İQTİSADİYYAT


Jurnalistlər üçün Ağdam və Suqovuşan yarımstansiyalarına mediatur təşkil olunub

Bakı, 16 fevral, AZƏRTAC

Fevralın 15-də ölkənin aparıcı kütləvi informasiya vasitələrinin nümayəndələrinin Ağdam və Suqovuşana media-turu təşkil olunub

AZƏRTAC xəbər verir ki, jurnalistlər Prezident İlham Əliyevin açılışını etdiyi “Ağdam-1”, “Ağdam-2” yarımstansiyalarında, “Qarabağ” Rəqəmsal İdarəetmə Mərkəzində, eləcə də Tərtər rayonunun Suqovuşan qəsəbəsindəki eyniadlı yarımstansiyasında olublar.

Jurnalistlərə yarımstansiyalar barədə məlumat verən “Azərenerji” ASC-nin ictimaiyyətlə əlaqələr mərkəzinin rəisi Teymur Abdullayev bildirib ki, “Ağdam-1” yarımstansiyası böyük və müasir enerji kompleksin tərkibində yaradılıb. Kompleksin bir hissəsində 110 kilovoltluq açıq və 35, 10 kilovoltluq qapalı paylayıcı qurğuların yerləşdirildiyi inzibati bina, digər hissəsində isə 110/35/10 kilovoltluq yarımstansiya tikilib. Obyekt tam rəqəmsallaşdırılaraq avtomatlaşdırılıb, burda aktivlərin, proseslərin, resursların idarə edilməsi, tədarük və paylanma zəncirlərinin təkmilləşdirilməsi, qüsurların vaxtında aradan qaldırılması, sistemin monitorinqinin və analizinin, problemlərin tez həllinin proqram təminatı vasitəsilə avtomatik həyata keçirilməsi təmin edilib.

“Ağdam-2” yarımstansiyası isə Ağdam rayonunun Əsgərana yaxın, Şelli kəndi istiqamətində 110/35/10 kilovoltluq olmaqla inşa edilib. Onun yerləşdiyi ərazi bir neçə aya minalardan təmizlənib, burada dördüncü sənaye inqilabının yaratdığı texnoloji yeniliklərə uyğun olaraq süni intellektə adaptasiya olunan enerji sistemi şəbəkəsi konsepsiyası çərçivəsində müasir, dayanıqlı, tam rəqəmsallaşdırılmış yarımstansiya tikilib. Yarımstansiyada 110 kilovoltluq açıq paylayıcı qurğu yaradılıb, açarların, ayırıcıların və digər texniki avadanlıqların açılıb-qoşulması, o cümlədən, aktivlərin, proseslərin, resursların idarə edilməsi, qüsurların təcili aradan qaldırılması və başqa əməliyyatların proqram təminatı vasitəsilə avtomatik həyata keçirilməsi təmin edilib. Yarımstansiyanın yeni tikilən İdarəetmə Mərkəzi isə 35 və 10 kilovoltluq rəqəmsal qapalı paylayıcı qurğular yerləşdirilməklə yanaşı, əks-qəza avtomatikası, mikroprosessor tipli rele mühafizəsi, avtomatika və idarəetmə panelləri, sabit və dəyişən cərəyan qurğuları ilə təmin edilib. Yarımstansiyada müasir tələblərə cavab verən micro-SCADA sistemi yaradılıb, “Azərenerji” ASC-nin mərkəzi SCADA sistemi ilə sinxronlaşdırılıb.

Teymur Abdullayev əlavə edib ki, “Qarabağ” Rəqəmsal İdarəetmə Mərkəzi ölkənin elektroenergetika tarixində ilk dəfə Qarabağ və Şərqi Zəngəzurun elektrik şəbəkəsinin Regional Rəqəmsal İdarəetmə Mərkəzi kimi Ağdamda tikilib. Operativ Qərargahın şəhərsalma işçi qrupunun təsdiq etdiyi, müasir üslubda hazırlanmış memarlıq layihəsi əsasında Rəqəmsal İdarəetmə Mərkəzi vasitəsilə bütün regiondakı elektrik stansiyaları, yarımstansiyalar, ötürmə xətlərinin monitorinqi, önləyici analizlər, açılıb-qoşulmalar, tənzimlənmələr və başqa əməliyyatlar avtomatik həyata keçirilir. Mərkəzin ərazisində elektrik avadanlıqlarının təmir sexi, xüsusi təyinatlı mexanizmlər üçün qaraj sahəsi, anbar binası və mühəndis yataqxanası da daxil olmaqla digər xüsusi təyinatlı binalar tikilib. 2,5 hektar ərazidə yaşıllıq və meyvə bağı salınıb.

“Cəbrayılda 330 kilovoltluq yarımstansiyasının tikilməsi də nəzərdə tutulub. Bunun üçün İmişlidən və Ağcabədidən 330 kilovoltluq xətt çəkiləcək və Cəbrayıldan başlayan xətt Zəngəzur dəhlizini keçməklə Naxçıvana gedəcək. Naxçıvanda isə yeni 330 kilovoltluq yarımstansiya tikiləcək və oradan da elektrik enerjimiz Türkiyə üzərindən Avropaya ixrac ediləcək”, - deyə Teymur Abdullayev vurğulayıb.

Daha sonra jurnalistlər Suqovuşan qəsəbəsində yerləşən 4,8 MVt-lıq “Suqovuşan-1” və 3 MVt-lıq “Suqovuşan-2” KSES-lərə səfər ediblər. Görülən işlərlə yaxından tanış olan media nümayəndələrinə “Mingəçevir Su Elektrik Stansiyası” MMC-nin direktoru Oktay Piriverdiyev bildirib ki, işğaldan azad olunmuş ərazilərdə 30 kiçik su elektrik stansiyasının tikilib istifadəyə verilməsi planlaşdırılır və bu istiqamətdə işlərə başlanılıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.