MƏDƏNİYYƏT


Dayanıqlı moda: tekstilin gələcəyi

Bakı, 21 iyun, AZƏRTAC

Gəncə şəhər Dövlət Filarmoniyasının nəzdindəki “Urban” mərkəzində İsveçin Azərbaycandakı səfirliyi, Gəncə Şəhər İcra Hakimiyyəti, Azərbaycan Respublikası Mədəniyyət Nazirliyi, Gəncə Regional Mədəniyyət İdarəsi və Azərbaycan Milli İncəsənət Muzeyinin birgə əməkdaşlığı çərçivəsində “Dayanıqlı moda: Tekstilin gələcəyi” adlı sərginin açılış mərasimi keçirilib.

Mədəniyyət Nazirliyindən AZƏRTAC-a bildirilib ki, sərgi İsveç İnstitutu tərəfindən tədqiqatçılar və moda mütəxəssisləri ilə birlikdə hazırlanıb. Moda sənayesinin əsas problemlərinin işıqlandırıldığı sərgidə daha dayanıqlı gələcək üçün İsveçdə irəli sürülən həll yolları və təşəbbüslər nümayiş olunur.

Moda sənayesi dünyada ətraf mühiti ən çox çirkləndirən sahələrdən biridir. Hər il dünyada istehlak etdiyimiz 62 milyon ton geyimin yalnız 20 faizini təkrar istifadə və ya təkrar emal edilir.

Sərgidə Gəncə Regional Mədəniyyət İdarəsinin rəisi Vasif Cənnətov çıxış edərək İsveçin Azərbaycandakı səfiri Kristian Kamili və bütün iştirakçıları salamlayıb. O, bu sərginin Gəncə şəhərində keçirilməsində dəstək olan Mədəniyyət Nazirliyinə, Gəncə Şəhər İcra Hakimiyyətinə, İsveçin Azərbaycandakı səfirliyinə, Azərbaycan Milli İncəsənət Muzeyinə öz təşəkkürünü bildirib və qeyd edib ki, belə tədbirlərin keçirilməsi mədəni əlaqələrin qurulmasında böyük təkandır.

Gəncə Şəhər İcra Hakimiyyətinin İctimai-siyasi və humanitar məsələlər şöbəsinin müdirinin müavini Azər İbrahimov şəhər icra hakimiyyəti başçısı Niyazi Bayramovun adından salamlayıb və səfir Kristian Kamilə Gəncə şəhərində belə bir tədbirin təşəbbüskarı olduğu üçün təşəkkürünü bildirib.

İsveçin Azərbaycandakı səfiri Kristian Kamil Gəncə şəhərində xoş qarşılandığı üçün öz təşəkkürünü bildirərək, bu il İsveç-Azərbaycan arasındakı diplomatik əlaqələrin 30 illiyinin qeyd edilməsi çərçivəsində silsilə tədbirlər həyata keçirildiyini vurğulayıb və ətraf mühitin qorunması məsələlərinə həsr edilmiş bu sərginin artıq Azərbaycanda 3-cü dəfə nümayiş olunduğunu nəzərə çatdırıb.

Sərginin kuratoru, Azərbaycan Milli İncəsənət Muzeyinin beynəlxalq əlaqələr üzrə şöbə rəhbəri Könül Rəfiyeva sərgi haqqında ətraflı məlumat verərək bildirib ki, bu sərgi həm istehsalçıların, həm də istehlakçıların paltarların və onların komponentlərinin təmirini, təkrar hazırlanmasını, təkrar istifadəsini və təkrar emalını maksimum dərəcədə artırmaqla moda sənayesinin ətraf mühitə arzuolunmaz təsirlərini minimuma endirə biləcəyi yolları izah edir.

Sərgidə, həmçinin isveçli fotoqraf Elizabet Tolun Azərbaycana səfərləri zamanı Bakı, Qəbələ və Naxçıvanda çəkdiyi moda fotoşəkilləri İsveç meşələrinin şəkilləri ilə birlikdə nümayiş olunur. Elizabet Toll İsveçin Stokholm şəhərində anadan olub və orada böyüyüb. Beynəlxalq fotoqrafiya sahəsində uğurlu karyerası ərzində o, əsas diqqətini moda, portret və mənzərəyə yönəldib.

Qeyd edək ki, sərgi iyulun 17-dək ziyarətçilər üçün açıqdır. Giriş sərbəstdir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.