CƏMİYYƏT
FHN işçilərinin Həmkarlar İttifaqının təşkilatçılığı ilə Vətən müharibəsi iştirakçılarının Nabrandakı istirahəti sona çatıb
Bakı, 28 iyun, AZƏRTAC
İyunun 22-27-də Fövqəladə Hallar Nazirliyi (FHN) işçilərinin Həmkarlar İttifaqının təşkilatçılığı ilə Bakı şəhərindən olan 44 nəfər Vətən müharibəsi iştirakçısının Xaçmaz rayonunun Nabran kəndində yerləşən “Orman” ailəvi istirahət mərkəzində istirahətləri təşkil edilib.
Nazirliyin mətbuat xidmətindən AZƏRTAC-a verilən məlumata görə, 26 İyun - Silahlı Qüvvələr Günü münasibətilə təşkil edilən istirahət tədbirinin iştirakçıları olan Vətən müharibəsi qaziləri və veteranlar, əvvəlcə xalqımızın ümummilli lideri Heydər Əliyevin Xaçmazda ucaldılmış abidəsini və Şəhidlər xiyabanını ziyarət edərək ehtiramlarını bildiriblər.
İstirahət proqramına uyğun olaraq, qazi və müharibə veteranlarının istirahətlərini mənalı keçirmələri üçün müxtəlif oyun və yarışlar keçirilib. Belə ki, mini futbol, voleybol, stolüstü tennis, bilyard, şahmat və dama yarışları üzrə müxtəlif kateqoriyalar üzrə qaliblər müəyyən olunaraq mükafatlar təqdim edilib.
Tədbirdə çıxış edən FHN işçilərinin Həmkarlar İttifaqının sədri Mehman İsmayılov 26 İyun - Silahlı Qüvvələr Gününün əhəmiyyəti barədə ətraflı məlumat verib. O, ulu öndər Heydər Əliyevin xalqın tələb və təkidi ilə yenidən hakimiyyətə qayıdışından sonra Azərbaycanda nizami ordu quruculuğunun əsasının qoyulduğunu xatırladıb. Bu gün Azərbaycan Ordusunun ölkə Prezidenti, Silahlı Qüvvələrin Müzəffər Ali Baş Komandanı İlham Əliyevin müdrik rəhbərliyi ilə dünya ordularının sırasında layiqli yerini tutduğunu qeyd edən M.İsmayılov 44 günlük Vətən müharibəsində əsgər və zabitlərimizin göstərdiyi misilsiz qəhrəmanlıq və şücaəti bunun real nümunəsi adlandırıb. Mehman İsmayılov xüsusi vurğulayıb ki, şəhid ailələri, qazi və veteranlar daim Prezident İlham Əliyev və Birinci vitse-prezident, Heydər Əliyev Fondunun prezidenti Mehriban Əliyevanın xüsusi diqqət və qayğısı ilə əhatə olunurlar.
Qeyd edək ki, maraqlı və yaddaqalan tədbirlərlə zəngin olan istirahət proqramının yekununda müharibə veteranı və qazilərimizə FHN işçilərinin Həmkarlar İttifaqının hədiyyələri təqdim olunub.