Bakı, 15 oktyabr, AZƏRTAC

Uşaqlıqdan dədə-babalarımızın arıçılıqla məşğul olduğunu görmüşəm. Ulu babalarımız belə arı saxlayıb. Hazırda 220-dən çox arı ailəmiz var. Əsasən yerli arılar bəsləyirik, onlardan da Qabaqtəpə arı cinslərinə üstünlük veririk. Ama çox təəssüf ki, arılarımızı mələzləşməkdən qoruya bilmirik. Bir pətəkdə 100 mindən artıq arı olanda o, güclü “qoşun” sayılır. Köç edəcəyimiz ərazini əvvəlcədən planlaşdırırıq. Bu baxımdan Samuxun Kürboyu meşəətrafı əraziləri arılarımızın saxlanması üçün ən əlverişli məkandır.

AZƏRTAC xəbər verir ki, bu sözləri Goranboy rayonunun Ağamalıoğlu kəndindən olan arıçı, Bakıda keçirilən arıçılıq məhsullarının 19-cu sərgi-satış yarmarkasının iştirakçısı Şahrubə Kərimova söyləyib.

O, arı südünün necə alınması və faydaları barədə danışarkən deyib: “Çərçivədəki şanı 5 santimetr ara verməklə kəsirik. Həmin kəsilmiş şandan xətt boyu arılar orada ana üskükləri hazırlayır. Həmin üsküklərə süd yığılır. Arı südü dördüncü gün yığılmalıdır. Həmin üsküklərin ağzı 7-ci gün möhürlənir. Arı südü arıların udlaq və üst çənə vəzilərindən ifraz olunur. Xərçəng xəstəliyi ilə mübarizədə bütün dünyada geniş istifadə edilir, mikrobları məhv etdiyi kimi, onların əmələ gəlməsinə də mane olur. Sonsuzluq probleminə də çarədir. Arı südü damar tıxanıqlığını aradan qaldıraraq qan axınını yaxşılaşdırır. Şəkər xəstəliyi üçün də faydalıdır. Həmçinin astma, bronxit və nəfəs darlığı çəkən xəstələr üçün də müalicəvidir və ağ ciyəri təmizləyərək bəlğəmi azaldır. Bundan başqa, arı südü uşaqların zehni və fiziki inkişafını sürətləndirərək, əzələ və sümük inkişafını da kömək edir”.

Şahrubə Kərimovanın sözlərinə görə, arı göz götürmür. Balı süzəndə gərək qohum-qonşuya da pay verəsən.

Onun sözlərinə görə, yay aylarında arı ailələrini saxlamaq üçün elə ərazi seçilməlidir ki, arı 2 kilometrədək məsafəni qət etsin. Yəni, çiçəklər yaxın məsafədə olsun. Arıların pətəyə girib rəqs etməsi digər arılara dəqiqliklə nektar olan sahənin hansı məsafədə olması xəbərini verməsi deməkdir. Arı gətirdiyi hər çiçəyin balını ayrı-ayrı üsküklərə toplayır. Buna görə də üskükləri kəsəndə balın ayrı-ayrı rəngdə olması nəzərə çarpır. “Gənc arıçılara tövsiyə edərdim ki, qara şanları çıxdaş etsinlər, çünki xəstəlik mənbəyidir. Arı yazda tünd şanlara yumurtlasa da, may ayından sonra isti havalarda açıq şanlara yumurtlamağı sevir. Ümumiyyətlə, pətəkdə qapağın altına yayda və qışda da pambıq döşəkcə qoyulması məqsədəuyğundur”, - deyə o bildirib.

Goranboylu arıçı deyib: “Qabaqtəpə arı növündə ikianalı arı ailələrini ilk dəfə qayınatam, arıçı-alim Kərim Kərimov 1957-ci ildə tətbiq edib. Bu üsulu daha da təkmilləşdirərək, məhsuldarlığı 3-4 dəfə artırmağı düşünürük”.