CƏMİYYƏT


BƏT-lə əməkdaşlıqda Layiqli Əmək üzrə yeni Ölkə Proqramı hazırlanır

Bakı, 8 iyun, AZƏRTAC

Hazırda Beynəlxalq Əmək Təşkilatı (BƏT) ilə əməkdaşlıqda Layiqli Əmək üzrə yeni Ölkə Proqramının hazırlanması işləri aparılır. Yeni Proqramın prioritetləri “2021-2025-ci illər üçün BMT və Azərbaycan arasında Dayanıqlı İnkişaf üzrə Əməkdaşlığa dair Çərçivə Sənədi” ilə də tam uyğunluq təşkil edəcək.

Bu barədə əmək və əhalinin sosial müdafiəsi naziri Sahil Babayev BƏT-in Baş direktoru Qay Rayderlə bugünkü onlayn görüşündə bildirib.

Nazir Prezident İlham Əliyevin rəhbərliyi ilə ölkəmizdə əldə olunan sosial irəliləyişləri, əmək, məşğulluq, sosial müdafiə sahələrində aparılan islahatları diqqətə çatdırıb və həmin sahələrdə BƏT-lə əməkdaşlığın daim genişlənməkdə olduğunu vurğulayıb.

Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, S.Babayev ötən dövrdə ölkəmizin BƏT-in 57 Konvensiyasına qoşulduğunu və Azərbaycan ilə BƏT arasında “2016-2020-ci illər üçün Layiqli Əmək üzrə Ölkə Proqramı” uğurla icra olunduğunu bildirib. Həmin Proqram üzrə əməkdaşlıq müstəvisində əmək qanunvericiliyinin təkmilləşdirilməsi, BMT-nin Dayanıqlı İnkişaf Məqsədlərinə uyğun yeni Məşğulluq Strategiyası layihəsinin hazırlanması, əmək müfəttişliyi və məşğulluq xidmətlərinin potensialının gücləndirilməsi, özünüməşğulluq proqramının icrası, gənclərin layiqli məşğulluq imkanlarının genişləndirilməsi və s. istiqamətlərdə birgə işlər aparılıb.

Beynəlxalq Əmək Konfransının 106-cı sessiyası çərçivəsində Azərbaycan Hökuməti 2017-2020-ci illər üçün BƏT-in İdarə Heyətinə üzv seçilib və üzvlük pandemiya səbəbindən 1 iI uzadılıb.

Nazir Azərbaycanda həyata keçirilən DOST layihəsi, ilk proaktiv xidmət olan avtomatlaşdırılmış pensiya təyinatı, əmək, sosial müdafiə və məşğulluq sahələrində e-texnologiyaların geniş tətbiqi məqsədilə görülən işlər barədə məlumat verib və bu sahələrdə əldə olunan uğurlu nəticələrin digər ölkələrin müvafiq qurumlarının da yüksək marağına səbəb olduğunu diqqətə çatdırıb.

S.Babayev ötən ilin sentyabrında Ermənistanın törətdiyi hərbi təxribata cavab olaraq Azərbaycan Ordusunun əks hücum əməliyyatları həyata keçirməklə, ölkəmizin ərazilərini Ermənistanın işğalından azad etdiyini, azad edilmiş ərazilərdə tam yenidənqurma və bərpa işlərinin aparılmaqda olduğunu bildirib. Qeyd edilib ki, işğaldan azad edilmiş ərazilərdə məskunlaşma, layiqli yaşayış, aktiv məşğulluq, zəruri kadr potensialı və iqtisadi fəallıq təmin ediləcək. İnnovasiyalara və texnoloji inkişafa üstünlük verilərək həyata keçiriləcək quruculuq-bərpa işləri ölkəmizin sosial-iqtisadi inkişafının əsaslarını daha da möhkəmləndirəcək.

Q.Rayder BƏT-lə Azərbaycan arasında əməkdaşlıq əlaqələrindən bəhs edərək postmünaqişə dövründə də əhalinin layiqli məşğulluq imkanlarına çıxış əldə edə bilməsinin, yenidənqurma və stabillik əldə olunmasının inkişaf üçün böyük əhəmiyyət daşıdığını vurğulayıb. O, BƏT-in beynəlxalq səviyyədə apardığı işlərlə də uyğunluq təşkil edən bu prioritetlərin Layiqli Əmək üzrə yeni Ölkə Proqramında da əksini tapacağına əminliyini ifadə edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.