ELM VƏ TƏHSİL


Bakı Slavyan Universitetində tədbir: İki əsrin lideri

Bakı, 7 may, AZƏRTAC

Mayın 7-də Yeni Azərbaycan Partiyasının (YAP) Nəsimi rayon təşkilatının Bakı Slavyan Universiteti (BSU) ərazi ilk partiya təşkilatının və BSU-nun Pedaqoji fakültəsinin Pedaqogika və psixologiya kafedrasının birgə təşkilatçılığı ilə Azərbaycan xalqının ümummilli lideri Heydər Əliyevin anadan olmasının 98-ci ildönümünə həsr edilən “İki əsrin lideri” adlı onlayn tədbir keçirilib.

Bu barədə AZƏRTAC-a BSU-nun Mətbuat və informasiya şöbəsindən bildirilib.

Tədbiri giriş sözü ilə YAP-ın Nəsimi rayon təşkilatının BSU ərazi ilk partiya təşkilatının sədri, Pedaqoji fakültənin Pedaqogika və psixologiya kafedrasının müdiri, dosent Sevinc Axundova açıb. O bildirib ki, hər bir xalqın, millətin tarixində xilaskarlıq missiyasını həyata keçirən dahi şəxsiyyətlər olur. Azərbaycan xalqının belə dahi şəxsiyyəti ulu öndər Heydər Əliyevdir. Görkəmli dövlət xadimi Heydər Əliyev bütün həyatını xalqımızın inkişafına, dövlətimizin güclənməsinə həsr etmişdi. Ulu öndər Heydər Əliyev Azərbaycana rəhbərliyinin birinci dövründə respublikamızı tənəzzüldən xilas edərək inkişaf, tərəqqi yoluna çıxarmışdı.

Ümummilli Lider 1993-cü ilin iyun ayında Azərbaycanda siyasi hakimiyyətə qayıtdıqdan sonra ölkəmizi vətəndaş müharibəsi təhlükəsindən xilas etdi və möhkəm daxili ictimai-siyasi sabitlik yaratdı. Ulu Öndərin Azərbaycan xalqının rəsmi milli ideologiyası kimi müəyyən etdiyi azərbaycançılıq ideologiyası dünya azərbaycanlılarının həmrəyliyinin yaranmasında və onların vahid ideya ətrafında birləşmələrində, təşkilatlanmalarında mühüm rol oynadı. Ümummilli Lider Azərbaycan həqiqətlərinin dünya ictimaiyyətinə çatdırılması üçün səmərəli fəaliyyət göstərdi. Azərbaycanın yeni neft strategiyasının həyata keçirilməsi ölkəmizin iqtisadi inkişafını təmin etdi, respublikamıza böyük iqtisadi və siyasi dividendlər gətirdi. Ulu öndər Heydər Əliyev mükəmməl dövlətçilik konsepsiyası işləyib hazırladı, həyatımızın bütün sahələrində islahatlar həyata keçirildi, elm və təhsilin inkişafına xüsusi diqqət və qayğı göstərdi, ölkəmizin beynəlxalq siyasi nüfuzu artdı. Qətiyyətli, iradəli, cəsarətli, müdrik və vətənpərvər dövlət xadimi olan Heydər Əliyevin xalqımız, Vətənimiz qarşısında ən böyük xidmətlərindən biri də öz layiqli siyasi varisi kimi Azərbaycan Respublikasının Prezidenti, YAP-ın Sədri, Silahlı Qüvvələrin Ali Baş Komandanı İlham Əliyevi müəyyən etməsidir. Müzəffər Ali Baş Komandan İlham Əliyevin rəhbərliyi ilə xalqımızın Vətən müharibəsində möhtəşəm Qələbə qazanması ulu öndər Heydər Əliyevin müdrik daxili və xarici siyasətinin uğurla davam etdirilməsinin nəticəsidir. Azərbaycan Respublikasının Birinci vitse-prezidenti, YAP Sədrinin birinci müavini Mehriban Əliyevanın ölkəmizin hərtərəfli sürətli inkişafında və dövlətimizin daha da güclənməsində misilsiz xidmətləri var. Vətən müharibəsində qazandığımız böyük tarixi Qələbə ulu öndər Heydər Əliyevin ideyalarının təntənəsidir.

