REGİONLAR
Kəngərli rayonunun Qabıllı kəndində yeni mini futbol stadionu istifadəyə verilib
Kəngərli, 14 iyun, AZƏRTAC
Muxtar respublikanın Kəngərli rayonunun Qabıllı kəndində yeni mini futbol stadionu istifadəyə verilib.
Naxçıvan Muxtar Respublikası Gənclər və İdman Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, bu münasibətlə keçirilən tədbirdə çıxış edən Kəngərli Rayon İcra Hakimiyyətinin başçısı Kamal Ələkbərov muxtar respublikada gənclərə göstərilən diqqət və qayğıdan, idmanın inkişafı istiqamətində həyata keçirilən kompleks tədbirlərdən danışıb. Bildirib ki, bu gün qədim diyarımızın şəhər, qəsəbə və kəndlərində yeni idman obyektləri tikilərək gənclərimizin ixtiyarına verilir. Bu da muxtar respublika rəhbərinin idmanın inkişafına göstərdiyi qayğının bariz nümunəsidir. Yeni istifadəyə verilən stadion da Kəngərli rayonunda uşaq və yeniyetmələrin, gənclərin asudə vaxtlarının səmərəli təşkil olunmasında müstəsna rol oynayacaq.
Qeyd olunub ki, Qabıllı kənd sakini, sahibkar Füzuli Hüseynov belə bir təşəbbüsü irəli sürdükdən sonra dövlət tərəfindən ərazi müəyyənləşdirilib və müvafiq yerdə yeni stadionun inşası aparılıb. Bu, həm də muxtar respublikada sahibkarlara göstərilən diqqətin növbəti nümunəsidir.
Stadionun Milli Qurtuluş Günü ərəfəsində istifadəyə verilməsini bölgələrimizdə idmanın inkişafına verilən növbəti töhfə kimi dəyərləndirən Kamal Ələkbərov bu münasibətlə idmançıları təbrik edib, onlara uğurlar arzulayıb.
Milli Qurtuluş Günü münasibətilə idman ictimaiyyətini təbrik edən Naxçıvan Muxtar Respublikasının Gənclər və İdman naziri Azad Cabbarov qeyd edib ki, “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı”nın təsdiq edilməsi haqqında Ali Məclis Sədrinin Sərəncamına əsasən, bu sahədə investisiya mühitinin yaradılması, sahibkarlıq fəaliyyətinin dəstəklənməsi daim diqqətdə saxlanılır. Muxtar respublikada sahibkarlığın inkişaf etdirilməsi ilə bağlı həyata keçirilən sistemli tədbirlər nəticəsində geniş sahibkarlar sinfi formalaşıb və bu təbəqə sosial-iqtisadi inkişafın aparıcı qüvvəsinə çevrilib. Məhz sahibkarlığa dəstəyin nəticəsidir ki, bu gün belə bir stadion inşa edilib. Ümumiyyətlə, muxtar respublikada uğurlu idman siyasəti nəticəsində mütəmadi olaraq tədbirlər, yarışlar, turnirlər təşkil edilir, hər il idman infrastrukturu müasirləşdirilir. Buna son olaraq Uzunoba gölü ətrafında inşa edilən Təlim-Məşq İdman Kompleksini nümunə göstərə bilərik. Muxtar diyarımızda idmanın inkişafına davamlı qayğı göstərilməsi, yaradılan müasir infrastruktur burada beynəlxalq yarışların yüksək səviyyədə keçirilməsinə imkan verir. Bu gün muxtar respublikanın şəhər və rayonları ilə yanaşı, kəndlərində də idmanın kütləviliyinin təmin olunmasına xüsusi diqqət yetirilir. Bunun nəticəsidir ki, artıq kəndlərdə yeni idman obyektləri tikilir və ya yenidən qurulur. Bunlardan biri də Qabıllı kənd stadionudur. Bu stadionda keçiriləcək yarışlar, turnirlər istedadlı gənclərin üzə çıxarılmasına şərait yaradacaqdır.
Tədbirdə çıxış edən sahibkarın qardaşı Pərviz Hüseynov və qızı Aytən Hüseynova yaradılan şəraitə və dəstəyə görə muxtar respublika rəhbərinə minnətdarlıqlarını bildiriblər. Mənsim Möhbalıyev və Hüseyn Səfərəliyev isə Qabıllı kənd sakinləri adından dövlətimizə minnətdarlıqlarını bildirib, futbol meydançasının tikintisində əməyi olan hər kəsə təşəkkür ediblər.
Sonra stadionda ilk futbol qarşılaşması olub, Şərur və Kəngərli rayon uşaq futbol komandaları arasında yoldaşlıq görüşü keçirilib.
Qeyd edək ki, uzunluğu 42, eni 26 metr olan süni örtüklü stadionun ərazisi 0,6 hektardır. Stadionda işıqlandırma sistemi, eyni zamanda, bir paltardəyişmə otağı, bir yardımçı otaq və sanitar qovşaq quraşdırılıb. Əraziyə kilid daşları döşənilib, stadionun ətrafında abadlıq işlər aparılıb, asfalt örtüyü salınıb. Eyni zamanda, stadionun yanında 1 hektar ərazidə badam bağı salınıb.