REGİONLAR
Bayrağımız dövlətçiliyimizin və müstəqilliyimizin müqəddəs rəmzidir
Bölgələrdə 9 Noyabr - Dövlət Bayrağı Günü təntənə ilə qeyd olunub
Ağsu, 8 noyabr, Adil Ağayev, AZƏRTAC
XX əsrin əvvəllərindən başlayaraq üçrəngli bayrağımızın yenidən dalğalanması üçün Azərbaycan xalqı gərgin mübarizə aparıb, döyüşüb, canını, qanını əsirgəməyib. Bu savaş 1918-ci ildən başlayıb, 1920-ci il 20 Yanvar faciəsindən, 1992-ci ildə törədilən Xocalı soyqırımından keçən uzun bir yol gəlib.
AZƏRTAC-ın bölgə müxbiri xəbər verir ki, bu fikir noyabrın 8-də Ağsuda 9 Noyabr - Dövlət Bayrağı Günü münasibətilə keçirilən təntənəli yığıncaqda səsləndirilib.
Bayram tədbirinin iştirakçıları əvvəlcə şəhərin mərkəzindəki Heydər parkına gələrək Ümummilli Liderin abidəsi önünə çiçəklər düzüb, dahi rəhbərin xatirəsini ehtiramla yad ediblər.
Heydər Əliyev Mərkəzində təşkil olunan təntənəli yığıncaqda Azərbaycanın Dövlət Himni səsləndirilib. Məktəblilərin ifasında Dövlət Bayrağına həsr edilən şeirlər söylənilib.
Rayon icra hakimiyyətinin başçısı Ənvər Seyidəliyevin çıxışında 1918-ci il noyabrın 9-da Azərbaycan Xalq Cümhuriyyəti tərəfindən təsis edilən üçrəngli bayrağımızın 1990-cı il noyabrın 17-də ümummilli lider Heydər Əliyevin sədrliyi ilə keçirilən Naxçıvan Muxtar Respublikası Ali Məclisinin sessiyasında yenidən qaldırıldığı bildirilib.
İcra hakimiyyəti başçısının müavini Sevil Mirzəliyevanın “Dövlətçiliyimizin və müstəqilliyimizin müqəddəs rəmzi” mövzusundakı məruzəsində, eləcə də çıxışlarda dövlətçiliyimizin, müstəqilliyimizin simvolu olan üçrəngli bayrağımızın bundan sonra əsrlər boyu başımız üstündə dalğalanacağı diqqətə çatdırılıb.
X X X
Azərbaycanda elə bir sahə yoxdur ki, onun inkişafı, yeniləşməsi, milli maraqlar üzərində qurulması, müasirləşməsi ümummilli lider Heydər Əliyevin adı ilə bağlı olmasın. 70 ildən sonra müstəqil dövlətimizin bayrağının yenidən ucaldılması, konstitusiyamızın qəbulu da Ulu Öndərin tarixi xidmətlərindəndir.
Bu fikirlər İsmayıllıda “Heydər Əliyev idarəetmə məktəbi”nin Mədəniyyət Mərkəzində keçirdiyi Dövlət Bayrağı və Konstitusiya günlərinə həsr olunan növbəti məşğələsində söylənilib.
Rayon məhkəməsinin sədri Rafael Şirinov məruzəsində Azərbaycan Konstitusiyasının və Dövlət Bayrağının yaranma tarixindən danışıb.
Rayon icra hakimiyyətinin başçısı Mirdaməd Sadıqov ümummilli lider Heydər Əliyevin təşəbbüsü ilə 1990-cı il noyabrın 17-də Naxçıvan Ali Məclisinin sessiyasında yenidən dalğalandırılan üçrəngli bayrağımızın xalqımızın tarixi yaddaşında, hər bir azərbaycanlının qəlbində əbədi zirvəyə ucaldığını bildirib.
Çıxışlarda Ulu Öndərin Dövlət bayrağımızla bağlı söylədiyi fikirlər bir daha diqqətə çatdırılıb, dahi rəhbərin üçrəngli bayrağımızı sadəcə bayraq deyil, dövlətçiliyimizin, müstəqilliyimizin rəmzi adlandırdığı vurğulanıb.
Bayram tədbiri rayon mədəniyyət mərkəzinin “Niyal” instrumental ansamblının rəngarəng konsert proqramı ilə davam etdirilib.