Sonra ulu öndər Heydər Əliyevin əziz xatirəsinə həsr olunan videoçarx nümayiş etdirilib.

Tədbirin moderatoru, Pedaqoji fakültənin Pedaqogika və psixologiya kafedrasının müəllimi Səbinə Cəfərova bildirib ki, tədbiri keçirməkdə əsas məqsəd müasir milli intibahımızın banisi, ümummilli lider Heydər Əliyevin xatirəsini uca tutmaq, Ulu Öndərin idarəçilik və dövlətçilik fəaliyyətini daha geniş miqyasda təbliğ etməkdir.

Daha sonra Pedaqoji fakültənin təhsildə sosial-psixoloji xidmət ixtisasının I kurs tələbəsi Aytən Həmidova “Heydər Əliyevin təhsilin inkişafına verdiyi töhfələr”, Pedaqogika və psixologiya kafedrasının müəllimi Günel Səmədzadə “Heydər Əliyev irsində ailə dəyərləri”, təhsildə sosial-psixoloji xidmət ixtisasının I kurs tələbəsi Fərrux Dadaşov “Heydər Əliyevin liderlik fenomeni”, Pedaqogika və psixologiya kafedrasının müəllimi Afaq Nəsibova “Heydər Əliyevin Nizami Gəncəvi irsinə verdiyi dəyər”, Beynəlxalq münasibətlər, regionşünaslıq və jurnalistika fakültəsinin regionşünaslıq ixtisasının I kurs tələbəsi Elxan Verdiyev “Heydər Əliyev və gənclər siyasəti” mövzularında məruzə ilə çıxış ediblər.

Tədbirdə, həmçinin Beynəlxalq münasibətlər, regionşünaslıq və jurnalistika fakültəsinin Azərbaycan jurnalistikası ixtisasının II kurs tələbəsi Səfura Bənnayeva “Ulu bir sərkərdə, ulu bir öndər” şeirini, Təhsildə sosial-psixoloji xidmət ixtisasının I kurs tələbəsi Aydan Musayeva “Onu zaman seçib” şeirini, Beynəlxalq münasibətlər, regionşünaslıq və jurnalistika fakültəsinin Azərbaycan jurnalistikası ixtisasının I kurs tələbəsi Ayşən İbrahimova “Ulu Öndər” şeirini səsləndiriblər.

Bununla yanaşı, Heydər Əliyev Fondunun vitse-prezidenti Leyla Əliyevanın ulu öndər Heydər Əliyevə ithaf etdiyi və Xalq artisti Ağadadaş Ağayevin ifa etdiyi “Elegiya” mahnısının videoçarxı nümayiş etdirilib.

BSU-nun tərbiyə işləri üzrə prorektoru, dosent Xanım Sultanova bildirib ki, hazırda universitetdə ulu öndər Heydər Əliyevin anadan olmasının 98-ci ildönümü münasibətilə silsilə tədbirlər keçirilir. Bugünkü tədbir də həmin silsilə tədbirlərdən biridir. Qədirbilən xalqımız həmişə ulu öndər Heydər Əliyevin xatirəsini əziz tutur, bu görkəmli siyasi xadimin xalqımız, Vətənimiz, dövlətimiz qarşısında göstərdiyi böyük tarixi xidmətləri yüksək qiymətləndirir.

Tədbir böyük dövlət xadimi Heydər Əliyevin ictimai-siyasi fəaliyyəti ilə bağlı videoçarxın təqdim edilməsi ilə başa çatıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.