REGİONLAR
Naxçıvanda mətbuata göstərilən dövlət qayğısı burada jurnalist kadrların yetişməsində mühüm rol oynayır
Naxçıvan, 22 iyul, AZƏRTAC
Bu gün ölkəmizdə, o cümlədən muxtar respublikada söz və mətbuat azadlığına, kütləvi informasiya vasitələrinə ən yüksək səviyyədə diqqət və qayğı göstərilir. Bunun nəticəsidir ki, mətbuatımızda milli jurnalistika ənənələri qorunub saxlanılır, kütləvi informasiya vasitələri cəmiyyətin güzgüsü rolunu oynaya bilir.
Naxçıvan Dövlət Universitetinin (NDU) Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, bu fikirlər 22 iyul - Milli Mətbuat və Jurnalistika Günü ilə əlaqədar universitetdə keçirilən tədbirdə səsləndirilib.
Ali təhsil ocağının rektoru, AMEA-nın müxbir üzvü Saleh Məhərrəmov ölkəmizdə söz, fikir və mətbuat azadlığının təmin edilməsində ümummilli lider Heydər Əliyevin müstəsna xidmətlərindən danışıb. Rektor kütləvi informasiya vasitələrinə göstərilən dövlət dəstəyinin jurnalist kadrların yetişməsində oynadığı rolu xüsusilə vurğulayaraq əlamətdar tarixi gün münasibətilə universitetin media kollektivini təbrik edib.
Jurnalistika və kitabxanaçılıq kafedrasının müdiri, filologiya üzrə fəlsəfə doktoru, dosent Şəhla Şirəliyeva “Naxçıvan Muxtar Respublikasında jurnalistika ixtisası üzrə kadr hazırlığı” adlı çıxışında bildirib ki, milli mətbuatımızın yaradıcısı Həsən bəy Zərdabidən başlayaraq, günümüzə qədər böyük qələm ustaları milli təfəkkürün inkişafı üçün misilsiz xidmətlər göstərərək xalqımızın maariflənməsinə və tərəqqisinə böyük töhfələr veriblər. Vurğulanıb ki, muxtar respublikada mətbuata göstərilən hərtərəfli qayğının tərkib hissəsi kimi, Naxçıvan Dövlət Universitetində də milli və müasir jurnalistika ənənələri formalaşaraq inkişaf edib. “Yeni fikir” qəzetinin nəşr olunması, Universitet televiziyasının, “Nuhçıxan” radiosunun və “Qeyrət” nəşriyyatının fəaliyyət göstərməsi, Media mərkəzinin yaradılması NDU-nun elmi, sosial və mədəni həyatı üçün böyük əhəmiyyət kəsb edir.
Sonra “Azərbaycan mediası: reallıqlar və perspektivlər”, “Tələbə jurnalistlərin yetişməsində universitetin Media mərkəzinin rolu” mövzularında çıxışlar dinlənilib.
Jurnalistika və kitabxanaçılıq kafedrasının dosenti, filologiya üzrə fəlsəfə doktoru İman Cəfərov da çıxış edərək əlamətdar tarixi gün münasibətilə bütün kollektivi təbrik edib, gələcəyin jurnalist kadrlarına uğurlar arzulayıb. Qeyd edib ki, universitetin Media mərkəzində tələbələrin peşəkar jurnalist kimi yetişməsi, nəzəri biliklərin praktik tətbiqinə nail olunması üçün hər cür şərait yaradılıb. Universitetdə təşkil edilən tədbirlərin işıqlandırılması, muxtar respublika və hətta Azərbaycan mediasına çatdırılması istiqamətində mərkəzin fəaliyyəti təqdirəlayiq dəyərləndirilib.
Sonra rektor tərəfindən milli mətbuatın 144 illiyi münasibətilə NDU-nun “Qeyrət” nəşriyyatında, Media mərkəzində çalışan bir qrup əməkdaşa mükafatlar təqdim edilib.