SİYASƏT
İntellektual şou
“Tələbə missiyası. Kim Ukraynada təhsil almaq istəyir?” - Nəticələrə nəzər salarkən
Bakı, 21 dekabr (AZƏRTAC). ATV kanalında altı həftə davam edən intellektual şənlik başa çatmaq üzrədir. Tezliklə biz “Missiya tələbə” şousunun əsas mükafatını – Ukraynada ali təhsil almaq üçün qrantı əldə edəcək qalibin adını öyrənəcəyik. Layihənin çəkilişlərinin hələ əvvəlində onun yaradıcıları şounun parlaq və genişmiqyaslı olacağına inanırdılar.
ATV kanalının rəhbəri Vüqar Qaradağlı teleşounun çəkilişləri, arzu olunan nəticənin əldə edilib-edilməməsi və tamaşaçıların Azərbaycan televiziya məkanında yeni olan bu formatı necə qarşıladıqları barədə fikirlərini AZƏRTAC-la bölüşür.
- Teleşounun ideyası və formatı necə yarandı?
- Əgər yadınızdadırsa şounun çəkilişlərinə başlamazdan əvvəl biz belə bir formatın hələ Azərbaycan televiziya məkanında mövcud olmadığı haqqında danışırdıq. İş təcrübəmizə əsaslanaraq biz hesab edirdik ki, tamaşaçılara təqdim olunan yeni format televiziya məkanını dəyişdirəcək və Azərbaycan televiziyasının inkişafına təkan verəcəkdir. Bu gün biz tam əminik ki, seçimimiz düzgün olmuşdur və sonda əldə etdiyimiz nəticə diqqətəlayiqdir. Bizim ukraynalı tərəfdaşımızı da – özünün ruh yüksəkliyi və şounun uğur qazanacağına inamı ilə bizi ruhlandıran Avromedia şirkətini, kanalın rəhbərliyini və bütün hazırlıq və çəkiliş prosesində iştirak etmiş redaksiya kollektivini də diqqətdən kənarda saxlaya bilmərəm.
- Bu format məhz nə ilə Azərbaycan televiziyası üçün diqqətəlayiqdir?
- Son vaxtlar bütün televiziya efiri ya əyləncə proqramları, ya da daha zəif nikbinlik və şübhəli keyfiyyətə malik proqramlar ilə dolmuşdu. İntellektual, eyni zamanda, öyrədici teleşou formatı ATV efirində yeni bir nəfəs oldu. Formatı yaradanların qarşılarına qoyduqları əsas məqsəd özünün miqyasına görə əvvəllər Azərbaycan televiziyasında mövcud olmamış tamamilə yeni səviyyədə şounun hazırlanması olmuşdu. Mənə belə gəlir ki, buna nail ola bildik.
- Şounun əsas məramı nə idi?
- Bəlkə də bu, altruist bir mülahizə olacaq, lakin şounun əsas ideyası istedadlı Azərbaycan gənclərinə xaricdə təhsil almaq, bu halda Ukrayna universitetlərinin birində təhsil almağa dair qrant əldə etmək üçün kömək göstərmək idi. İkinci dərəcəli hədəflər gənclərə peşəkar şouda iştirak etmək imkanı vermək, yeni həyat təcrübəsi qazanmaq üçün şərtlərin yaradılması idi. Çəkilişlər üçün Ukraynada olan zaman və universitetlərə səfər etməklə gənclər fərqli bir mədəniyyəti hiss etmək imkanı əldə etmişlər və bu da gənclərin inkişaf etməsinə, digər insanları dərk etmələrinə və öz ölkələrinə hörmət hiss etmələrinə hər şeydən yaxşı kömək edir.
- Şounun iştirakçıları haqqında danışarkən, siz onların hazırlıq səviyyələrini necə qiymətləndirirsiniz?
- İştirakçıların seçim prosesi zamanı layihə qrupu müxtəlif məktəblərdən olan çox sayda uşaqlar ilə görüşdü. Onlar yalnız məktəb biliklərini deyil, eləcə də ümumi erudisiya səviyyəsini, reaksiyanı, yumor hissini, həmçinin kadrda özünü aparmaq bacarığını qiymətləndirirdilər. Mənim fikrimcə, məktəblərdə seçimlərdən keçmiş və teleşounun iştirakçısı olmuş bütün uşaqlar parlaq və unudulmaz şəxsiyyətlərdir. Onların biliklərini qiymətləndirmək və toplanmış ballardan danışmaq olar, amma onların qorxmadan belə bir televiziya proqramında iştirak etmələri, digər bir ölkəyə getmələri və orada Ukraynanın qədim ali təhsil ocaqlarından birində təhsil almaq uğrunda yarışmaları artıq qələbədir.
- Bəlkə çəkilişlər zamanı nə isə gözdən qaçırılmışdır? Nəyi təkmilləşdirmək istərdiniz?
- Bu gün mən yalnız xoş təəssüratları paylaşmaq istərdim. Biz ötən ilə təşəkkür edə bilərik: biz daha təcrübəli, inamlı olduq və gəncliyə layiqli örnək nümayiş etdirdik. Əgər daha yüksək nailiyyət əldə etmək istəyirsənsə risk etməkdən çəkinmə. “Tələbə missiyası: Kim Ukraynada təhsil almaq istəyir?” layihəsi ATV kanalı üçün bir növ risk və Avromedia üçün çağırış idi. Biz bu çağırışı qəbul etdik və mən tam əminliklə deyə bilərəm ki, belə bir layihənin gerçəkləşdirilməsi bizim nə edə biləcəyimizi və sənin əsl komandanın kim olduğunu göstərir. Ukrayna şirkətindən olan uşaqlar işıq və səsin möcüzəsini yaratdılar, onlar şounun çəkilişi və montajı müddətində keyfiyyətli iş gördülər, şounun ssenarisini, sualları, başlıqları, studiyanın dizaynını xırdalıqlarına qədər tərtib etdilər. İşin böyük hissəsi birbaşa uşaqlar ilə işləyən, onlara çəkilişlərə hazırlaşmaqda, kadrda yaxşı görünməkdə kömək edən və onlarda mübarizə ruhunu dəstəkləyən gənc və zərif qızların üzərinə düşmüşdü. Həmişə dəyişdirmək və təkmilləşdirmək mümkündür, lakin bunu yalnız ciddi layihələrin həyata keçirilməsində təcrübəsi olan şəxslər edə bilər.