ELM VƏ TƏHSİL
“Elmi əsərlər” jurnalının növbəti nömrəsi çapdan çıxıb
Bakı, 26 fevral, AZƏRTAC
AMEA Məhəmməd Füzuli adına Əlyazmalar İnstitutu tərəfindən nəşr olunan “Elmi əsərlər” jurnalının növbəti nömrəsi çapdan çıxıb.
İnstitutdan AZƏRTAC-a bildirilib ki, jurnalın bu nömrəsində “Mətnşünaslıq”, “Mənbəşünaslıq”, “Folklorşünaslıq”, “Elmşünaslıq”, “Dinşünaslıq”, “Kitabxanaşünsalıq”, “Kitabşünaslıq” və “Biblioqrafiyaşünaslıq” bölmələri üzrə məqalələr, institutda keçirilmiş mühüm tədbirlər, əldə edilmiş nailiyyətlər, eləcə də işıq üzü görmüş kitablar haqqında məlumatlar yer alıb.
Jurnalda “Yeddi gözəl” Əmin Yümmi tərcüməsində”, “Əli Şövqi Gəncəlinin avtoqrafları”, “Molla Cümənin dastanları”, “AMEA Əlyazmalar İnstitutunun fəaliyyətinin elmmetrik təhlili: ilkin araşdırma”, “Quran surələrinin fərdi xarakteri və ayələrin universallığı” və digər sərlövhəli araşdırmalar dərc olunub.
Jurnalın baş redaktoru Əlyazmalar İnstitutunun elmi işlər üzrə direktor müavini, filologiya üzrə elmlər doktoru Aybəniz Əliyeva-Kəngərlidir.