MƏDƏNİYYƏT


“Firəngiz Əlizadə - dünya şöhrətli bəstəkarımız” adlı kitabın təqdimatı olub

Bakı, 30 noyabr, AZƏRTAC

Noyabrın 30-da Bakı Kitab Mərkəzində “Firəngiz Əlizadə - dünya şöhrətli bəstəkarımız” adlı kitabın təqdimatı olub.

AZƏRTAC xəbər verir ki, tanınmış musiqişünas, sənətşünaslıq doktoru, Ü.Hacıbəyli adına Bakı Musiqi Akademiyasının professoru, Əməkdar incəsənət xadimi Həcər Babayevanın müəllifi olduğu nəşr “Vətənoğlu” çap evində işıq üzü görüb.

Aparıcısı Bakı Kitab Mərkəzinin direktoru Günel Rzayeva olan təbirdə çıxış edən müəllif kitab haqqında məlumat verib. O deyib ki, kitabda Azərbaycan Bəstəkarlar İttifaqının sədri, Xalq artisti, professor, Azərbaycan Milli Elmlər Akademiyasının müxbir üzvü, “Şöhrət” və “Şərəf” ordenli və UNESCO-nun “Sülh artisti” kimi dünya miqyaslı mötəbər mükafatın sahibi Firəngiz Əlizadənin yaradıcılığının son 10 ili əhatə olunub. Nəşrdə dünyanın ən məşhur musiqi xadimlərinin Firəngiz xanım haqqında dediyi xoş sözlər, onun iştirak etdiyi tədbirlər, beynəlxalq konfranslar, müsabiqələr barədə ətraflı məlumatlar fotoşəkillərlə öz əksini tapıb.

Müəllif Həcər Babayeva çıxışında bildirib ki, kitab faktlar əsasında tərtib edilib. Burada Firəngiz Əlizadənin 2007-2017-ci illəri əhatə edən yaradıcılığı, fəaliyyəti və gördüyü digər işlər işıqlandırılıb. O əlavə edib ki, kitabda Azərbaycan Yazıçılar Birliyinin sədri, Xalq yazıçısı Anar, akademik Teymur Kərimli, o cümlədən Azərbaycanın tanınmış musiqişünasları - Bakı Musiqi Akademiyasının professorları, Əməkdar incəsənət xadimləri Zemfira Qafarova, İmruz Əfəndiyeva, həmçinin Kamilə Dadaşzadə, Cəmilə Həsənova və başqalarının Firəngiz xanımın yaradıcılığından bəhs edən məqalələri, eləcə də KİV-də yer alan müsahibələri də yer alıb.

Görkəmli bəstəkarın həyat və yaradıcılığı haqqında tədbir iştirakçılarına məlumat verən H.Babayeva söyləyib ki, bəstəkar müasir Azərbaycan musiqi mədəniyyətinin dünya miqyasında ən tanınmış simalarındandır. Onun əsərləri xarici ölkələrdə ən böyük konsert və teatr səhnələrində, beynəlxalq festivallarda adlı-sanlı ifaçılar tərəfindən səsləndirilir. Onun musiqisi minlərlə xarici dinləyicilər tərəfindən böyük rəğbətlə qarşılanaraq, ən geniş beynəlxalq arenada şöhrət qazanıb. O, bir bəstəkar, pianoçu, dirijor, ictimai xadim kimi beynəlxalq aləmdə böyük nüfuza malik şəxsdir. Pianoçu kimi XX əsr xarici ölkə bəstəkarlarının müasir əsərlərinin ölkəmizdə tanıdılmasında mühüm rol oynayıb, bir çox Azərbaycan bəstəkarlarının əsərlərinin ilk ifaçısıdır. Öz əsərlərinin təqdimatında da o, həm pianoçu, həm də dirijor kimi çıxış edir. F.Əlizadə öz yaradıcılığı ilə milli mədəniyyətimizi Azərbaycanın hüdudlarından çox-çox uzaqlarda parlaq şəkildə təmsil edir. Onun əsərləri bir çox xarici ölkələrdə ifa olunmaqla həmin ölkələrin “composer in residence” (ölkənin rəsmi bəstəkarı) fəxri tituluna layiq görülüb. F.Əlizadə müxtəlif janrlarda bir sıra musiqi əsərlərinin - “İntizar”, “Sənin adın Dənizdir”, “Ağ atlı oğlan” operalarının, “Boş beşik” və “Stadt-Graniza” baletləri, “Habilsayağı”, “Muğamsayağı”, “Oazis”, “Dərviş”, “Abşeron” kimi əsərlərin müəllifidir. Müxtəlif ifaçılıq tərkibi üçün instrumental əsərlərin, “Silk road” konserti, “Mərsiyə” violonçel və simfonik orkestr üçün konsert, böyük simfonik orkestr üçün “İthaf” və s. əsərlərin yaradıcısı da məhz Firəngiz xanımdır. F.Əlizadə respublikanın musiqi-ictimai həyatında önəmli rolu olan görkəmli musiqi xadimidir. Onun Heydər Əliyev Fondunun təşəbbüsü ilə keçirilən I, II və III “Muğam aləmi” Beynəlxalq Musiqi festivallarının, Azərbaycan Bəstəkarlar İttifaqının layihəsi əsasında Şəkidə və Bakıda keçirilən I, II, III, IV, V, VI və VII “İpək yolu” Beynəlxalq Musiqi festivallarının bədii rəhbəri, “Üzeyir dünyası” layihəsinin baş redaktoru kimi səmərəli fəaliyyəti var.

Azərbaycan Yazıçılar Birliyinin sədri, Xalq yazıçısı Anar belə bir nəşrin ərsəyə gəlməsini yüksək qiymətləndirib. Vurğulayıb ki, F.Əlizadə Azərbaycan musiqi mədəniyyətinin formalaşmasında böyük xidmətləri olan şəxsiyyətdir: “Firəngiz Əlizadə iki dövrün - sovet və müstəqillik dövrünün bəstəkarıdır. Onun yaradıcılığı hər zaman ölkəmizin musiqi mədəniyyətinin formalaşamasına, inkişafına böyük təsir edib, bundan sonra da təsir edəcək. Nəşrin ərsəyə gəlməsində əməyi olan hər kəsə təşəkkür edir, görkəmli bəstəkarımıza da yeni yaradıcılıq axtarışı arzulayıram”.

Tədbirdə Əməkdar incəsənət xadimləri Zemfira Səfərova, Cəmilə Həsənova və başqaları çıxış edərək kitabın əhəmiyyətindən, görkəmli bəstəkarın sənət fəaliyyətindən bəhs ediblər.

Sonda beynəlxalq müsabiqələr laureatı Ceyla Seyidova Səidə Tağızadənin (piano) müşayiəti ilə F.Əlizadənin “İmpuls” əsərini səsləndirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.