Bakı, 7 fevral, AZƏRTAC

Cənubi Qafqazın super gücü olan Azərbaycan son illərdə nəhəng iqtisadi layihələri ilə Şərqlə Qərb arasında siyasi-iqtisadi körpü yaratmaq istiqamətində mühüm tarixi layihələr gerçəkləşdirib. Prezident İlham Əliyevin uğurlu diplomatiyası və dünyaya açıq uzaqgörən siyasəti nəticəsində respublikada əlverişli və sağlam biznes mühiti yaradılıb, əcnəbi investorlar ölkəyə cəlb olunub. Şübhəsiz ki, bütün bunların məntiqi nəticəsi kimi Azərbaycan genişmiqyaslı iqtisadi tərəqqiyə praqmatik, siyasi kursu ilə nail olub.

Bu fikirləri AZƏRTAC-a açıqlamasında Milli Məclisin deputatı, YAP İdarə Heyətinin üzvü Rəşad Mahmudov söyləyib.

Deputat qeyd edib ki, bu baxımdan ölkəmiz üçün mühüm həyati əhəmiyyət daşıyan Cənub Qaz Dəhlizi layihəsinin reallaşdırılması Azərbaycanın beynəlxalq nüfuzunu daha da gücləndirib. Adı çəkilən layihənin bir sıra ölkələrin- Türkiyə, Gürcüstan, Yunanıstan, Bolqarıstan, Albaniya və İtaliyanın iştirakı ilə həyata keçirilməsi isə təşəbbüsün beynəlxalq nüfuzunu daha da gücləndirib.

“Xatırladım ki, Cənub Qaz Dəhlizinin sonuncu hissəsi olan TAP layihəsi 2020-ci il 31 dekabr tarixində tamamlanıb. Dəyəri 33 milyard ABŞ dolları təşkil edən və mühüm iqtisadi hadisə hesab olunan, həmçinin uğurla yekunlaşdırılan bu layihənin icrasına bütün aparıcı beynəlxalq maliyyə institutları tərəfindən önəmli töhfələr verilib.

Azərbaycan Prezidenti İlham Əliyev Cənub Qaz Dəhlizi Məşvərət Şurası çərçivəsində keçirilən nazirlərin VIII toplantısında çıxışında bu barədə deyib: “Şadam ki, bugünkü iclasda iştirak edən ölkələrin sayı əvvəlkindən artıqdır. Hazırda burada 18 ölkə, 19 şirkət və 5 aparıcı beynəlxalq maliyyə təsisatı iştirak edir. Biz vahid komanda olaraq çalışırıq və hesab edirəm ki, bu, bizim uğurumuzun başlıca səbəbidir”.

Burada onu da qeyd edim ki, Azərbaycan ötən il 19 milyard kubmetr təbii qaz ixrac edib. Bu, önəmli nəticə hesab olunsa da, bu gün dünyada əlavə qaz mənbəyinə tələbatın kəskin artması vəziyyətdən çıxmaq üçün bərpaolunan enerji potensialının müəyyənləşdirilməsi zərurətini yaradıb. Yeri gəlmişkən, Azərbaycanın təbii qaz ehtiyatı hazırda 2,6 trilyon kubmetr təşkil edir. Respublikada ən böyük yataq “Şahdəniz”dir. Eyni zamanda, “Abşeron”, “Babək”, “Ümid” yataqlarının da uğurlu nəticə verəcəyinə böyük ümidlər bəslənilir.

Məşvərət Şurasının növbəti toplantısında Azərbaycan Prezidentinin qeyd etdiyi kimi, əhalinin artımı, eyni zamanda, Qarabağın işğaldan azad edilməsi ilə əlaqədar “mavi yanacaq” ehtiyatına tələbatı artırıb. Buna görə də adıçəkilən layihələrin reallaşdırılması, həmçinin bərpaolunan enerji mənbələri potensialının xüsusi diqqətdə saxlanılması prioritet vəzifə kimi qarşıya qoyulub.

Bu məqamda onu da vurğulamaq yerinə düşər ki, son illər də ölkəmizdə təkcə qaz təchizatında deyil, həm də neft və elektrik enerjisi sektorlarında da ciddi işlər görülüb. Keçən ay enerji bazarında Səudiyyə Ərəbistanının məşhur “ACWA Power” şirkəti tərəfindən maliyyələşdiriləcək ilk böyük bərpaolunan enerji mənbəyi layihəsinin təməli qoyulub.

Azərbaycanın elektrik enerjisinə regional bazarda da güclü istək var. Türkiyə, Rusiya, Gürcüstan və İran kimi qonşu dövlətlərə Azərbaycanın elektrik enerjisi ixrac etməsi də bunun bariz ifadəsidir. Bu isə şübhəsiz ki, mühüm əməkdaşlıq nümunəsidir. İşğaldan azad edilən torpaqlarda da bu istiqamətdə xüsusi proqramlar tərtib olunur. Energetika Nazirliyinin aparıcı beynəlxalq şirkətlərlə birlikdə artıq Qarabağ və Şərqi Zəngəzurda “yaşıl enerji” zonası üçün konseptual proqnozu mövcuddur. Bu isə yeni imkanlar deməkdir. Həmin bölgələrin bərpaolunan enerji mənbələri potensialının beynəlxalq qiymətləndirilməsindəki nəticələr də ümidvericidir. Belə ki, külək enerjisində potensial təxminən 7200 meqavat, Günəş enerjisində isə 2000 meqavatdan çoxdur. Bütün bu rəqəmlər isə Azərbaycanın enerji sektorunda üstünlüyünün göstəricisidir.

Prezident İlham Əliyev Məşvərət Şurasının toplantısında Azərbaycanın neft-qaz sahəsində strateji tərəfdaşı olan BP-nin işğaldan azad edilmiş ərazilərdə, xüsusilə Cəbrayıl rayonunda işləməyə böyük maraq göstərdiyini, artıq orada 200 meqavatdan çox gücə malik bərpaolunan enerji mənbəyinin tikintisi ilə bağlı respublikamızın adı çəkilən şirkətlə danışıqlar mərhələsində olduğunu da diqqətə çatdırıb.

Toplantıda Azərbaycan Energetika Nazirliyinin hazırda bərpaolunan enerjiyə investisiyaların yatırılması ilə bağlı aparıcı beynəlxalq enerji şirkətləri ilə fəal danışıqlar mərhələsində olduğu, ölkəmizin bu sahədə zəngin potensialının mövcudluğu, təkcə Xəzər dənizinin bu sahədə texniki potensialının 150 min meqavatdan çox təşkil etdiyi də diqqətə çatdırılıb”, - deyə deputat bildirib.

Rəşad Mahmudov sonda bildirib ki, uğurla həyata keçirilən iqtisadi layihələr Azərbaycan vətəndaşının sosial rifahına, indiki və gələcək həyatının firavanlığına hesablanıb.