REGİONLAR
Naxçıvan enerji idxalçısından ixracatçısına çevrilib
Naxçıvan, 16 oktyabr, AZƏRTAC
Muxtar respublikada aparılan məqsədyönlü siyasət nəticəsində Naxçıvan enerji idxalçısından ixracatçısına çevrilib.
Naxçıvan Dövlət Universitetinin (NDU) Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, bu barədə universitetdə “Elektroenergetika mühəndisliyinin texniki və fiziki problemləri” mövzusunda keçirilən XIV beynəlxalq elmi konfransda danışılıb.
Azərbaycanın, Türkiyənin və İranın bir sıra universitetlərinin nümayəndələrinin iştirak etdiyi konfransda çıxış edən ali təhsil ocağının rektoru, AMEA-nın müxbir üzvü Saleh Məhərrəmov bildirib ki, ümummilli lider Heydər Əliyevin həyata keçirdiyi inkişaf proqramları, kompleks tədbirlər, səmərəli kadr islahatları və idarəçilik metodları bütün sahələrdə, eləcə də enerji sektorunda uzunmüddətli inkişafın təməlini formalaşdırıb. Neft emalı sənayesi və elektroenergetika sisteminin sürətli inkişaf dövrü də ümummilli lider Heydər Əliyevin adı ilə bağlıdır. Ulu Öndərin ideyalarının, strateji inkişaf kursunun bu gün Azərbaycan Respublikasının Prezidenti İlham Əliyev tərəfindən uğurla davam etdirildiyini diqqətə çatdıran rektor konfransın işinə uğurlar arzulayıb.
Çankırı Karatekin Universitetinin prorektoru, professor Murad Arı elektrik enerjisinin əldə olunmasından, yüksəksürətli elektrik xətlərinin fəaliyyət mexanizmindən danışıb. Gələcək perspektivləri dəyərləndirən qonaq bildirib ki, ötürücü infrastrukturun təkmilləşdirilməsi və müasirləşdirilməsi istiqamətində həyata keçirilən tədbirlər enerji sisteminin dayanıqlığını möhkəmləndirməklə yanaşı, regional əməkdaşlıq və kommersiya əlaqələri üçün texniki imkanların genişləndirilməsinə də şərait yaradacaq.
AMEA-nın Fizika İnstitutunun dosenti Kamil Qurbanov energetiklərin konfransının ilk dəfə 2002-ci ildə keçirildiyini diqqətə çatdırıb, İran, Türkiyə, Norveç, Rumıniya, İspaniya və başqa ölkələrdə də baş tutan bu cür tədbirlərin muxtar respublikada təşkilindən məmnunluq duyduğunu bildirib. Enerji sahəsində Türkiyə ilə əlaqələrin perspektivlərindən danışan Kamil Qurbanov vurğulayıb ki, Türkiyə enerji sistemi ilə Azərbaycanın Naxçıvan Muxtar Respublikası arasında əlaqə birbaşa, Azərbaycanla isə Gürcüstan vasitəsi ilə həyata keçirilir.
Türkiyənin Ankara şəhərindəki Qazi Universitetinin professoru Cengiz Taplamacıoğlu qeyd edib ki, konverter texnologiyalarının paralel inkişaf etməsi ilə əlaqədar olaraq dünyada, o cümlədən Türkiyədə yüksəkgərginlikli birbaşa cərəyan xətlərinin istifadəsi sürətlə artır. Professor ölkələrarası elektrik enerjisi verilməsi prosesində itkilərin azaldılmasının əhəmiyyətini vurğulayıb.
Enerjinin ixracı məsələləri, təminatı və təhlükəsizliyindən bəhs edən İran İslam Respublikasının nümayəndəsi Hadi Sadeghi dəyişən gərginliklə müqayisədə enerjinin sabit gərginliklə ötürülməsinin bir sıra üstünlükləri olduğunu diqqətə çatdırıb. O, enerjini daha uzaq məsafələrə ötürülməsi üçün sabit cərəyan sistemlərindən istifadənin mümkünlüyü barədə fikirlər səsləndirib.
Qeyd edək ki, AMEA-nın Fizika İnstitutundan gələn nümayəndə heyəti NDU-nun Memarlıq və mühəndislik fakültəsinin elektroenergetika mühəndisliyi ixtisasında dərs keçib. Şəxsi təcrübələrini bölüşən müəllimlər bütün sahələrdə olduğu kimi, elektroenergetika sahəsində də müasir intellektual sistemlərin və texnologiyaların tətbiqinin zəruriliyindən danışıblar.