ELM VƏ TƏHSİL
Milli-mənəvi dəyərlər hər bir gəncin həyatında mühüm yer tutur
Bakı, 2 fevral, AZƏRTAC
Azərbaycan İlahiyyat İnstitutunda (Aİİ) Azərbaycan Gəncləri Gününə həsr olunmuş “Milli-mənəvi dəyərlərin təbliğində gənclərin rolu” mövzusunda dəyirmi masa keçirilib. Tədbir Azərbaycan Respublikasının dövlət himninin səsləndirilməsi ilə başlanıb.
Aİİ-dən AZƏRTAC-a bildirilib ki, dəyirmi masada çıxış edən rektor Ceyhun Məmmədov əsası ulu öndər Heydər Əliyev tərəfindən qoyulan, Prezident İlham Əliyev tərəfindən uğurla davam etdirilən dövlət-din münasibətlərinin inkişafı istiqamətində görülən işlər, ölkəmizin inkişafında və milli-mənəvi dəyərlərin zənginləşdirilməsində həyata keçirilən tədbirlər haqqında məlumat verib. Rektor vurğulayıb ki, Azərbaycan xalqının ümummilli lideri Heydər Əliyevin irəli sürdüyü azərbaycançılıq ideologiyası həyat tərzində, əxlaqda, mənəviyyatda, dildə, dində, ədəbiyyatda, bir sözlə, maddi və mənəvi mədəniyyətimizin bütün sahələrində istiqamətləndirici məfkurəmiz olmalıdır.
C.Məmmədov ali tədris müəssisəsinin gənclərdə vətənpərvərlik ruhunun aşılanması istiqamətində müxtəlif tədbirlər həyata keçirdiyini deyib. O, milli-mənəvi dəyərlərin hər bir gəncin həyatında mühüm yer tutduğunu söyləyib. İnstitut rəhbəri gənclərin milli ruhda tərbiyəsindən, onların müstəqil dövlətçilik ənənələrinin inkişafındakı rolundan, tariximizin öyrənilməsi, Azərbaycan həqiqətlərinin dünya ictimaiyyətinə düzgün çatdırılmasında gənclərimizin fəallığının daha da artırılmasından, onların müasir informasiya-kommunikasiya texnologiyalarından, sosial şəbəkələrdən səmərəli istifadəyə təşviq edilməsinin zəruriliyindən danışıb.
“İslamda gənclik” mövzusunda çıxış edən Aİİ-nin islamşünaslıq kafedrasının müdiri, fəlsəfə üzrə fəlsəfə doktoru Əhməd Niyazov İslam dininin gəncliyə verdiyi mühüm bilgiləri vurğulayıb.
AMEA Elm Tarixi İnstitutunun aparıcı elmi işçisi, iqtisadiyyat üzrə fəlsəfə doktoru Amal Həsənli “Azərbaycan gənclərinin milli dövlətçiliyimizin qorunmasında rolu” mövzusu ilə çıxış edərək bildirib ki, milli dövlətçilik dəyərlərinin zənginləşdirilməsi və inkişafı üçün sağlam cəmiyyətə ehtiyac var.
YAP Suraxanı Rayon Təşkilatı idarə heyətinin üzvü Arzu Həsənzadə “Dəyərlərimizdə qadın amili” mövzusunda məruzəsi zamanı cəmiyyətimizin qadına xüsusi önəm verdiyini, onlara hörmət, sevgi, şəfqət, mərhəmət nümayiş etdirdiyini, Ulu Öndərin Azərbaycan qadınına hər zaman yüksək qiymət verdiyini söyləyib.
Azərbaycan İlahiyyat İnstitutunun 1-ci kurs magistri Fərhad Ələkbərov “Milli-mənəvi dəyərlər amili” mövzusunda danışaraq, Azərbaycan xalqının milli-mənəvi zənginliklərinin yaşadılması və inkişaf etdirilməsində məhz ümummilli lider Heydər Əliyevin əvəzsiz xidmətlərinin olduğunu vurğulayıb. O, Avropanın və Qərbin mütərəqqi inkişaf meyillərini mənimsəməklə yanaşı, milli-mənəvi, dini dəyərlərimizi qorumağı, ona sadiq qalmağı hər bir gəncin üzərinə düşən məsuliyyət hesab etdiyini söyləyib.
İnstitutun 2-ci kurs magistri Nərgizxatun Həsənova “Milli-mənəvi dəyərlərin təbliğində gənclərin rolu” mövzusunda çıxışı zamanı milli ideologiyanın, tarixin, dilin, mədəniyyətin, incəsənətin, ədəbiyyatın, milli özünüdərkin, ailənin, milli musiqimizin və folklorumuzun xalqın yaddaşı olduğunu bildirib.
Dəyirmi masada milli-mənəvi dəyərlərimizin yaşadılmasında, təbliğində genişmiqyaslı fəaliyyəti ilə xalqın rəğbətini qazanmış Heydər Əliyev Fondunun bu sahədə böyük uğurlara imza atdığı xüsusi vurğulanıb. Tədbir məruzələr ətrafında fikir mübadiləsi ilə davam edib.