırır”.
“Abayas” brendinin dizayneri Ləman Hacıyeva da ölkəmizi belə bir möhtəşəm tədbirdə təmsil etdiyindən qürur duyduğunu ifadə edib. “Azərbaycanı “Abayas” geyimləri ilə təmsil edirəm və mənim hazırladığım əbalar Birləşmiş Ərəb Əmirliklərindəki qadınların stilindədir. Çalışıram ki, qapalı geyinən xanımlarımız zövqlə geyinsinlər. Bunu Azərbaycanda etməyi bacardım və çalışıram ki, bu brend bütün dünyada tanınsın”, - deyə dizayner bildirib.
Dubayda keçirilən moda həftəsində Azərbaycandan “Copine” bijuteriya istehsal edən brendi də iştirak edir.
Tədbirdə Azərbaycanın Dubaydakı konsulluğunun nümayəndələri iştirak ediblər.
Asya Hacızadə
AZƏRTAC-ın xüsusi müxbiri
Dubay