Naxçıvan, 17 sentyabr, AZƏRTAC

Bu tədris ilində Naxçıvan Müəllimlər İnstitutunda əlavə olaraq 3 yeni ixtisasa qəbul aparılıb. Bunlar İngilis dili müəllimliyi, Tarix müəllimliyi və Psixologiya ixtisaslarıdır. Ümumi olaraq bu il instituta 11 ixtisasda bakalavr üzrə 327, magistratura səviyyəsi üzrə isə 22 tələbə qeydiyyatdan keçib. Naxçıvan Müəllimlər İnstitutunda 13 əcnəbi tələbə təhsil alacaq.

AZƏRTAC-ın Naxçıvan bürosu xəbər verir ki, bu faktlar Naxçıvan Müəllimlər İnstitutunda Bilik Günü münasibətilə keçirilən tədbirdə səsləndirilib.

Yeni dərs ili münasibətilə institutun rektoru, dosent Elbrus İsayev çıxış edərək, yeni qəbul olmuş tələbələri və valideynləri təbrik edib.

İnstitutun prorektoru Azad Novruzov, Pedaqoji fakültənin dekanı Arif Ağalarov, Təbiət və incəsənət fakültəsinin dekanı Rövşən Vəliyev çıxışlarında bildiriblər ki, bu ali təhsil ocağında zəngin maddi-texniki baza yaradılıb, yüksəkixtisaslı pedaqoji heyət formalaşdırılıb. Bir sözlə, tələbələrin mükəmməl ali təhsil almaları üçün əsaslı zəmin yaradılıb.

Yeni qəbul olmuş tələbələrin valideynləri də çıxış edərək, övladlarının Naxçıvan Müəllimlər İnstitutunda təhsil alacaqlarından fəxr hissi keçirdiklərini bildiriblər. Sonda yüksək balla instituta daxil olmuş tələbələrə tələbə bileti və qiymət kitabçaları təqdim edilib.

X X X

Naxçıvan Dövlət Universitetində 15 sentyabr – Bilik Günü münasibətilə keçirilən tədbirdə Azərbaycan Respublikasının Dövlət Himni səsləndirildikdən sonra universitetin rektoru, AMEA-nın müxbir üzvü Saleh Məhərrəmov müəllim və tələbələri yeni tədris ilinin başlanması münasibətilə təbrik edib, onlara uğurlar arzulayıb. Təhsil siyasətinin Azərbaycanda, o cümlədən muxtar respublikada uğurla həyata keçirildiyini vurğulayan rektor tədris prosesinin kredit sistemi əsasında təşkilinin ümumi müddəaları, əsas səciyyəvi xüsusiyyətləri, sənədləşmə, qiymətləndirmə prinsipləri, tələbə və müəllimlərin mobilliyinin təmin olunması və digər məsələlər barədə danışıb. Bildirib ki, bu il bakalavr üzrə 1029, magistratura üzrə isə 139 tələbə universitetə qəbul olub.

Valideyn Ruhəngiz Əsgərova tələbələri təbrik edib, onlara yeni-yeni uğurlar arzulayıb.

651 balla universitetin Sosial idarəetmə və hüquq fakültəsinin Hüquqşünaslıq ixtisasına qəbul olmuş Səmanə İmanova birinci kurs tələbələri adından çıxış edərək, ölkədə təhsilə yaradılan yüksək şəraitə, hərtərəfli dövlət qayğısına görə minnətdarlığını bildirib.

Sonra universitetə yüksək balla qəbul olanlara tələbə bileti və “Naxçıvan Ensiklopediyası” kitabı təqdim olunub.

Sonda universitetin tanıtım filmi nümayiş etdirilib.

X X X

“Naxçıvan” Universitetində keçirilən tədbirdə əvvəlcə Azərbaycan Respublikasının Dövlət Himni səsləndirilib.

Tədbirdə universitetin rektoru, professor İsmayıl Əliyev müəllim və tələbələrin yeni tədris ilini təbrik edib, uğurlar arzulayıb. Rektor Azərbaycanda təhsilin inkişaf strategiyasından, ümummilli lider Heydər Əliyevin təhsil siyasətinin muxtar respublikada da uğurla davam etdirilməsindən danışıb.

Vurğulanıb ki, bu gün ali məktəbin beynəlxalq əlaqələri genişləndirilib, universitetin əməkdaşlıq etdiyi ali təhsil ocaqlarının sayı 51-ə çatıb.

Pedaqoji fakültənin dekanı, filologiya üzrə fəlsəfə doktoru, dosent Nurlana Əliyeva çıxışında bildirib ki, “Naxçıvan” Universiteti yüksəkixtisaslı mütəxəssislər yetişdirən, güclü maddi-texniki bazaya malik, beynəlxalq əlaqələrini günbəgün genişləndirən ali təhsil ocağıdır. 1999-cu ildən fəaliyyət göstərən universitetdə hazırda 4 fakültə, 10 kafedra, 6 şöbə var. 2019-2020-ci tədris ilində universitetdə 1200-dən çox tələbə təhsil alacaq. Bu tədris ilində 14 ixtisas üzrə mütəxəssis hazırlığı aparılacaq. Universitetdə təhsilin keyfiyyəti yüksəldilir, ixtisas fənləri üzrə elmi dərəcəsi olan müəllimlərə üstünlük verilir, tədris zamanı müasir təlim texnologiyalarından istifadə diqqətdə saxlanılır.

Ali təhsil ocağının Tələbə-Gənclər Təşkilatının sədri Zakir Məmmədov çıxışında muxtar respublikada təhsilin inkişafına göstərilən qayğıdan danışıb.

İngilis dili müəllimliyi ixtisası üzrə I kurs tələbəsi İnci Allahverdili tələbələr adından çıxış edərək, ali təhsil ocağında yaradılan mükəmməl şəraitin onların yüksək səviyyədə təhsil almalarına xidmət etdiyini vurğulayıb.

Daha sonra çıxış edən valideynlər universitetdə yaradılan şəraitə görə Naxçıvan Muxtar Respublikası Ali Məclisinin Sədrinə minnətdarlıqlarını bildiriblər.

Sonda yüksək balla universitetə daxil olanlara tələbə biletləri təqdim edilib.