X X X
Noyabrın 8-də Kürdəmirdə Dövlət Bayrağı Günü münasibətilə ümumrayon tədbiri keçirilib.
Bayraq meydanında təşkil olunan tədbirdə rayon icra hakimiyyətinin, hüquq-mühafizə orqanlarının, idarə, müəssisə və təşkilatların rəhbərləri, ağsaqqallar və gənclər, rayon ərazisində yerləşən “N” saylı hərbi hissənin əsgər və zabitləri, əmək kollektivlərinin nümayəndələri, təhsil, səhiyyə, mədəniyyət işçiləri iştirak ediblər.
Bayram tədbirində çıxış edən rayon icra hakimiyyətinin başçısı Ceyhun Cəfərov əlamətdar gün münasibətilə iştirakçıları təbrik edib, Azərbaycan bayrağının yaranma tarixindən danışıb. Vurğulayıb ki, çox keçməz, üçrəngli bayrağımız doğma Qarabağımızda dalğalanacaq.
Sonra şəhər 6 nömrəli tam orta məktəbin şagirdlərinin hazırladıqları “Bayrağımız qürur mənbəyimizdir” adlı kompozisiya nümayiş etdirilib, rayon incəsənət ustalarının ifasında konsert proqramı olub.
Dövlət Bayrağı Günü münasibətilə, habelə rayon gənclər və idman idarəsinin təşkilatçılığı ilə 50-dən çox həvəskar velosipedçinin iştirakı ilə veloyürüş keçirilib, məktəblilərin əl işlərindən ibarət sərgi nümayiş etdirilib.
X X X
Zərdablılar 9 noyabr - Dövlət Bayrağı Gününü təntənəli şəkildə qeyd ediblər.
İctimaiyyətin çoxsaylı nümayəndələrinin qatıldığı bayram tədbirinin iştirakçıları əvvəlcə ulu öndər Heydər Əliyevin abidəsi önünə tər güllər düzüb, müasir, müstəqil Azərbaycan dövlətinin qurucusu Ümummilli Liderimizin xatirəsini ehtiramla anıblar.
Bayram münasibətilə iştirakçıları təbrik edən rayon icra hakimiyyətinin başçısı Lütvəli Babayev dövlət rəmzlərimizə olan sonsuz el məhəbbətindən danışıb. Bildirib ki, ölkəmiz müstəqilliyini bərpa etdikdən sonra Azərbaycanın Dövlət Bayrağı milli suverenliyin simvolu kimi bütün vətəndaşlarımız üçün müqəddəs dövlətçilik rəmzlərindən birinə çevrilib. Üçrəngli bayrağımızın təbliği, məzmun və mahiyyətinin aşılanması Zərdabda daim diqqət mərkəzində saxlanılır. Rayonda bayraq meydanının yaradılması bu baxımdan mühüm əhəmiyyət kəsb edir.
Tədbirdə məktəblilərin ifasında dövlət bayrağımıza həsr olunan şeirlər səsləndirilib.
X X X
Göyçay Rayon İcra Hakimiyyətinin təşkilatçılığı ilə noyabrın 8-də təntənəli Bayraq yürüşü keçirilib.
Rayon rəhbərliyinin, idarə, müəssisə və təşkilatların kollektivlərinin, ictimaiyyətin çoxsaylı nümayəndələrinin, o cümlədən gənclərin, idmançıların və ümumtəhsil məktəblilərin, tələbələrin, milli geyimdə olan oğlan və qızların cəngi sədaları altında yürüşü Heydər Əliyev prospektindən və digər istiqamətlərdən başlayaraq, Bayraq Meydanınadək davam edib.
Heydər parkında Ulu Öndərin xatirəsi ehtiramla anılıb, abidəsi önünə gül dəstələri düzülüb. Göyçay Dövlət İdarəetmə və Texnologiya Kollecinin direktoru, Əməkdar müəllim Xəlil Orucov izdiham qarşısında çıxış edərək dövlət bayrağımızın rəmzi mənalarına toxunub, milli-mənəvi dəyərlərdən söz açıb. Bildirilib ki, Dövlət Bayrağı Azərbaycan dövlətinin suverenliyinin rəmzi və Azərbaycanı dünya ölkələri arasında təmsil edən dövlət atributu, xalqımızın azadlıq və istiqlal ideallarının, milli varlığının təcəssümü, hər bir vətəndaşın inam və güvən yeridir.
Tədbir ədəbi-bədii kompozisiya ilə davam etdirilib.