Bakı, 29 aprel, AZƏRTAC

Azərbaycanın Energetika Nazirliyində “ExxonMobil” şirkətinin “Energetika üzrə proqnoz: 2040-cı ilə baxış” hesabatı təqdim edilib, dünyada enerji ehtiyatlarının balansı, onların mövcud vəziyyəti və istifadə perspektivləri, coğrafi bölgüsü və dünya iqtisadiyyatının inkişafındakı rolu barədə geniş məlumat verilib.

Nazirlikdən AZƏRTAC-a bildirilib ki, Azərbaycanın energetika nazirinin müavini Gülməmməd Cavadovun, müvafiq şöbələrin rəhbərlərinin və əməkdaşlarının iştirakı ilə keçirilən təqdimatda “ExxonMobil” şirkətinin nümayəndəsi Todd Onderdonk energetika sahəsində dünyanın hazırkı mənzərəsi barədə söhbət açıb. Bildirilib ki, 2040-cı ilədək enerji daşıyıcılarına olan tələbatın əhəmiyyətli dərəcədə dəyişməsi gözlənilir. Sənəddə 2040-cı ildə planetdə enerjiyə tələbatın 65 faiz artacağı da əksini tapıb.

Qeyd olunub ki, dünyada enerjiyə olan tələbatın artması təkcə ümumi iqtisadi inkişafla deyil, həm də əhali və ümumi istehlakın artımı ilə bağlıdır. Digər tərəfdən, dünya əhalisinin artması, inkişaf etməkdə olan ölkələrin iqtisadi cəhətdən imkanlarının yüksəlməsi neft istehlakını və beləliklə, neft hasilatının artmasını şərtləndirə bilər. Qlobal səviyyədə karbohidrogen ehtiyatlarına qənaət strategiyasına xüsusi diqqət yetirilməsi və böyük həcmdə enerji istehlakı ilə bağlı olan maddi və qeyri-maddi istehsal sahələrinin azaldılmasını təmin etmək zəruridir. Sənaye sahələrində, tikinti sektorunda və nəqliyyatda yaşıl texnologiyalardan geniş şəkildə istifadə edilməsi dəstəklənməlidir.

Təqdimatda “ExxonMobil”in nümayəndələri nazirliyin əməkdaşlarının suallarını cavablandırıb, qarşılıqlı fikir mübadiləsi aparılıb. Qeyd edilib ki, təqdim olunan hazırkı hesabat ötən il şirkət tərəfindən təqdim edilən sənədin yenilənmiş variantıdır. Şirkət nümayəndələri energetika üzrə proqnozların hazırlanmasında istifadə olunan metodlara dair sualları da cavablandırıblar. Bildirilib ki, “ExxonMobil” uzun müddətli sərmayələrin istiqamətləndirilməsinə kömək etmək və dünyanın enerji gələcəyini formalaşdıran problemlərin daha yaxşı başa düşülməsinə imkan yaratmaqdan ötrü hər il bu proqnozlara düzəlişlər edir.